1 Rapwoche, O nasyon yo pou tande!

Koute, o pèp yo!

[a]Kite latè ak tout sa ki ladann tande,

e lemonn ak tout sa ki ladann.

2 Paske [b]gwo kòlè SENYÈ a kont tout nasyon yo

e jijman Li brile kont tout lame yo.

Li te detwi yo nèt.

Li te donnen yo a yon gwo masak.

3 Konsa, mò yo va [c]jete deyò.

Kadav yo va fè movèz odè,

e mòn yo va tranpe ak san yo.

4 Tout lame syèl la va vin efase.

[d]Syèl la va woule monte tankou yon woulo liv;

e tout lame li yo va vin fennen nèt,

tankou yon fèy ta fennen sou branch chan rezen an,

oswa jan li deseche tonbe sou yon pye fig.

5 Paske [e]nepe Mwen bwe ase nan syèl la.

Gade byen, li va desann pou jije Édom

ak pèp ke Mwen te chwazi pou destriksyon yo.

6 Nepe SENYÈ a plen ak san.

Li kouvri ak grès, ak san jenn mouton,

ak bouk yo, ak grès a ren belye.

Paske SENYÈ a gen yon sakrifis nan [f]Botsra,

ak yon gwo masak nan peyi Édom.

7 Anplis, bèf mawon va desann ak yo,

ak jenn towo, ak towo pwisan yo.

Konsa, peyi yo va [g]tranpe ak san,

e pousyè yo va vin gra ak grès.

8 Paske SENYÈ a gen yon jou vanjans,

yon ane vanjans pou koz a Sion an.

9 Sous dlo li yo va devni goudwon

e tè pousyè li kon [h]souf.

Peyi li va tounen goudwon k ap brile.

10 Li p ap etenn ni lajounen, ni lannwit.

[i]Lafimen li va monte jis pou tout tan.

De jenerasyon an jenerasyon, li va dezole.

Okenn moun p ap pase ladann

pou tout tan e pou tout tan.

11 Men [j]grangozye ak ti bèt atè a va vin posede li

e ibou ak kònèy a va demere ladann.

Li va tann sou li lign latwoublay,

ak fil a plon vid la.

12 Yo va rele prens li yo a wayòm nan,

men[k]p ap gen k ap parèt.

Tout prens li yo p ap anyen.

13 Pikan yo va pouse nan gwo fò li yo,

chadwon ak gwo raje nan [l]gwo vil ranfòse yo.

L ap devni yon kote frekante pa chen mawon.

Li va fè kay tribinal pou otrich la.

14 [m]Bèt dezè yo va fè reyinyon ak lou yo;

kabrit sovaj ak gwo plim va kriye anvè parèy li.

Wi, gwo bèt lannwit va vin rete la;

l ap twouve pou kont li yon kote pou l ka repoze.

15 La, koulèv pyebwa a va fè nich li pou ponn ze;

li va kale yo e ranmase yo anba pwotèj li.

Menm [n]bèt malfini yo va rankontre la,

yo chak ak pwòp parèy yo.

16 Chache nan liv SENYÈ a, epi li:

Nanpwen youn nan sila yo ki p ap la;

okenn p ap manke parèy yo.

Paske [o]bouch Mwen te pase lòd,

e Lespri Li te ranmase yo.

17 Li te [p]tire osò pou yo,

e se men L ki separe bay yo selon lign mezi a.

Yo va posede kote a jis pou tout tan.

De jenerasyon an jenerasyon, yo va abite ladann.