1 Kemɨtiuyɨ 21

Rawiri kuyaxi kemɨtiwaruti'inɨataxɨ

(1Kem 21:1-17 – 2Tsam 24:1-17)

1 Merikɨte kauyumarie 'ixaheritsixi waraye'unietɨ kanayani Rawiri kaniuyuitɨani kuyaxi mɨwati'inɨatakɨ. 2 'Ayumieme Rawiri Kuhawi mɨpaɨ katiniuta'aitɨani, meta teɨteri memanuyetei:

―Xekenehu kuyaxi xekeniwareti'inɨata Weritsewa xe'itsutɨame 'atsita Rani meye'atɨkaime, yanemɨretimanikɨ keyupaɨmetɨ memɨyɨwawe kuyakɨ memɨnete'uximayatsiriekakɨ.

3 Kuhawi mɨpaɨ katinita'eiya:

―Matsi Yawé kewarutimɨiriya xeitsienituyari mexɨa 'ateɨterima. Mɨkɨrikɨ yunaitɨ mepɨ'ateɨterima, ¿peru ketitayarikuta 'akuxi petimaimɨkɨ ketemɨtapaɨme, ti'aitame? Mɨya pemɨtiyurimɨkɨ 'ateɨterima 'ixaheritsixi 'axapewaruyurieni xeikɨa.

4 Matsi ti'aitame niukieya kananu'enierieni keyuri Kuhawi, hikɨ 'ayumieme kanayeyani naitsarie 'Ixaheri kwieyaritsie. 'Ariketa kanakunuani Kerutsareme, 5 hikɨ 'ana Rawiri katiniyetuirieni keyupaɨmeme muwaraka'utɨakai kuyaxi: 'Ixaheri kwieyaritsie xeimiyuniyari heimana xeitsienituyari miriyari (1.100.000) mepɨyupaɨmekai, meta Kura kwieyaritsie kiekatari nauka tsienituyari heimana haika tewiyari heimana tamamata miriyari (470.000) mepɨyupaɨmekai. 6 Peru Kuhawi Rewi nuiwarimama pɨkawaruti'inɨataxɨ meta Wenikamini nuiwarimama, Kuhawi hepaɨtsita 'axamɨ'anekaikɨ mɨkɨ ti'aitame 'aitsikaya. 7 Metatsiere Kakaɨyari hepaɨtsita mɨkɨ 'aitsika 'axapɨ'anekai, 'ayumieme 'ixaheritsixi 'axapuwaruyuri.

8 Hikɨ Rawiri Kakaɨyari mɨpaɨ katiniutahɨawe: «Yemekɨ waɨkawa 'axanepɨtiuyuri 'ikɨ kuyaxi nemɨwaruti'inɨataxɨkɨ. Mɨka'uka'iyari hepaɨ nepɨtiuyuri. Nepɨmatsiwawirie kwerietɨ netineuyehɨwiri ne ti'a'uximayatsiriwame».

9 Yawé Kahari mɨpaɨ katiniutahɨawe yuniukame, Rawiri hetsiemieme mɨti'uximayakai: 10 «Kenemie Rawiri mɨpaɨ ketinetahɨawi, Yawé mɨpaɨ kanaineni: “Nepɨmatsipitɨa xeime pemanayexeiyakɨ 'ikɨ haikame 'uximatɨarikate. Yakenetineutahɨawi ke'aneme nepɨmatsipitɨani”».

11 Hikɨ Kahari Rawiri hetsɨa kaneyani mɨpaɨ katineitahɨawe:

―Yawé mɨpaɨ kanaineni: “'Ikɨ mɨhaika ke'aneme pepɨnakierie: 12 haika wiyari haakaxa, nutsu haika metseri memɨxe'aye'unie mepɨxekwitɨweni 'ixiparakɨ, nutsu haika tukari kwiniya pɨtaweni meta niuki tuayame Yawé hetsɨa mieme pɨxekwika naitsarie 'Ixaheri kwieyaritsie”. Keneutimaixɨa yanetineutahɨawi neta yanemɨreitahɨawekɨ kemɨ'ane mɨnetsiheyenɨ'a.

13 Rawiri Kahari mɨpaɨ katiniuta'eiya:

―Yemekɨ 'atsinepɨkatiyumaiwe ke'aneme nemanayexeiya. Matsi 'aixɨa pɨ'ane Yawé mɨnetsi'uximatɨanikɨ, naki'eriyaya mɨmariwekɨ, 'aixɨa pɨka'ane teɨteri xɨka menetsi'u'uximatɨani.

14 Yawé, 'ayumieme 'Ixaheri kwieyaritsie kwiniya kanenɨ'ani, 'ana haika tewiyari heimana tamamata miriyari (70.000) mekaniukwini 'ixaheritsixi. 15 Meta Kerutsareme kiekariyaritsie yuniuki tuayame kanenɨ'ani mana kiekatari mɨwakwinikɨ. Hikɨ Yawé kepauka mixei wakwineme, kemɨtiwakwinitɨakai pɨwarutinenimayataxɨ, hikɨ niuki tuayame mɨpaɨ katiniutahɨawe: «'Ariri. Ketineuhayewa 'ari». 'Ana yemekɨ, niuki tuayame Yawé hetsɨa mieme 'Uxinahani kewutseu tewiyari tɨriku matihenatsie kaniuwekaitɨni.

