Naomi ana dedevina iibabane tetelina
4
(Ruti 4:1-22)
Boasa Ruti iitatete tetelina
1 E kina go Boasayana ituko ina asa ana kaba siu goi itusobu. Aba siuyana moe idi kaba tugúguna. Iitusobu go, totateta manuna boi Ruti bogina ilaatuwoko, e igite iiketoiya imamaima. Tuwo iduduwe idigo kana,
‘Toi, kūma ameko goi kutusōbu.’
Tuwo tauyana ima itusobu. 2 E Boasa asa ana tolovinayao ana badabada yawou iduduwedi sima ilatuwokoidi situsobu, bei idi tugúguna sitaiyakeke. 3 E Boasa totatetayana ilatuwoko idigo kana,
‘Naomi bogina Moabe goi ikaluvilamna ima go, tauyana latuwona osiyada kaamasina Elimaleka ina poyapoya ana tagona ibisilave. 4 Yau anuwonúwana dedevina kom kuyagoi. Neta poyapoyayana latuwom kutatete, e tolovina ame matadi goi kutatēte. Ago geya, kulatuwokoigu bei ayagoi. Geya kada tayaamo koroto mana lovina geya; kom tauna amta kuulovina. Yau sobuyekoim.’
‘Bei atatete’, toi kaena.
5 Go kina Boasayana idigo kana,
‘Tutayana poyapoyayana ana tagona kukabi Naomi yaina, e Ruti, tauyana kóbuya guma Moabe, nakae bei kukabi kunai, e bei tokámasa yoina ikaaiyaka be nakae ina kaiguyauyana ikaaiyaka ina nunu sinaena.’
6 Go kina totatetayana idigo kana,
‘Neta moe nakae, guna lovina akaidamane yaim. Yau geya itoboineguta Ruti anai, govila bei natugowo idi dalowo giyaina. Tauna kom toinim kutatēte go, yau geya latuwogu.’
7 Ego boi nimatu Isileli tubunao idi katótula ana sinapu osenao adi tateta be kónana adi talamapu manudi ame nakae: Koroto tayamo ana sendoro ivalilivi go, siyana ivini.†Atu 25:9. Moe nakae poyapoya ana kaidámana o lovina ana kaidámana bogina sikatotule.
8 Tuwo tutayana totatetayana idigo kana, ‘Kom toinim kutatēte’, e ana sendoro ivalilivi go, Boasa ivini. 9 E Boasayana koroto gagaidi be tomota madabokidi matadi goi idigo kana,
‘Ame komi toinimi matami goi bogina kogite bego yau Elimaleka, Maloni be Kiliyoni konadi madabokidi Naomi yaina goi akabidi. 10 Aiyuwoina Ruti guma Moabe, tauyana Maloni kobuina, anai. Moe bego tokamasayana ina kaiguyau ikaaiyaka ina nunu sinaena. Nakae ana katumapu bei ibíbina, e yoina geya itagauta. ¿Ame komi bogina kogite?’†Atu 25:5-6.
11 Koroto gagaidi be tomota liliudi aba siuyana goi sikaaiyaka kadi,
‘U, bogina kagite.’
E tuwo sikaodedevine sidigo kadi,
‘Ame vavinayana giyakainava bei kunai, bei kina Yauwe ivaite bego ivenátuna nakae Reitiyeli be Reya sivenátuna; tauyadi natudiyao badabadaidi kai Isileli tubunao manuma.‡Reya be Reitiyeli be nakae idi pakonayao Bila be Siripa sivenátuna, natudiyao badabadaidi (Abv 29:31—30:24). Bei esaesa kubabane im nunu Eparati sinaena. E nakae bei Bedeliyema goi tomota liliudi yoim siiyagoi. 12 Bei Yauwe natumowo ivinim vavinayana yaina, e bei im nunu gagaina nakae Peresi‡Peresi: Peresi be Boasa adi nunu tayamo (Rut 4:18-22). ina nunu gagaina, tauyana Yuda be Temari natudi.’ †Abv 38:27-30.
13 Tuwo moitamo Boasa Ruti†Mad 1:5. sinai go, Yauwe ina vaita goi ikéuwama, namliyeta ivenátuna, natuna koroto. 14 Vevina sidigo kadi,
‘¡Yauwe tayapalīye! Tauyana tubum ivinim am totateta bei imatakavatem. Bei Yauwe ina guinuwa goi gomanayana yoina gagaina Isileli sinaena. 15 Yaom imatakoiyem be nakae ivaitem gagaina. Neta kom natumowo koroto ainima aiyuwo, geya adi kaipatamo sivaitem nakae yaom ivaitem. E ame tutayana tubum ivinim; tauyana bei yawoim ilisi tutayana kwainamoya.’
16 Tuwo Naomi ibala ina gomanayana ikabi, ivayavau, e imatakavate. 17 Vevina tomota liliudi yaidi sidigo kadi,
‘Ame tutayana Naomi ma tubuna.’
Ago gomanayana sivayou Obedi; tauyana nava bei natuna Diyesi. Nava bei Diyesi natuna Devida.‡Devida: Ame tauyana moe tolovina gagaina Yaubada ikinave.
Devida ina nunu
18 Tuwo Peresiyana ina nunu ame nakae:
Peresi natuna moe Esironi.
19 Esironi natuna moe Ram.
Ram natuna moe Aminadabi.
20 Aminadabi natuna moe Nakasoni.
Nakasoni natuna moe Salimoni.
21 Salimoni natuna moe Boasa.
Boasa natuna moe Obedi.
22 Obedi natuna moe Diyesi.
Diyesi natuna moe Devida.
<- RUTI 3