SAN JUAN

1 Che, icuaiprɨ, aicuachía co che ñehe ndeu, che mborɨpar, che rembiaɨsu, Gayo. Che supi eté oroaɨsu yepi.

2 Che rembiaɨsu, che rɨvrɨ, cũritei nde recocuer erereco tuprɨ Tũpa rese. Che ayeroquɨ nde rese opacatu nde reco tuprɨ ãgua iyavei tipo eme mbaherasɨsa ndeu. 3 Che avɨharete asenduse yande rɨvrɨ ñehe nde recocuer resendar yugüeruse cohave. Ahe aipo ehi yuvɨreco cheu: “Evocoi Gayo oyemovɨracua tuprɨ mbahe supi eté vahe pɨpe” ehi yuvɨreco ndeu. 4 Ndipoi eté niha ambuae ñehesa asendu vahe che mbovɨharete catu vahe que che rahɨreta oguatase co porombohesa supi eté vahe rupi yuvɨreco.

5 Che rɨvrɨ, che rembiaɨsu, ereyapo tuprɨ opacatu mbahe yande rɨvɨreta upe iyavei ambuae tecua pendar oyepota vahe upe avei. 6 Ahe omombehu ore ñemonuhasave opacatu nde poroaɨsusa resendar yuvɨreco oreu. Eyapo catu mbahe icatuprɨ vahe; eipɨ̃tɨvɨi catu chupe mbahe ipane vahe rese iguataño ãgua Tũpa remimbotar rupi yuvɨreco. 7 Esepia, ahe oguata yuvɨreco Jesucristo rer pɨpe. Ndoipɨsɨi eté rumo mbahe ipane vahe opɨ̃tɨvɨi ãgua yuvɨreco ava Tũpa reroyasarẽhɨ sui. 8 Sese yande ẽgüe yahera yaico evocoi nungar upe ñehesa supi eté vahe rese ipɨ̃tɨvɨi ãgua.

9 Che aicuachía che ñehe eipeve Tũpa upe oñemonuha vahe upe cuese. Diótrefes rumo ndovɨroyai ore mborerecuasa. Esepia, ahe oipota rai mborerecuar güeco ãgua ipãhuve. 10 Evocoiyase asose eipeve, amboaracuara opacatu Tũpa vɨroya vahe rovai sembiapo ai rese. Esepia, ahe oñehe-ñehe tẽi ore rese, ndahei ahe güeraño, ndoipɨsɨ potai avei güẽtave yande rɨvɨreta oyepota vahe. Iyavei ndoipotai ambuae upe ipɨsɨ ãgua sẽtave. Acoi oipɨsɨse, omombo voiño ité ñemonuhasa sui. 11 Che rɨvrɨ, che rembiaɨsu, ereicoi rene evocoi ava recocuer nungar. Ereicora rumo ava avɨye vahe recocuer rupi. Esepia, oyapo vahe mbahe avɨye vahe, ahe Tũpa suindar. Acoi oyapo vahe rumo mbahe naporai vahe, ahe ndoicuai vahe Tũpa.

12 Opacatu, “Demetrio avɨye ité” ehi yuvɨreco. Ahe supi eté aipo ehi; aipo avei ore oromombehu. Pe niha peicuaño ore oromombehu mbahe supi eté vahe.

13 Che niha amombehu pota setá mbahe ndeu. Namombehu potai rumo cuachiar pɨpe tẽi ndeu. 14 Esepia, aso pota ité nde repia. Ahese voi yañemoñetara oyeovai eté.

15 Eico tuprɨ. Yande mborɨpar coha pendar omondo omahenduhasa yuvɨreco ndeu. Iyavei, eyapo mbahe icatuprɨ vahe, emombehu nde teieté che mahenduhasa ñepei-pei yande mborɨpareta upe eipeve. Aipo rupive.