16 Rawiri kepauka manukunierixɨ, 'ana niuki tuayame Yawé hetsɨa mieme kaniuxeiya wapaitɨ 'uyewiekame, yu'ixipara Kerutsareme hepa heutatserakame. Hikɨ 'ana Rawiri meta 'ukirawetsixi hiwerika kamixayari me'anakatɨtɨkaitɨ mekaniukahɨxima'uni kwiepa. 17 Hikɨ Rawiri Kakaɨyari mɨpaɨ katiniutahɨawe: «Yawé pemɨnekakaɨyari, ne nepɨtiuyuri nemɨtiuta'aitaxɨ memɨti'inɨatsienikɨ teɨteri. Mɨkɨ teɨteri 'atsimepɨkate'uyuri. Nepɨta nekanihɨkɨtɨni 'axanemɨtiuyuri. Nepɨta netineukwinitɨa meta netɨɨriyama, 'ariri 'ateɨterima pepɨkawakwika».

Rawiri mawari wewiwame kemɨtiutawewi

(1Kem 21:18-26 – 2Tsam 24:18-25)

18 Merikɨte niuki tuayame Yawé hetsɨa mieme Kahari mɨpaɨ katiniutahɨawe: «Rawiri mɨpaɨ ketinetahɨawi tenutsari mawari wewiwame Yawé hetsiemieme pɨtawewieni 'Uxinahani kewutseu tewiyari tɨriku matihenatsie». 19 Hikɨ Rawiri mana kaneyani mɨraye'atɨanikɨ, Kahari kemɨtitahɨawekai Yawé hetsiemieme.

20 'Uxinahani tɨriku mana pu'unekai, kepauka ta'aurie manakunierixɨ niuki tuayame kaniuxeiya. Meyunaukatɨ niwemama hamatɨana memu'uwakai mekaniutinautsa mekaniuyuti'awieta. 21 Kepauka 'Uxinahani Rawiri muxei kwieya makuma hepa 'amiekame, hepana kanayeyani 'enunakeke, hikɨ hɨxiena kaniukahɨximakeni. 22 Hikɨ Rawiri mɨpaɨ katinitahɨawe:

―'Ikɨ 'akwie yayeume keneneutuiri, mana mawari wewiwame Yawé hetsiemieme nemɨtawewienikɨ, mɨtihayewakɨ kwiniya tatsikwitɨ teɨteri. Keneneutuiri yemekɨ kemɨraye'axe.

23 'Uxinahani Rawiri mɨpaɨ katiniutahɨawe:

―Neti'aitɨwame, ne nekamanimimɨkɨ, 'ekɨ mana kemɨmatinake yaketineuyuri. Ne tuurutsixi kwietsanamete nekaniwayetɨamɨkɨ mawari taiyariyari pemɨwarayeitɨanikɨ, meta kɨyexi tɨriku 'uwame nepɨyetuani kɨmana pematinainikɨ meta tɨriku hatsi mawariyari pemayeitɨanikɨ. Ne mɨkɨ tinaime nekametinimikwani.

24 Peru ti'aitame Rawiri 'Uxinahani mɨpaɨ katiniutahɨawe:

―Hawaikɨ mɨpaɨ 'aixɨa pɨka'ane. Yawé nepɨkatiyetuirieni tita mɨti'apiini, meta mawari taiyariyari nepɨka'iwewirieni nekarayukatuame. Naimekɨ nekatinayukatuamɨkɨ kepaɨmemetsie mɨti'axe.

25 Rawiri 'Uxinahani huru tuminiyari 'ataxewime tsienituyari kaniu'ɨitɨani mɨkɨ kwiekɨ. 26 Mana kanitawewieni mawari wewiwame Yawé hetsiemieme, mana mawari taiyariyari kaniuwewieni meta memɨyuxewinikɨ mawariyari. Hikɨ Rawiri kaniuyutanenewieni, 'ana Yawé Kakaɨyari kanita'eiya mɨkɨ mawari hetsie tai kaneyenɨ'ani muyuawitsie mieme.

27 Hikɨ Yawé yuniuki tuayame katiniutaxatɨani, mɨkɨ yu'ixipara muka'utakɨ. 28 Rawiri 'uniereka Yawé menu'eniekaikɨ, mana mawari kaniwewirieni. 29 'Ana 'ixuriki tukiyari Yawé hetsiemieme meta mawari taiyariyari wewiwame Muitsexi mitiwewiekai makumawetsie, Kawahuni paitɨ pɨreku'ukai. 30 Peru Rawiri waɨkawa heumatɨ Yawé pɨkaheku'iwawiyaxɨ mana, niuki tuayame Yawé hetsɨa mieme 'ixiparaya muxeikɨ.

<- 1 Kemɨtiuyɨ 20 1 Kemɨtiuyɨ 22 ->