1 Pa pou nou, O SENYÈ, pa pou nou,

men [a]pou Non Ou glwa bay,

akoz lanmou dous Ou, akoz verite Ou.

2 Poukisa nasyon yo ta di:

[b]“Kote Bondye yo a ye koulye a?”

3 Men [c]Bondye nou an nan syèl yo.

Li fè sa Li pito.

4 Zidòl yo se ajan ak lò, [d]zèv men a lòm.

5 Yo gen bouch, men yo [e]pa kab pale.

Yo gen zye, men yo pa kab wè.

6 Yo gen zòrèy, men yo pa kab tande.

Yo gen nen, men yo pa kab santi anyen.

7 Yo gen men, men yo pa kab manyen.

Yo gen pye, men yo pa kab mache.

Nanpwen okenn bri ki sòti nan gòj yo.

8 [f]Sila ki mete konfyans nan yo va tankou yo.

Wi, tankou tout moun ki fè yo konfyans yo.

9 O Israël, mete konfyans ou nan SENYÈ a!

Se Li menm ki [g]sekou ak boukliye yo.

10 O lakay [h]Aaron, mete konfyans ou nan SENYÈ a;

Se Li menm ki sekou ak boukliye yo.

11 Nou menm ki [i]gen lakrent SENYÈ a,

mete konfyans nou nan SENYÈ a.

Se Li menm ki sekou yo ak boukliye yo.

12 SENYÈ a [j]te toujou sonje nou.

Li va beni nou.

Li va beni lakay Israël la.

Li va beni lakay Aaron an.

13 Li va beni sila ki krent SENYÈ yo,

[k]piti kon gran.

14 Ke SENYÈ a kab [l]fè nou grandi plis,

nou menm ak pitit nou yo.

15 Ke nou ta vin beni pa SENYÈ a,

[m]Kreyatè syèl la ak tè a.

16 Syèl yo se [n]Syèl SENYÈ a,

Men latè, Li te bay li a fis a lòm yo.

17 [o]Mò yo pa louwe SENYÈ a,

ni sila ki desann antre nan silans yo.

18 Men nou va beni SENYÈ a,

soti nan moman sa a e rive jis pou tout tan.

Louwe SENYÈ la!

<- Sòm Yo 114Sòm Yo 116 ->