LUKE 8

Vevina maniyedi Yeisu sisabookuliye tetelidi

1 Niga go Yeisu nakae asa tamo tamo gagaidi be giyaidi yaidi goi ivanibiníbita, Yaubada ina kalibúbuna Valena Dedevina itaalavaite bego tomota itoboinedi sisiu. Ago yawou aiyuwo 2 be vevina maniyedi taiyao sina. Vevinayadi yaidi goi boi Yeisu dimoni ivatapiyedi be nakae adi katówana goi ikidedevinedi. Vevinayadi ame nakae: Meri guma Magidara. Moe tauyana yaina goi Yeisu dimoni ana badabada ainima aiyuwo ivatapiyedi sisowóduwo. 3 Yoana taiyao. Tauyana Kudasi monena. Kudasiyana moe Erodi ana topaisewayao adi tovakumgo. Susana nakae be ituli ta vevina maniyedi. Ame tauyadi toinidi idi esaesa goi Yeisu mana bodao sivaaitedi.†

Kutukutu be poyapoya
tamo tamo adi livalakaibala

(Madiu 13:1-23; Maki 4:1-20)

4 E boda gagaina bogina sitaligógana simamaima; tauyadi asa badabadaidi goi sima Yeisu yaina. Tuwo livalakaibala goi ivatulukoidi idigo kana,

5 ‘Tobágula tayamo ina ina tánuwo goi witi kutukutuna isivagaegaedi. Isivagaaegaedi, e maniyedi sisou enao goi. Tuwo tomota siketoiya kutukutuyadi maniyedi sivakavatedi go, maniyedi, mánuwo sikanidi. 6 Ago kutukutuyadi maniyedi sisou manamanáiyala goi go, tutayana sitabo, simémala unana bwae geya. 7 Go kutukutuyadi maniyedi sisou taliboibo goi, e taiyao sitabo, sibíbina go, taliboiboyadi sididimatedi. 8 Go kutukutuyadi maniyedi sisou poyapoya dedevina goi sitabo, sibíbina, sikéuwo go, kutukutuyadi tamo tamo yaidi goi 100 sibabane.’

Moe livalayadi ibooboredi go, iduduwo idigo kana,

‘Avatauwa komi neta ma taaiyami, e guna livala konoovedōko!’†

9 E ina tovatotowanayao silumadade sidigo kadi,

‘Tomoya, im livalakaibala kaga ana yagoina?’

10 E Yeisu kana,

‘Yaubada nanamsa bogina ivinimi bei itoboinemi ina nuwogau ina kalibúbuna manuna koyagoi. Go tomota liliudi kaga liliuna livalakaibala goi sinovedimo. Moe bego tokabivalavala tayamo ina livala imalatomota, kana,

“Sigitagita go,

geya sigitadokoneta.

Sitaiiyakeka go,

geya siyagoiyeta.”

Aiseya 6:9-10

11 E guna livalakaibalayana ana talígava ame nakae: Kutukutuyadi moe Yaubada ina livala.

12 E kidi go kutukutuyadi sisou poyapoya enao goi moe nakae tomota maniyedi neta livalayana sinove namliyeta Totagíwaya ima livalayana nuwodi goi ikabi inave, govila bei sinumise, e adi yava sibabane.

13 E kidi go kutukutuyadi sisou poyapoya manamanáiyala goi moe nakae tomota maniyedi neta Yaubada ina livala sinove, madi uyáwana siuuyaone go, geya lamdimo. Tuta kaakupina sinumisa go, tutayana idi numisa pasina vakakona sibabane, sikapusi.

14 E kidi go kutukutuyadi taliboibo goi sisou moe nakae tomota maniyedi neta Yaubada ina livala sinove go, niga idi kaiyaka ana nuwokubukubu, esaesa be nakae poyapoya uyaonina taliboibo nakae livalayana sididimate, tauna keuwoidi geya simatuwoita.

15 E kidi go kutukutuyadi poyapoya dedevina goi sisou sitabo, moe nakae tomota maniyedi neta ma katedi dedevidi Yaubada ina livala sinovedoko, siyoisikavate be madi meesayágana sikeuwo dókana.’

Rampa ana livalakaibala

(Maki 4:21-25)

16 E Yeisu tuwaina ina vatulúkwana manuna ilatuwokoidi idigo kana,

‘Geya vatau tayaamo ina rampa igabu go, bayao goi ivatum o baseko ogalaoina goi ivaisiu geya, go sem rampa ana kaba yata yatana goi iyato bego tomota vada goi sisiusiu bei rampayana ina mavada sigite.† 17 Moitamo. Moe nakae yau guna sinapu livalakaibala goi. Kaga nakona vamoounina livalakaibala goi, bei avagitakoe. Kaga nakona nuuwogauna livalakaibala goi, bei akaiwoduwe bego koyagoi.† 18 Tauna korugwausīmi manakaemi guna livala konove bego kokabikaone.†a Ame moitamo. Avatauwa neta guna livala sinoovedoko, nanamsa tuwaina Yaubada bei ivinidi. Ago avatauwa neta livalayana sinooveyamo, ava nanamsa tauyadi sinuwonuwone ikaaiyaka yaidi, Yaubada bei ikuliuye.’†b

