1 Ipare asepia ambuae Tũpa rembiguai ɨva pendar ipĩratá vahe ogüeyɨse ɨva sui ou mbahe pɨ̃tu pãhuve; ahe ñaca rese arco iris oyere tuprɨ. Sova sendɨ́ avɨye arɨ, setɨma evocoiyase ndoyavɨi tata rendɨgüer opũha tuprɨ vahe. 2 Cuachiarmi oyemboi vahe vɨreco opove. Opɨ oacato cotɨndar pɨpe opɨ̃ro para guasu rese, ambuae opɨve evocoiyase opɨ̃ro ɨvɨ rese. 3 Evocoiyase sãse pĩratá, inungar yagua pɨ̃ta rãse; sãsese, evocoiyase siete tuprɨ osunu vahe ñehe oyendu yuvɨreco. 4 Oñehepase, ahese iñehe che aicuachiara viña; asendu rumo ɨva sui ñehesa aipo ehi vahe: “Eremboyecuai rene acoi siete tuprɨ osunu vahe ñehe, ndereicuachiai chietera” ehi cheu.

5 Evocoiyase Tũpa rembiguai asepia vahecuer, ahe acoi opɨ̃ro vahe para guasu rese, ɨvɨ rese avei opo oacato cotɨndar omopuha ɨva cotɨ. 6 Ichui Tũpa ndopai vahe rer pɨpe evocoi oyapo vahe ɨva, ɨvɨ, para guasu iyavei opacatu mbahe ipor reseve, omoingatu oñehe aipo ehi: “Nasarosa iri chietera; 7 oyepotase rumo imoñuvɨrío ovasa Tũpa rembiguai upe güemimbɨ moñehe ãgua, ahese imboavɨyesara Tũpa remimbotar yɨpɨndar ndicuasai vahe, ahe acoi omombehu vahe güembiguai oñehe mombehusar upe aracahe” ehi.

8 Ñehesa asendu vahe ɨva sui oñehe iri cheu aipo ehi: “Eso, tereipɨsɨ cuachiarmi imboiprɨ Tũpa rembiguai vɨreco vahe evocoi opɨ̃ro vahe para guasu rese ohã, ɨvɨ rese avei no” ehi. 9 Evocoiyase aso Tũpa rembiguai upe, aporandu cuachiarmi rese, ahese ahe aipo ehi cheu: “Ndo co, eipɨsɨ, ehu. Nde yuru pɨpe evocoiyase sẽhera eirɨ nungar, nde avɨterve rumo irora” ehi cheu.

10 Ahese aipɨsɨ cuachiarmi cute Tũpa rembiguai sui, ipare ahu; yɨpɨndar sẽhé che yuru pɨpe inungar eirɨ, amocopase rumo, che avɨterve iró cheu. 11 Evocoiyase aipo ehi yuvɨreco cheu: “Nde ereñehe irira Tũpa aipo ehi vahe rese ambuae-ae tecua pɨpendar rese, ɨvɨ rupindar rese, ambuae-ae iñehe vahe rese, mborerecuar rese avei no” ehi.

<- APOCALIPSIS 9APOCALIPSIS 11 ->