1 Merikɨtsɨ xewitɨ tewi Kakaɨyari hetsɨa mieme Kura kwieyaritsie yeyaka peta'a Weteri paitɨ Yawé mɨpaɨ mɨrehɨawekaikɨ. Kepauka mana mawari taiyame Keruwuhani 'ɨkwa taiyakaku, 2 tewi Kakaɨyari hetsɨa mieme, Yawé yarehɨawekaku, mɨpaɨ katiniuhiwa karima: «Mawari taiyame, mɨratimawatɨre 'aku. Yawé mɨpaɨ kanaineni: “Rawiri nuiwarieyatsie kanitinuiwamɨkɨ xewitɨ Kutsiyaxi titewatɨ, mɨkɨ 'ahetsie kaniwatimawamɨkɨ 'ikɨ mawari wewiwamete kakaɨyarixi watukita memɨte'uximaya 'ena 'ɨkwa memutitaiya. 'Ahetsie teɨteri wa'umete pɨtitaiyarieni”».

3 Mɨkɨ tukaritsie kwitɨwa mɨkɨ tewi Kakaɨyari hetsɨa mieme 'inɨari kaniutaxata: «'Ikɨ 'inɨari kanihɨkɨtɨni Yawé mɨxeyetuirie: Mawari taiyame kanika'unimɨkɨ, meta naxiyari kanita'enixɨamɨkɨ».

4 Ti'aitame Keruwuhani 'u'enaka kemɨtikuxatakai mɨratimawatɨre Weteri muwekai hepaɨtsita tewi Kakaɨyari hetsɨa mieme, mawari taiyametsie 'akawetɨ yumama heutatseraka, mɨpaɨ kaniutayɨni: «Xekeneuwiya». Peru mamaya kɨmana tewi mu'itɨiyakai kaniu'auni, kayuawetɨ kanayani. 5 'Anari kwitɨwa mɨratimawatɨre kaniuka'une, naxiyari kaneuta'enixɨani, 'inɨari kemainekai paye'atɨarie, tewi Kakaɨyari hetsɨa mieme kemutayɨkai, Yawé yarehɨawekaku. 6 Hikɨ ti'aitame tewi Kakaɨyari hetsɨa mieme mɨpaɨ katiniutahɨawe:

—Yawé 'akakaɨyari keneutahɨawi. Nehetsiemieme keneutawawiri, 'aixɨa mɨyɨnikɨ nemama.

Hikɨ tewi Kakaɨyari hetsɨa mieme Yawé kaniutawawirieni, hikɨ ti'aitame mamaya 'axɨa kaniuyɨni, meripaitɨ kemɨ'anekai. 7 Kwitɨwata ti'aitame mɨpaɨ tewi Kakaɨyari hetsɨa mieme katiniutahɨawe:

—Hikɨmɨ nekie tepuhu, pepɨrekwani meta tixaɨtɨ nepɨmereyetuirieni 'imikieri.

8 Peru tewi Kakaɨyari hetsɨa mieme, mɨpaɨ ti'aitame katiniuta'eiya:

—Tsepa 'apiinite hixɨata ti'akame pemɨnetiyetuiri, nepɨkaheuyeiwe 'akie. Ne 'ena paa nepɨkatakwani meta nepɨka'anuhareni, 9 Yawé mɨpaɨ mɨneretahɨawixɨkɨ: “Paa pepɨkahekwaka meta pepɨkahehareka, metatsiere kemɨ'ane huye'utɨa pemetɨa mɨkɨ 'utɨa pepɨka'akununuwani”.

10 Hikɨ xeime pɨta huye'utɨa kaneyani, kemɨ'ane 'utɨa 'umietɨ mɨkanua Weteri.

11 'Anatsie xewitɨ mana Weteri pukatei Kakaɨyari niukameyatɨtɨ 'ukiratsitɨtɨri. Niwemama mekatenitaxatɨani naime mɨkɨ tewi Kakaɨyari hetsɨa mieme kemɨtiuyuriekai mɨkɨ tukaritsie, meta ti'aitame kemɨtiutahɨawekai. 12 Wapaapa mɨpaɨ katiniwaruta'iwawiya:

—¿Kereumiekai?

Niwemama mekatenitaxatɨani tewi kemɨreumiekai Kura yeyaka mana munuakai, 13 hikɨ wapaapa mɨpaɨ katiniwaruta'aitɨani:

—Puxu xekenenetixiratɨiri, nemanuyerɨnikɨ.

Kepauka puxu manutixiratɨarie, Kakaɨyari niukameya 'ukiratsi kananutiyerɨni, 14 hikɨ kaneyani tewi Kakaɨyari hetsɨa mieme 'utɨa. Kaneitaxeiya xiu hetɨa hetikaime, hikɨ mɨpaɨ katinita'iwawiya:

—¿'Ekɨ petihɨkɨ tewi Kakaɨyari hetsɨa mieme, Kura kwieyaritsie pemeyetɨa?

Mɨkɨ mɨpaɨ kaniutayɨni:

—Huu, ne nepɨhɨkɨ.

15 Hikɨ Kakaɨyari niukameya 'ukiratsi mɨpaɨ katinitahɨawe:

—Hikɨmɨ nekie tepɨtehekwani.

16 Tewi Kakaɨyari hetsɨa mieme mɨpaɨ katinitahɨawe:

—Hawaikɨ nepɨkayɨwe nemakunuani 'a'utɨma, meta nepɨkayɨwe paa nemetakwani meta haa nemanuhareni 'ena 'ahamatɨa, 17 Yawé mɨpaɨ pɨnerahɨawekai: “Paa pepɨkahekwaka meta mana pepɨkahehareka, meta kemɨ'ane huyeta pemɨyemie mɨkɨ 'utɨa pepɨkahakununuwani”.

