1 Pascua pieta renonde Jesús oicua ité oharɨ yepota co ɨvɨ reya ãgua oso vaherã Vu pɨri. Ahe osaɨsu vahe ité ava oyeupendar co ɨvɨ pɨpe yepi. Ẽgüe ehi saɨsu arɨ ipa vahe rupi.

2-4 Caruguar oique ité Simón rahɨr, Judas Iscariote, pɨha pɨpe imondo ãgua yamotarẽhɨmbar uve. Jesús rumo oicua ité Vu Tũpa sui ousa, oicua avei oyevɨ iri ãgua Vu Tũpa pɨri iyavei Tu omondo opacatu omborerecuasa chupe. Sese ocaruse güemimbohe eta reseve, mesa sui opũha, osequɨi oturucuar yohasa. Ipare omonde ambuae turucuar vumbɨcuasa rese. 5 Evocoiyase omondo ɨ yepoisa rɨru pɨpe, oyosei güemimbohe pɨ, omombiru turucuar vumbɨcuasa rese vɨreco vahe pɨpe oico.

6 Ichui Simón Pedro pɨ oyosei potase, ahe aipo ehi chupe:

—Che Yar, ¿nde co ereyoseira che pɨ? —ehi chupe.

7 —Nde rumo nderesenducuai mbahe che rembiapo cũritei. Ipare rumo eresenducuara —ehi Pedro upe.

8 Pedro rumo aipo ehi chupe:

—¡Che pɨ rumo ndereyosei chietera! —ehi.

—Ndayoseise rumo nde pɨ, ndahei chietera evocoiyase che rupindar ereico —ehi Pedro upe.

9 Pedro evocoiyase aipo ehi:

—¡Che Yar, aní catu che pɨ año ereyosei; eyosei che po, che rova avei! —ehi chupe.

10 —Acoi oyasupa ramo vahe rumo, ahe ndiquɨhai eté. Sese ndiyai oyasu iri. Ipɨ güeraño rumo iya yoseisa. Ẽgüe peye ndipoi eté mbahe pe rese; ndaopacatui rumo ẽgüe peye —ehi.

11 Ahe aipo ehi: “Ndaopacatui rumo ẽgüe peye” ehi. Esepia, oicua ité uma omondora yamotarẽhɨmbar upe.

12 Güemimbohe pɨ sei pare, omonde iri oturucuar yohasa, oguapɨ mesave aipo ehi:

—¿Peicua vo co mbahe ayapo vahe pẽu? —ehi—. 13 Pe niha, “Ore mbohesar, ore Yar” peye cheu. Supi eté niha. Esepia, ahe ité che aico. 14 Yepe supi eté, che pe mbohesar, pe Yar avei aico viña, ayosei rumo pe pɨ. Sese pe avei ñepei-pei peyacatu peyosei aveira pe pɨ. 15 Che niha ‘na tehi avei yuvɨreco’ viya opombohe pe rereco, ẽgüe ahe pẽu. 16 Supi eté aipo ahe pẽu: ava mbiguai tẽi, ahe ndahei ɨvate catu güerecuar sui; ẽgüe ehi avei imbouprɨ ndahei ɨvate catu secoi ombousar sui. 17 Pesenducuase co nungar mbahe, peyapo tuprɨse, ahese pevɨharete catura peico —ehi.

18 “Che nañehei opacatu pe rese, che rumo aicua uma yuvɨrecoi vahe che rembiporavo. Icuachiaprɨ rumo yavɨyera: ‘Acoi ocaru vahe che pɨri, oyemboyere che amotarẽhɨ’ ehi vahe. 19 Senondeve amombehu pẽu. Evocoiyase ẽgüe ehise ité cheu, che reroyara peye che ité niha aipo ahe vahe vichico. 20 Supi eté aipo ahe pẽu: acoi che remimondo oipɨsɨ tuprɨ vahe, ahe che pɨsɨ tuprɨ avei; acoi ava che pɨsɨ vahe, oipɨsɨ tuprɨ avei che Ru yuvɨreco” ehi.

21 Aipo ohe pare, Jesús ndoyembovɨhai eté iyavei mbahe oime vaherã omboyecua tuprɨ ité,

—Supi eté aipo ahe pẽu: ñepei pe pãhu pendar che mondora che amotarẽhɨmbar upe —ehi.

22 Evocoiyase ore oromahe-mahe tẽi oreyese, “¿Ava upe pĩha aipo ehi?” orohe tẽi oreyeupe. 23 Che sembiaɨsu catu yɨ́pɨve acaru vĩte. 24 Ipare Pedro oyaitɨ-itɨ ‘¿Ava upe vo aipo ere? tehi chupe’ oyapave cheu. 25 Evocoiyase che asɨrɨ catu irimi yɨ́pɨve, aporandu chupe:

—Che Yar, ¿ava ité vo? —ahe.

26 Ahe aipo ehi cheu:

—Cũritei amoaquɨra pan rahɨcuer imondo tohu, ahe ité che mondora —ehi cheu.

Aipo ohe pare omoaquɨ pan rahɨcuer imondo Simón Iscariote rahɨr, Judas, upe. 27 Judas oipɨsɨse pan, oguapɨ voi eté Caruguar sese. Evocoiyase aipo ehi Judas upe:

—Evocoi ereyapo pota vahe, eyapo voiño ité ru —ehi chupe.

28 Que ñepei rumo mesave orocaru vahe, ndorosenducuai eté aipo ihesa. 29 Esepia, Judas guarepochi rɨru rãrosar secoi yepi. Sese amove ore pãhu pendar ipɨhañemoñeta: “ ‘Tererocua mbahe pietase nara’ anise, ‘emondo mbahe ava iparaɨsu vahe upe nara’ aipo oya revo omose imondo” ehi yuvɨreco chupe viña.

30 Pan pɨsɨ pare, Judas osẽ voi eté oso pɨ̃tuse.

31 Judas sẽ pare, Jesús aipo ehi:

—Cũritei oyecuara che, Ava Rɨquehɨr, reco porañetesa. Che Ru Tũpa reco porañetesa avei oyecuara che rese. 32 Acoi amboyecuase che Ru Tũpa reco porañetesa, ahe avei omboyecuara che reco porañetesa, ẽgüe ehira imboyecua pɨhaivi. 33 Che rahɨreta, che rembiaɨsu, ndaico pucu iri chira pe rese. Che reca tẽira peye; inungar acoi judío rerecuar upe aipo ahe: “Ndiyai chietera peso che sosave” ahe. 34 Sese co amondo porocuaita ipɨasu vahe pẽu ñepei-pei peyeaɨsu ãgua inungar che opoaɨsu. 35 Peyeaɨsuse ñepei-pei, opacatu tuprɨ ité ava oicuara yuvɨreco che remimbohe supi eté pe recosa —ehi.

36 Pedro oporandu Jesús upe:

—Che Yar, ¿que vo aipo eresora? —ehi chupe.

Ahese omboyevɨ Pedro upe:

—Cũritei ndiyai peso vaherã che sosave che rupi; pesorera rumo che rupi curi —ehi.

37 —Che Yar, ¿mahera ru cũritei voi ndiyai nde rupi che so ãgua? ¡Ayemoingatu ité amano vaherã nde rese! —ehi Pedro chupe.

38 —¿Supi eté pĩha ereyemoingatu ité che rese nde mano ãgua? Nde rumo cõhe potase tacura ñehe renondeve, mbosapɨ oyupagüer rupi, “Ndaicuai eté co mbɨa” erera cheu —ehi Pedro upe.

<- SAN JUAN 12SAN JUAN 14 ->