Diyuu adi tolovinao Yeisu sivaakaleye tetelina
11
(Madiu 11:1—13:52)
Yeisu ina talavaita Iyoni tosayóyova manuna
(Luke 7:18-35)
1 Yeisu kai ina tovatotowanayao yawou aiyuwo ivatulukoima ikavava, kai kana go, Tauyana asa amo ikalave ina Diyuu idi kasa‡Diyuu idi kasa: Ame nakona Galili sinaena. tamo tamo goi iivaníbita. Ina vanibitayana goi ivaatulúkwana be nakae Yaubada Valena itaalavaite tomota yaidi.
2 E kina go Iyoni deri goi ikaaiyaka go, Guyau ina guinuwa valena inove, tuwo ina tovatotowanayao ietunedi sima Yeisu yaina 3 silumadádana sidigo kadi,
‘Manakae? Kom Guyau Tauyam boi Yaubada ina tokabivalavalayao sikatotulem katuyaosim gea, ituli ta koroto nava katuuyaosi?’
4-5 Tuwo Yeisu idigo kana,
‘Segowo, kaga atalavaaitedi bogina konovedi be kaga aguuinuwedi bogina kogitedi. Guinuwayadi ame nakae: Tokebo sigita dókana, topem siketoiyamna, vísiya liliuna tomota sakavaidi sikavava, tauyadi taiyadi patupatudi sitaiyakeka dókana, tokámasa sitaoyamna, tookaidi Vala Dedevina sinove.†Ais 35:4-6, 61:1. Kōna moe dogoiyadi madabokidi kotalavaitēdi Iyoni yaina bei iyagoi. 6 Aiyuwoina Iyoni kolatuwōko avatauwa neta geya sinanayuwoita yau manugu, bei adi dedevina sibabane.’
7 E korotoyadi sitaoya sinonoina go, Iyoniyana manuna kina Yeisu ivatowo boda ilatuwokoidi idigo kana,
‘Boi kona yoyowo goi latuwomi bego avatau kogite? Gea, komi latuwomi bego koroto taameyaina kogite ina sinapu nakae dumodumo neta yágira itowo, iyaoegeege? 8 Nakae geya, go sem kona bego avatau kogite? Gea, komi latuwomi bego koroto tayamo mana kwama dedevina kogite? Geya ae? Konōve. Tauyadi madi kwama dedevidi tolovina idi vada dedevidi goi sikaaiyaka. 9 Tauna kona geya bego nakae kogite, go sem kona bego avatau kogite? Bego Yaubada ina tokabivalavala tayamo kogite? U, moitamo. Go ame alatuuwokoimi konōve: Tauyana tokabivalavala tayamo go, tokabivalavala kaka geya, go sem tauyana toosakina. 10 Amo tauyana manuna Yaubada ina tokabivalavala igini idigo kana,
“Gwa, guna lobutu ana tolokoina aetune ivakumgoiyem.†Tat 23:20.
Tauyana bei im kenao ikimavade.”
Malakai 3:1
11 Ame Iyoni iguinuwe go, ame alatuuwokoimi konōve: Tomota liliudi bogina sibíbina, yaidi goi geya vatau tayaamo itoboine Iyoni tosayóyova ikalisave. Go avatauwa neta toosobudi Yaubada ina kalibúbuna sinaena goi, e tauyadi Iyoni sikalisave.
12 E Iyoni tosayóyova ina paisewa ana kaba vatowo goi go, ima ame tuta Yaubada ina bodayauwo ikaliibubudi vakaleya gagaina toina siibabane. Ago adi tovakaleyayaoyadi sipoikíkina bego ina bodayauwoyadi siyoisidi siyogedegededi.†Luk 16:16. 13 Moitamo. Boi nimatu Yaubada ina tokabivalavalayao liliudi idi buki be nakae Mosese Yaubada ina Katukeda madabokina goi sitalavaita bego Guyau bei ima. Nakae sitaalavaite ana kadókana Iyoni ima Guyau ina sowóduwo italavaite. 14 Ago kidi tokabivalavalayadi sitalavaite bego koroto tayamo Eliyau nakae bei ima. Abóbwara moitamo, tauyana sidigedige moe Iyoniyana. Go manakae? Itoboinemi ame nuwonuwanayana konumise gea geya?†Mal 4:5; Mad 17:10-13; Mak 9:11-13; Luk 1:17; Iyo 1:21. 15 Avatauwa komi neta ma taaiyami, guna livala konoovedōko.†Mad 13:9,43; Mak 4:9,23, 7:16; Luk 8:8, 14:35; Nuw 2:7,11,17,29, 3:6,13,22.
16 E tomota amo tauyadi nakae kaga goi akatutukoidi? Kidi gogómana nakae neta aba maketi goi siitusobu sipapápala sediyao yaidi sikúluwo kadi,
17 “Ima kokopi nai manuna kauweuwe go,
komi geya kolauseta.
Valiwoga goi kataiyakuwokúwala go,
komi geya kotaiyeta.”
Komi nakae. 18 Kogita? Nakonakae kaguinuwe o kavatulúkwana, e komi kokataema. Iyoni ima go, awoinu toina geya ikakáika, nakae oine geya inimnim. Nakae go, komi kodigo kami,
“Dimoni tauyana sinaena goi ikaaiyaka!”