18 'Ukiratsi tawari mɨpaɨ katinitahɨawe:

—Netatsiere Kakaɨyari niukameya nekanihɨkɨtɨni 'ahepaɨ. Neuxei xewitɨ niuki tuayame Yawé heiyenɨ'aku, mɨpaɨ pɨneretahɨawixɨ: “'Akie kenanuwitɨki mɨrekwanikɨ meta manuharenikɨ”.

Mɨpaɨ pɨti'itai, 19 tewi Kakaɨyari hetsɨa mieme kaniukunuani hamatɨana kaneyani, kiena katiniukwani meta kananuhareni. 20 Mana 'akuxi me'utitekaku mexatsie, Yawé niukieya kaninuani Kakaɨyari niukameya 'ukiratsi hetsie mikunuitɨatsie. 21 Hikɨ Kakaɨyari niukameya tewi Kakaɨyari hetsɨa mieme katiniutaxatɨani Kura kwieyaritsie meyeyakai:

—Yawé mɨpaɨ kanaineni: “Yawé niukieya pepɨka'anu'eni, pepɨkaraye'atɨa Yawé 'akakaɨyari kemɨmatiutahɨawixɨ. 22 Pekaniukunuani pemɨtikwanikɨ pemanutiharenikɨ hakewa mɨkɨ matsihemaiwe'erikatsitɨa. 'Ayumieme, pɨkakateukieni 'akaxari, 'a'ukiyarima memuyehetsie”.

23 Kepauka tewi Kakaɨyari hetsɨa mieme mɨtiutahayewaxɨ tikwatɨ 'anuhareka, 'ukiratsi Kakaɨyari niukameya puxu kanitixiratɨirieni, 24 hikɨ kaneyani tewi Kakaɨyari hetsɨa mieme huyeta. Perutsɨ maye kanenukunake kanimieni huyeta kanihɨani. Matsi puxuya meta maye 'auriena mekaniyuhayewa kaxarieya 'aurie. 25 Mana kaxarieya me'uxeiyaka meta maye 'ihɨkame, mana memuyekɨkakai kiekaritsie mekateniutaxata 'ukiratsi Kakaɨyari niukameya manukatei.

26 Kepauka Kakaɨyari niukameya mɨtiutamari mikunuitɨa huyeta, mɨpaɨ kaniutayɨni: «Mɨkɨ tewi Kakaɨyari hetsɨa mieme Yawé niukieya mɨka'anu'eni kanihɨkɨtɨni, 'ayumieme Yawé kaniyetuani maye mitaxutsinikɨ meta mimienikɨ, mɨpaɨ katinaye'ani Yawé kemɨtitahɨawixɨ».

27 Hikɨ Kakaɨyari niukameya mɨpaɨ katiniwarutahɨawe yuniwema: «Nepuxu xekenetixiratɨa». Kepauka memikuha'aritɨa, 28 Kakaɨyari niukameya kaneyani, hikɨ kaneitaxeiya kaxari huyeta hekaikame, puxuya 'auriena meta maye 'auriena. Maye pɨka'itakwaiwekai kaxari meta puxu 'atsipɨka'uyuri. 29 Hikɨ 'ukiratsi Kakaɨyari niukameya, tewi Kakaɨyari hetsɨa mieme kaxarieya kananukukweni, puxutsie heitihɨaka kanei'ikata tawari kiekaritsie paitɨ, manapaitɨ hiwerika memɨwewienikɨ hetsiena mieme meta memikateukukɨ. 30 Hikɨ 'arike kanika'awieta yuteukiyapa, meta hiwerika mepuwewi hetsiena mieme, mɨpaɨ mete'uhiwatɨ: «Xɨa'ui, ta'iwatɨkai».

31 'Arikeke me'ikateukuka, Kakaɨyari niukameya yuniwema mɨpaɨ katiniwarutahɨawe: «Neta kepauka nemukumawere, hakewa temeikate tewi Kakaɨyari hetsɨa mieme muwatsiere xepɨnetsiheukateni, ne'umeyari muwatsiere xepeukatuani hamatɨana. 32 Karikɨ yurikɨ kanaye'atɨariemɨkɨ niukieya, Yawé niukieya 'enietɨ kemutayɨ, mɨratimawatɨre Weteri mieme hepaɨtsita meta yaxeikɨa naitsarie kakaɨyarixi watukite muwetɨka hɨritsie Tsamariya kiekariteyaritsie wahetsiemieme».

33 Mɨyatiuyɨkutɨtɨ, Keruwuhani pɨkatiuhayewaxɨ 'axatiyurienetɨ, matsi pɨta tawari mawari wewiwamete kaniwaranuka'uitɨani tsepa kemɨ'ane tewi kakaɨyarixi memɨte'atimawiyarɨwa miemete memakɨnekɨ. Kemɨ'ane mawari wewiwame meuyeimɨkɨkai mɨkɨ tukiteta, mɨkɨ pɨwaranuka'uitɨwakai. 34 Mɨkɨ Keruwuhani mɨyatiyurienekaku yunaitɨ tɨɨriyamama 'axameteyurietɨ mepakɨ, meta mɨkɨ tiuyurieku yunaitɨ mekaniukwini, nixewitɨ pɨka'uyuhayewaxɨ 'ena kwiepa.

<- 1 Te'aitamete 121 Te'aitamete 14 ->