Yeisu sinana be senao toidi
moe ina livala ana tokabikawanayao

(Madiu 12:46-50; Maki 3:31-35)

19 E Yeisu sinana be senao sima latuwodi Tauyana go, boda pasidi geya itoboinedita sisiu sina Tauyana sinoko. 20 E tomota Yeisu silatuwoko kadi,

‘Sinam be semowo moetala goi siitaoya; latuwodi kom kunovedi.’

21 Go kina Yeisu idigo kana,

‘Sinagu be segowo moe avatauwa neta Yaubada ina livala sinovenove be sikabiikaone.’

Yeisu yágira be aivaya iloviinaedi tetelina

(Madiu 8:23-27; Maki 4:35-41)

22 E tuta tayamo Yeisu mana tovatotowanayao oga goi sisowoya, ilatuwokoidi idigo kana,

‘Galili Bwaena tayaodamāne tāna ta dadava.’

Tuwo sikailova. 23 E sinonoina go, Yeisu imasisi bogina ikanaamatáiya. Iimasisi go, ulibomatu gagaina ikalisou Bwaeyana goi itowo. Tuwo aivaya siseulalágata oga bogina sivakayaaodei, nakae ogayana giyakainava bei isalili sivailai. 24 E tauyadi sima Yeisu siwoini sidigo kadi,

‘Tomooya, tomooya, giyakainava bei tavailai!’

E tuwo itaoya, yágira be aivaya gagaidi ilovinaedi sisayata. Sisayata, e yagirayana ilakapuwe nakae Bwaeyana ikadaúmwara. 25 E Yeisu ilatuwokoidi idigo kana,

‘Imi numisa nako?’

E kidi madi matoita sikainaopa taudiva sibobóbwara kadi,

‘Iyaa! Ame ava koroto? Yágira be nakae aivaya ilovinaedi niyana sikabiikaone?’

Yeisu dimoni ivataapiyedi tetelina

(Madiu 8:28-34; Maki 5:1-20)

26 Moe ikavava, Yeisu kidi Galili Bwaena bogina siyaodamane go, sina da Gerasine idi kaolao goi sivaiu. Moe asayana Galili disitiriki ikaonako. 27 E sivaiu, Yeisu oga goi isou go, amo asayana korotoina tayamo naagovaina ima ivalobode. Tauyana tuta maanawena kwama geya ilosilosi geya, nakae vada goi geya ikaiyaketa geya, go sem valiwoga tukubu goi ikaaiyaka. 28-29 Tuta liliuna dimoniyana koroto ikiinagove. Tuwo tomota siyoisi, seni sikabi korotoyana nimana be aena siyowóidi. Ikavava, siiyause go, tuwo seniyadi ikiguyalidi. Ikiguyalidi, e kina dimoniyana ikinagove isiya ina yoyowo goi ikaaiyaka.

E tutayana Yeisu oga goi isou, korotoyana ikandoiwo Yeisu igite, tuwo ipodeda be nakae ima Yeisu matana goi aena ivatugúyala. Tuwo Yeisu dimoni ilovinae koroto goi bego isowóduwo go, kina korotoyana niyana gagaina goi idigo kana,

‘Yeisu, kom Yaubada Tokanayatanatoina Natuna, kai ima polava moe geya kom im polava geya. Akawanoi yaim bego geya kuyogedegedeguta.’

30 Go Yeisu idigo kana,

‘Kom yoim manakoyoina?’

Ego dimoni badabadaidi bogina sisiu korotoyana yaina, tauna tauyana kana,

‘Uwouwo.’

31 Tauyadi sikawanoi makimaki sidigo kadi,

‘Taabu kuloviinaēma ame dadavayana kakalave go, kasousou kana masi gagaina aba vailai‡ goi.’

32 Ego doyava koya goi bao badabadaidi sidumdumla. Tuwo dimoniyadi sikandobala bao sigitedi, sikawanoi makimaki Yeisu yaina sidigo kadi,

‘Neta kutagonēma kana dobala bao amo sinaedi goi kasiu.’

Tuwo moitamo itagonedi. 33 E dimoniyadi sitaoya koroto goi sisowóduwo sina bao sinaedi goi sisiu. Sisiu, baoyadi madabokidi sisaloku, silokoina sina koya tagatagagina goi sipela sisou sina Galili Bwaena goi sisalili. 34 E baoyadi adi tomatakavatayao sigite kaga iisowóduwo, sisiya sina asa gagaidi be giyaidi goi kaga kaga siisowóduwo sitalavaitedi. 35 E toni kasa sima latuwodi sigite kaga isowóduwo. Tuwo sima Yeisu yaina goi go, korotoyana sigite, Yeisu aena goi iitusobu. Tauyana boi naagovaina go, ame bogina mana kwama nakae nuwona imavada, tuwo simatoita. 36 E tomota boi mainao sigite kaga iisowóduwo, sivateteli tomota yaidi korotoyana boi naagovaina manakaena idedevina. 37 Da Gerasine liliudi nakae boda liliudi amo asayana kikina simatoita gagaina toina. Tauna Yeisu yaina sikawanoi sidigo kadi,

‘Kwalavēma kūna.’

