25
Livalakaibala Yaubada ina kalibúbuna
ina sowóduwo manuna: Wowoiyai yawou
ina sowóduwo manuna: Wowoiyai yawou
1 Yeisu tuwaina idigo kana,
‘E tuwo Tomalatomota ina kaluvilamna goi Yaubada ina kalibúbuna ina sowóduwo bei tétala ame nakae:
Wowoiyai adi badabada yawou sikaaiyaka. Idi rampa sikabidi,†Luk 12:35. sisowóduwo sina bego tonai koroto sivalobode. 2 E wowoiyaiyadi yawou yaidi goi adi tainima yaaluwoidi go, adi tainima tonanamsa. 3 Adi tainima yaaluwoidi idi rampa sikabidi go, rampa ana pútuma tuwaina geya sikabiyeta. 4 E kidi go ituli ta woiyai adi tainima tutayana idi rampa sikabidi, e pútuma ma bootoridi taiyao sikabidi simedi. Tauna kidi tonanamsa. 5 E sima tonaiyana situuyaosi go, tauyana ikaimúmuna, tauna simatadududu, e simasisi.
6 E bunatoina goi níyana gagaina sinove iduduwo kana,
“Tonai koroto goame! Kosowōduwo kōma tauyana kovalobōde.”
7 E tuwo amo wowoiyaiyadi liliudi sitaoya idi rampa sikatubayasidi. 8 E kidi yaluwoidiyadi geya idi putumamo. Tauna tonanamsa silatuwokoidi sidigo kadi,
“Ima rampa sikamakámasa, tauna imi pútuma giyaina kovinīma.”
9 Go kidi tonanamsayadi sidigo kadi,
“Kai ima pútuma giyaina bogina yoiyama, tauna geya itoboinemeta kavinimi, go sem kōna tokaigimona yaidi toinimi imi pútuma kogimōna.”
10 E tuwo moitamo yaluwoidiyadi sitaoya sina bego idi pútuma sigimona. Sinonoina go, tonaiyana koroto ima, e wowoiyaiyadi bogina sikatuubayasi tonai taiyao sina nai aikanina goi sisiu. Sisiu ikavava, totom sikatunibode.
11 E niga wowoiyai yaluwoidiyadi nakae sima totom goi sidigo kadi,
“Tomoya, Tomoya, totom kwatupāeve kasiu!”†Luk 13:25.
12 Go kina tonaiyana kana,
“Moe latuwomi go, ame alatuuwokoimi konōve: Komi geya ayagoimita.”
13 E tauna matami silala koyauyāusa. Moitamo. Komi geya koyagoiyeta ava maliyalina o ava níyala Tomalatomota bei ima.’
Livalakaibala Yeisu ina kaluvilamna manuna
be nakae Tomoya ina pakonayao idi guinuwa manuna
be nakae Tomoya ina pakonayao idi guinuwa manuna
(Luke 19:11-27)
14 Tuwaina Yeisu kana,
‘Moitamo koyāusa. Imi yausayana goi imi sinapu itoboine ame livalakaibalayana nakae:
Koroto tayamo latuwona ina ituli ta kasa. Tuwo ina pakonayao iduduwedi sima ina esaesa ivinidi sirugwausidi. 15 Sima go, tamo tamo idi toboine goi ina esaesa ikaiguyauyedi bei siepaisewedi. Tayamo moe mani 5,000‡Mani 5,000: Ame mani gagaina toina. Da Giriki niyadi ame yoina talenti. Talenti tayamo nakae koroto ana maisa ikabi neta ipaisewa tala ana badabada 16. ivini. E aiyuwoina moe mani 2,000 ivini. E aitonina moe mani 1,000 ivini. Ikaiguyau ikavava, itaoya ina ituli ta kasa. 16 Pakoninayana boi mani 5,000 ivinivini ikabidi ina ivaituwedi. Ina vaituwoyana goi mani 5,000 tuwaina ibabanedi. 17 Pakoninayana boi mani 2,000 ivinivini nakae. Maniyadi ikabidi ina ivaituwedi. Ina vaituwoyana goi mani 2,000 tuwaina ibabanedi. 18 E kina go pakoninayana boi mani 1,000 ivinivini, ikabidi ina poyapoya ieli, e ina tomoya ina maniyadi ivamoudi.
19 E tuta maanawena mlina pakonidiyadi idi tomoya ikaluvilamna ima go, iduduwedi sima ilumadadedi idigo kana,
“Guna mani nakonakae kovaituwedi?”
20 Tuwo pakoninayana boi mani 5,000 iikabidi ibala ima maniyadi 5,000 go, 5,000 tuwaina ivini kana,
“Tomoya, boi mainao 5,000 kuvinigu go, kugīte, avaituwedi. Guna vaituwoyana moe 5,000 tuwaina.”
21 Ina tomoyayana idigo kana,
“Dedevina! Kom guna pákwana dedevim be nakae aba numisa. Bogina kuvatulukoigu itoboinegu konagu maniyedi giyaidi goi anumisem. Tauna bei avayokoim kom konagu maniyedi gagaidi adi tomatakavata. Kūma guna kaba uyáwana kusīuko.”
22 E pakoninayana aiyuwoina boi mani 2,000 iikabidi ibala ima idigo kana,
“Tomoya, boi mani 2,000 kuvinigu go, kugīte, avaituwedi. Guna vaituwoyana moe 2,000 tuwaina.”
23 Ina tomoyayana idigo kana,
“Dedevina! Kom guna pákwana dedevim be nakae aba numisa. Bogina kuvatulukoigu itoboinegu konagu maniyedi giyaidi goi anumisem. Tauna bei avayokoim kom konagu maniyedi gagaidi adi tomatakavata. Kūma guna kaba uyáwana kusīuko.”