19 Tomalatomota ima ikakáika be inimnim go, kodigo kami,
“Tauyana kogite? Aikanina be nakae inim ginagina iiyaluwo. Tauyana takisi ana togogo be ituli ta toogoyoidi siyadi!”
Yaubada ina nanamsa Iyoni be yau kavatulúkwana go, nanamsayana ipaaisewa tomota yawoidi goi, e guinuwayadi goi tomota siyagoi Yaubada ina nanamsa moe moitamo.’
Yeisu tomota maniyedi ibowoidi idi goyo pasidi
(Luke 10:13-15)
20 E niga Yeisu ivatowo tomota asa maniyedi goi ibowoidi. Asayadi goi guinuwa toogagaidi bogina iguinuwedi. Guinuwayadi toni kasa sigitedi go, geya situgavileta, tauna ibowoidi idigo kana,
21 ‘Komi da Korasini be komi da Betesaida konovēgu! Da Taya be da Saidoni tomota goyogoyoidi. Neta guna guinuwa toogagaidi boi komi bogina koogitedi kidi nakae sigitedi, boi nimatu e, bogina situgavila go, idi tugavilayana ana kaba kinana siguinuwe moe kwama salisalina silosidi be selekau dabadi goi siyatoidi. Komi boi itoboinemi nakae kotugavila go, geya koguinuweyeta. O komi da Korasini be da Betesaida ami toovalugo!†Ais 23:1-18; Isi 26:1—28:26; Iyl 3:4-8; Emo 1:9-10; Sak 9:2-4. 22 Go ame alatuuwokoimi konōve: Komi da Korasini be da Betesaida takínona ana tuta goi ami liuna gagaina toina bei kobabane namliyeta kidi da Taya be da Saidoni.
23 Komi da Kapaneumi nakae. Manakae? Konuwonúwana Yaubada bei ikilagasimi yábana goi?†aAis 14:13-15. Moe geya, go sem bei ilavemi kosou kona asagabugabu goi! Moitamo. Kidi da Sodoma toogoyoidi toidi go, neta boi nimatu guna guinuwa toogagaidi sigitedi nakae guinuwa toogagaidi boi komi kogitedi, e tauyadi nakona situgavila, tauna Yaubada geya imtulidita, go sem nakona ame tuta asayana nava ikaaiyaka. Ago komi geya.†bAbv 19:24-28. 24 Go ame alatuuwokoimi konōve: Takínona ana tuta goi komi da Kapaneumi bei ami liuna gagaina namliyeta da Sodoma.’†Mad 10:15; Luk 10:12.
Yeisu ina kauyagu go, ina katótula waiwasi manuna
(Luke 10:21-22)
25 Tuta amo goi Yeisu ikawanoi idigo kana,
‘Tamagu, kom yábana be poyapoya idi Tomoya. Guna guinuwayadi adi yagoina bogina kuvamoudi kidi madi nanamsa be madi yagoina yaidi goi go, kidi gogómana nakae yaidi goi guna guinuwa adi yagoina bogina kukaiwoduwedi. Tauna ayapaliyem. 26 Moitamo Tamagu, moe im guinuwayana im nuwonúwana goi ivauyaonem.’
27 Ikawanoi ikavava, tomota yaidi goi idigo kana,
‘Kaga liliuna Tamagu nimagu goi bogina iyatoidi.†aIyo 3:35. Tamaguyana anetava yau Natuna iyagoidokoigu. Yau agutava Tamagu ayagoidoko go, avatauwa neta akinavedi bei Tamagu avatulukoidi, e bei siyagoidoko.†bIyo 1:18, 10:15.
28 Avatauwa komi topoisógana o mou adi tokavala,‡Topoisógana o mou adi tokavala: Ame mouyadi moe Yaubada ina Katukeda tomota sipoikíkina sikabikaone. komekōigu bei waiwasi avinimi. 29 Yau sakuululugu be nakae nuwotookaigu, tauna guna kaitakeo kokavalavaitēgu be nakae guna vatulúkwana kovatotowōne. Neta nakae koguinuwe, e imi waiwasi bei kobabane.†Yer 6:16. 30 Moe moitamo. Yau guna kaitakeoyana be nakae guna vatulukwanayana sikakapu. Tauna ameko goi imi waiwasi bei kobabane.’
<- MADIU 10MADIU 12 ->
- a Diyuu idi kasa: Ame nakona Galili sinaena.
†11:4-5 Ais 35:4-6, 61:1.
†11:14 Mal 4:5; Mad 17:10-13; Mak 9:11-13; Luk 1:17; Iyo 1:21.
†11:15 Mad 13:9,43; Mak 4:9,23, 7:16; Luk 8:8, 14:35; Nuw 2:7,11,17,29, 3:6,13,22.
†11:21 Ais 23:1-18; Isi 26:1—28:26; Iyl 3:4-8; Emo 1:9-10; Sak 9:2-4.
†a11:23 Ais 14:13-15.
- ~13~ Topoisógana o mou adi tokavala: Ame mouyadi moe Yaubada ina Katukeda tomota sipoikíkina sikabikaone.
†11:29 Yer 6:16.