ማቶስ 5

የሱስ ገቸንዘን ዶቅሶ ኤስሳን ኤስና

(ማቶ. 5፡1—7፡29)

1 የሱስ ይም ጎርስምድባብ በድ ዎርሰንም ይ ሰዳንደትካ፥ ገቼንዘን ዉትሶ ዶቅሴ፥ ክታ ካርንካ ጎርስምድባብከሰረ ክደር Ꮊደኬ። 2 ኩን ጋየሮ ከትም ኤስስ የጄ፥

ዶፈን አንጀንም Ꮊብድን ኤድንከስ

(ሉቃ. 6፡20-23)

3 “ጭላ ባንችምና ከታ ማቻንኦል አያናር ዶቅንተካ፥

“ሳብም ዝገሮ ዎቸርድባብከስ ኬታ አንጅምስባብከሰኬ”።

4 ሳብ ከትካንታ ዳቅንተን እምድንካንታ ሞርእድባብከስ

አንጅምስባብከሰኬ።[a]

5 ይንታ ማተን ይርክሳ ይድባብከስ ሳብ ከትካንታ ግግሳን ፍጨን ተይድባብ አንጅምስባብከሰኬ። [b]

6 ጭለትችን ዳቀርድባብከስኬ ዎቸርድባብከስ ከት ምዝድንካንታ፥

አንጅምስባብከሰኬ።[c]

7 አብንከስካንታ አጨርድባብ አንጅምስባበኬ፥ Ꮊረታ ጋይሴ ሳብ ከትካንታ አጨርድንኦሌ።

8 ቡዳ ጭለጭልንከስ አንጅምስባብኬ፥ ሳብም ሰተረኬ።

9 ኤድምዝድባብከስ አንጅምስባብከሰኬ፥

ሳብታ ይንች ጋይምደኬ።

10 ጭለትቼንጎካ ዳየርምድባብከስ፥ ጭላ ባንችምና ከትካንታ ማቻንኦል፥

አንጅምስባብከሰኬ።[d]

11 “እጎካ ኤድንከስ የም የግድንከኬ የም ዳያ ኦንግድንካ፥ ዳቅልንም ማልትካ የንታዘን ኬዝድንካ አንጅምስባበቴ። [e] 12 ጭላር የᎺብድን ናክና የካንታ አንድር ኮት ማቻን ኦል የም ጉርምሳ፥ አንድር ጉርመረ ይከቴ። ኤና የንታ እረረ Ꮊቅባብ ሳብዘንካ ኤሰርሶ ከዛቅባብከዘን ኮትኮግንዳ ዳይርምንከ ማጠንም የልስተኬ።” [f]

ሶቅተኬ ሳክመንታ ካምስ

(ማር. 9፡50፤ ሉቃ. 14፡34-35)

13 ኮታዘንከረ የሱስ፥ “የታ ፍጨዘን ሶቅንግንደቴ፥ ኬዛርንካ ማቼ ሶቅ ሎቅክሳ ነገዴ ና ካርንካ Ꮊስግንዶክ ሎቅካንታ ማዳ? ኦስ ማል ኦይትምሶ ኤታ ዱትያር ሙክምዘንካ አብ ኦስ እር Ꮊራርካንተረ መያዬ። [g]

14 “የታ ኮ ፍጫሙደንታ ሳክመቴ፥ ገቼዘን ዶቅድን ካተመና አችምካንታ ማዳክዬ። [h] 15 ኤድንከስ ዞጰን ዞጵስትዮ ኤሄናር ዶቅድባብ ሙደንካንታ ሳግድንግንዳ ጬክን ጋይሳን ካርዘን ዎደክ ዳት ዞጰን ዳሄታ ዋር ዎዳክዬ። [i] 16 ኮትኮግንደረ ኤድንከስ የንታ ኡርማ ፍክስን ሰድሰኮ ጭላር የንታ ባቤንም ከት ጋለድንግንዳ፥ የንታ ሳክመነረ ኤታ እሪ ሳካ” ኩን ጋይሴ። [j]