24 E pakoninayana aitonina boi mani 1,000 bogina iikabidi nakae ibala ima idigo kana,
“Tomoya, bogina ayagoim bego kom koroto kasakasaim im guinuwa goi. Nakae ituli ta koroto ibágula go, ina dibayoya kom kukabi. Tauna ituli ta tomota idi paisewa goi kom im esaesa kubabane. 25 Tuwo amatoita im mani bei avatagauye, tuwo ana poyapoya goi im mani avamoudi. Kugīte, im mani goame; avinimneim.”
26 Go ina tomoyayana idigo kana,
“Kom guna pákwana goyogoyoim be suumoyaim! Kom bogina kuyagoigu bego ituli ta koroto ibágula go, ina dibayoya yau akabi. Tauna ituli ta tomota idi paisewa goi guna esaesa ababane. 27 Tauna neta boi mainao guna mani kukabi kuna tovaituwo maniyedi kuvinidi, e itoboinedi sivaituwedi. Niga akaluvila ama itoboinegu toinigu guna maniyana be ana vaituwo akabi.”
28 E tomoyayana ina pakonayao maniyedi ilatuwokoidi idigo kana,
“Mani 1,000 boi ame tauyana avinivini, e kokabīdi go, guna pakonayana maana mani 5,000 kovīni. 29 Avatauwa neta adi kaiguyau siepaaisewe, e tuwaina bei avinidi. Go avatauwa neta adi kaiguyau geya siepaiseweyeta, e moitamo aiguyauyana bei akuliuye.†Luk 19:26. 30 Tuwo pakoninayana suumoyaina kokābi kolāve ina moetala mamaníwana goi ikaaiyaka.†Mad 8:12, 22:13; Luk 13:28. Amoko goi bei sitaiya vata be nakae saladi sikakaavatedi simatamaimaita.” ’
Yeisu ina vatulúkwana
takínona ana tuta manuna
takínona ana tuta manuna
31 Tuwaina Yeisu kana,
‘E tutayana Tomalatomota ikaluvilamna ima anerose liliudi taiyao, e ana káeyana tomoeeyalina bei ivagitakoe†aMad 16:27. go, kebana esaaesaina aba taimámina goi bei itusobu ikalibúbuna.†bMad 19:28. 32 Ago boda liliuna bei ilamgogoidi matana goi itakinoidi boda aiyuwo nakae sipi ana tomatakavata neta sipi be goti itakinoidi boda aiyuwo. 33 Sipiyadi moe wowoina basekoina kakataina goi iyatoidi go, gotiyadi moe kekelina goi iyatoidi. 34 E tuwo tauyadi Tokalibúbuna kakataina goi bei ilatuwokoidi kana,
“Komi Tamagu bogina ikaipaakuyemi kōma ina kalibúbuna sinaena goi dogoi dedevidi boi ikatootuledi bei ivinimi. Dogoiyadi boi poyapoya ana kaba vatowo goi bogina ikatubayasidi manumi. 35 Ame moitamo. Boi loga akámasa go, kovakanigu. Maegu iyápasa go, kovanimgu. Yau ogaoga go, kouyaonegu. 36 Apawaku go, kwama kovalosigu. Akatówana go, komatakavategu. Deri goi akaaiyaka go, koma kovadadegu. Tauna komi kōma ina kalibúbuna goi kosīu.”
37 E tuwo kidi tokibóbwata bei sidigo kadi,
“Tomoya, ava tuta kagitem loga kwámasa go, kavakanim o maem iyápasa go, kavanimm? 38 E ava tuta kagitem kom ogaoga go, kauyaonem o kupawaku go, kwama kavalosim? 39 E ava tuta kagitem kom kukatówana o deri sinaena goi kwaaiyaka go, kao kavadadem?”
40 Go tokalibubunayana bei idigo kana,
“U, moe moitamo go, ame alatuuwokoimi konōve: Tutayana moe guinuwayadi koguuinuwedi siyagu tayamo yaina, nakona tauyana nuwotookaina, e moe nakae yau yaigu koguuinuwedi.”
41 E toogoyoidi kekelina goi iiyatoidi bei ilatuwokoidi kana,
“Komi Yaubada bogina itakinoimi toogoyoimi. Tauna kosiyaēgu kōna yeu aiyako vaatayaina! Yeuyana Yaubada bogina ikatubayasi Totagíwaya mana aneroseyao manudi. 42 Boi loga akámasa go, geya kovakaniguta. Maegu iyápasa go, geya kovanimguta. 43 Yau ogaoga go, geya kouyaoneguta. Apawaku go, kwama geya kovalosiguta. Akatówana be nakae deri goi akaaiyaka go, geya komatakavateguta. Tauna kosiyaēgu.”
44 Go kidi togoyoidiyadi nakae bei sidigo kadi,
“Go Tomoya, ava tuta kagitem loga kwámasa o maem iyápasa o kom ogaoga o kupawaku o kukatówana o deri goi kwaaiyaka go, geya kavaitemta?”
45 E tuwo kina bei idigo kana,
“U, moe moitamo go, ame alatuuwokoimi konōve: Tutayana amo guinuwayadi geya koguinuwedita kidi nuwotookaidi yaidi, e moe nakae yau yaigu geya koguinuwedita.”
46 Tuwo amo tauyadi bei sina aba liuna vaatayaina goi. Ego kidi tokibobwatayao bei sina yawoidi vaatayaina sibabane.’†Dan 12:2; Rom 2:7.
<- MADIU 24MADIU 26 ->