ሙሴካንታ እምምሳን ህግንጎካ

17 ጉጅሰረ የሱስ “ሙሴታ ህግንምኬ ሳብዘንካ ኤሰርሶ ኬዛቅባብከስታ ኤስስን ነግስካንታ እ Ꮊዳንዳ የንደር Ꮊይካማ፥ ከት ቦድምድንግንዳ ይስካንታ እታ Ꮊዳት ዳት ነክስካንታ Ꮊዳክቴ”። 18 ዶፈን የም ጋይድቴ፥ ጭለኬ ፍጨካ ስገተርን የለልታ ሙሴታ ህግና ሙዳ ቦድምተር ዳት ህግናርንካ ዋልቃ ፍደል አነረ ዋልቃ ጩት ዎራ ነጋዬ። [k] 19 ኮካንታ ከትከ ክተንከሳርንካ መራ ማቻን ዋልቀን ዎራ ዉልእድባብኬ አብ ኤድንከሰረ ኮትኮግንዳ ከት ይድንግንዳ ኤስዝድን ኤድ ጭላ ባንቺምናር መራ ጋይምተሬ። ኬዛርንካ ማቼ ክተነከስም ሙዳ ቦድባብኬ አብ ኤድንከሰረ ኮትኮግንዳ ከት ቦድንግንዳ ኤስዝድባብ ኤድ ጭላ ባንችማር አንድር ጋይምተሬ። 20 ኮካንታ የንታ ጭለትችና ሙሴታ ህግን ኤስዝድባብከዘንኬ ፈረሳውያን ኤድንከስታ ጭለትችንዘንካ ስጋክንዳ ማቼ ቦድሶ ጭላ ባንችማር የ አርዳክንደትም እታ የካንታ ኬዝድቴ።

ዋጭጎካ የሱሰዘንካ እምምሳን ኤስስ

21 “ኤና እሪ Ꮊቃን ኤድንከስካንታ ጋየርሳንደትም የታ ኤሰርተቴ፥ ኮነረ፥ ‘ኤድም Ꮊይ ደይሴ፥ ኤድም ደይስባብ ፋረድምዴ’ ጋይድንዴ”።[l] 22 እታ ማቼ የም ጋይድቴ፥ ይንታ እስመንዘን ዋጭድባብ ሙደና ፋረድምዴ፥ አነረ ይንታ እስመንም የና መይዳክባብ! ጋይሶ የግድባብ ሙደንዘን አይሁድንታ ቡጫ ጋልተንከስ ክታዘን ፋረተረኬ፥ ቱንይ! ጋይሶ የግድባብ ሙደና ድግዳክን ኖሄካ ፋረድምዴ። 23 “ኮካንታ የና የስታ እመንም ሳብታ ኤሄናር ካሰርድን ካርዘን ሳብካንታ የስ እምድን Ꮊይካ፥ የዘን ይምኤርስባብ እስመና ዶቅድንደትም የስም ገቀርሴ፥ 24 የስታ እመንም ካስ ካርንታ እሪ ዎድሰዮ አይካ፥ እርምሳዮ ክትኮ የስታ እስመንካ ክክን ኤድምካ፥ ኮታ ቡር ማትሳዮ የስታ እመንም እምካ። 25 የስታ ይምኤንባብ የስም ካሰስንካ ክትካ ክክን ፍርድ ኤሀር አያዶቅዳዮ ጎግዘን ሳነካ የስታ ይምኤእንባብካ ክክን ኤእካ። ኩን ማታክንዳ ማቼ የስታ ይምኤንባብ ዳይነንካንታ፥ ዳይነነረ ዞግድባብካንታ ስክስት እምሳንደታ ቡር ዞክና ኤሀር ዞከርዳዬ። 26 ዶፈን የስም ጋይድቴ፥ የስታዘን ፋረጃን በእንታ ሳንትምን ናክት የስ በይስተርን የለልታ ቦድሰረ ኮታርንካ ዉዳካዬ” ኩን ጋይሴ።

ቤልምንጎካ እምምሳን ኤስስ

27 “ ‘Ꮊይበልመቴ!’ ጋይምሳንደትም የታ ኤሰርተቴ። [m] 28 እታ ማቼ የም ጋይድቴ ‘ማነም ሰድሶ አንገርስባብ ሙደና፥ ኮትᎺይካ ይንታ ቡዳር ኮትካ ክክን ቤልምቴ’ ጋይድቴ። 29 የስታ ምዝ አፍና ጎመታ ጎግ ኮት ማዴ፥ ዉችተዮ ዛእካ! የስታ ኤደትቸና ሙደና ድግዳክን ኖሄናር ኦይትምተርንዘንካ የስታ ኤደትቸናርንካ ዋልቀና ካይደስናና የስካንታ ኡርሜ። [n] 30 የስታ ምዝ አንና ጎመታ ጎግ ኮት ማዴ፥ ተችት ዛእካ! የስታ ኤደትች ሙደና ድግዳክን ኖሄናር ኦይትምተርንዘንካ የስታ ኤደትቸናርንካ ዋልቀና ካይደስናና የስካንታ ኡርሜ”።[o]

ማነም ቡልጎካ እምምሳን ኤስስ

(ማቶ. 19፡9፤ ማር. 10፡11-12፤ ሉቃ. 16፡18)

31 “ይንታ ኬነንም ቡልድባብ ሙደና ኮት ቡልምሳንደታ ማርካትች ዋርቀትን ኮትካንታ እምማ” ጋይምቴ። [p] 32 እታ ማቼ የም ጋይድቴ፥ “ቤልምንጎካ ማታክንዳ ማቼ፥ ይንታ ኬነንም ቡልድባብ ሙደና ኮት ቤልምድንግንዳ ይዴ፥ ቡልምሳንደትመረ እንጅድባብ ሙደና ቤልምባብ ማዴ።” [q]

ጫቃጎካ እምምሳን ኤስስ

33 ጉጅሰረ ኤና እሪ ኤድንከስካንታ “ካርከካ Ꮊይ ጫቀቴ፥ ኬዛርንካ ማቼ የንታ ጫቀንም ጮይስካንታ ቦድከቴ” ጋይምሳንደትም ኤሰርተቴ። [r] 34 እታ ማቼ “ቦድሰረ Ꮊይ ጫቀቴ” የም ጋይድቴ። ጭለና ሳብታ ዶቅንት ጎንጋ ኮት ማቻንካንታ፥ ጭለከረ Ꮊይ ጫቀተ፥ [s] 35 ፍጨነረ ጮይስታ ዱትንታ ዎእንትንዳ ኮት ማቻንካንታ ፍጨከረ Ꮊይ ጫቀቴ፥ አንድር ባንችንታ ካተማ ኮት ማቻንኦል የሩሳሌም ካተመንከረ Ꮊይ ጫቀቴ፥ [t] 36 የስታ ማተናርንካ ዋልቀን ዎራ ጫምሳ አነረ ጫልም ማስካንታ የስ ማዳክንካንታ የስታ ማተንከረ Ꮊይ ጫቄ። 37 ኮካንታ የንታ ኬዘና “ይያ” ማቼ “ይያ” አነረ “ዋአ” ማቼ “ዋአ” ማታ። ኮዘንካ ስግዳንዳ ዳቅልንዘንኬ። [u]

ይምኤር ዝግዝዳክንደትም እምሳን ኤስስ

(ሉቃ. 6፡29-30)

38 “ ‘አፍታ ካርያር አፍ፥ አችታ ካርያር አች’ ጋይምሳንደትም ኤሰርተቴ። [v] 39 እታ ማቼ ዳቅልን የንዘን ይድባብ ኤድንዘን Ꮊይ ይምኤርቴ። ኬዛርንካ ማቼ ምዝ የስታ ከቼንም ጫቅድባብካንታ የስታ ከች ከቼንም ክትካንታ ስርስካ። 40 ዋልቃ ኤድ የስታ ሳምዝንም ተይካንታ ዝግሶ የስም ክት ካሰሴ፥ የስታ ኮትንም ክት ተይድንግንዳ ዛእካ። 41 ዋልቃ ኤድ ‘እንካ ክክን ቶክም ጎግ አይካ’ ጋይሶ የስም ማእሴ፥ የና ማቼ ኮታዘን ኮትከካ ጎግ ክትካ ክክን አይካ። 42 የዝደር ምግዝድባብካንታ እምካ፥ የዝደር ታልቃ ዝግድባብካንታ ዋይዬ Ꮊይ ጋዬ”። [w]

ይምኤንባብም ሶልማጎካ እምሳን ኤስስ

(ሉቃ. 6፡27-36)

43 ኮታዘንከረ የሱስ፥ “ ‘የስታ ላኮይትን ሶልምካ፥ የስታ ይምኤንባብም ግርካ’ ጋይምሳንደትም ኤሰርተቴ። [x] 44 እታ ማቼ የንታ ይምኤንባብከስም ሶልምከቴ፥ የም ባድባብከስም አንጅከቴ፥ የም ግርድባብከስካንታ ኡርማ ይከቴ፥ ዳቅልን የንዘን ይድባብከስካንተከ የም ዳይድባብከስካንታ ምክስከቴ” እታ የም ጋይድቴ ኩን ጋይሴ። [y] 45 ኮም የ ይዴ፥ ጭለናር ዶቅድን የንታ ባቤንታ የታ ይንች ማተረቴ። ኖ ዳቅልንከስካንተኬ ኡርመንከስካንታ Ꮊይንም ዉችዝዴ፥ ኮትኮግንደረ ጭልንከስካንተኬ ጎመንባብከስካንታ ዶብንም ቃንዝዴ። 46 የም ሶልምድባብከስም Ꮊክ የ ሶልምደ Ꮊራ ናክ የንታ ዶቅዳ? ቃረጭን ተችዝድባብከስ ኮትኮም ይደክ ካዮ? 47 የንታ እስመንከስካንታ Ꮊክ አቦ የ ጋይድንዳ ማቼ Ꮊረንት ስገዳን ሪ ይዳ? አይሁድ ማታክባብከስ ኮትኮም ይደክካዮ? 48 ኮካንታ ጭለናር የንታ ባቤና ቦድማ ማቻንግንዳ የተረ ቦድማ ማትከቴ። [z]

<- ማቶስ 4 ማቶስ 6 ->