E tuwo Yeisu kidi oga goi sisowoya bego sikaluvila sina ta dadava go, 38 korotoyana boi yaina goi dimoni sisowóduwo ima Yeisu yaina ikawanoi idigo kana,

‘Tomoya, manakae? Kutagona asabokuliyem?’

Go kina Yeisu ivalilive ina ina vada kana,

39 ‘Kwaluvīla kūna im kasa goi Yaubada ina guinuwa toogagaidi iguuinuwedi yaim kutalavaitēdi.’

Tuwo moitamo korotoyana itaoya ina asa ana madabokina goi Yeisu ina guinuwa toogagaidi tauyana yaina iguuinuwedi italavaaitedi.

Yeisu vevina adi taiyuwo ikidedeevinedi tetelina

(Madiu 9:18-26; Maki 5:21-43)

40 E tutayana Yeisu kidi sikailova sikaluvilamna sina ta dadava goi sivaiu go, boda Yeisu siuyaone. Bogina kuyagoi. Madabokidi Yeisu situuyaosi.

41-42 Ago koroto tayamo ima yoina Yairo. Moe tauyana Diyuu idi kaba tugúguna ana tolovina tayamo go, natuna vavina tayamo toito ana tala yawou aiyuwo nakae giyakainava bei ikámasa. E tauyana ima Yeisu matana goi aena ivatugúyala ikawanoi makimaki idigo kana,

‘Tomoya, neta kūma guna vada goi natugu kuvāite.’

Tuwo moitamo Yeisu itagona. Ego sinonoina, boda gagaina Tauyana sivatuvagivagigi. 43 Ago bodayadi yaidi goi vavina tayamo ikaaiyaka. Vavinayana tala yawou aiyuwo goi ikaikaina idaudau go, nava idaudau.‡ Ina doketa vaita manuna, e yaidi goi ina mani madabokina ilukavave go, geya kada tayaamo itoboine ikidedevine geya. 44 Tuwo ivalabelabena Yeisu mlina goi ibisibala ana kwama kikina ibisikone. Ibisikone, ikaikainayana ina dau mainao isayata. 45 Ago kina Yeisu idigo kana,

‘Avatau ibisikonegu?’

E boda liliudi silawoiwoi go, Pita idigo kana,

‘Tomoya, boda sitaoyaakobum be sivatuvagivaagigim go!’

46 ‘Tomota tayamo ibisikonegu. Yau togaga anamkone yaigu goi isowóduwo’, Yeisu kaena.

47 E vavinayana bogina iyagoi geya itoboineyeta bego ina guinuwa ivamou. Tuwo mana tátava ima Yeisu matana goi aena ivatugúyala go, tomota liliudi matadi goi italavaita kaga unana Yeisu ibisikone be manakaena mainao iboboina. 48 E Yeisuyana kana,

‘Natugu, im numisa bogina ikidedevinem! Kutāoya be mam tuboina kūna.’

49 Nava Yeisu ibobóbwara go, tomota tayamo tolovinayana ina vada goi ima Yairo ilatuwoko idigo kana,

‘Natum bogina ikámasa, tauna geya tuwaina tovatulúkwana kuuyobose.’

50 E kina go Yeisu lobutu ana tolokoina ina livala inove, Yairo ilatuwoko idigo kana,

‘Taabu kuumatōita. Kunumisegūmo go, natum bei iboboina.’

51 E Yeisu ivataoduwe tolovinayana ina vada goi go, boda liliudi isanabodedi geya sisiuta, go sem Pita, Iyoni, Yemesa, e gomanayana tamana be sinana aditava itagonedi taiyao sisiu. 52 Ego gomanayana manuna boda madabokidi sitaitáiya be nakae sitaiyamsimsi. E Yeisu ilatuwokoidi idigo kana,

‘Taabu kotaitāiya. Gomanayana geya ikamaseta, go sem ikanaamatáiya.’

53 Tuwo bodayadi siyagoi gómana bogina ikámasa, tauna Yeisu ina livalayana sinove, sivaanamae. 54 Go Yeisu ibala ina gomanayana nimana iyoisi, iduduwo idigo kana,

‘Gómana, kutāoya!’

55 Tuwo gomanayana balomaina ikaluvilamna ima, e gómana mainao itaoya. Ago Yeisu gómana sinana ilatuwoko idigo kana,

‘Gómana avana kuvīni ikáika.’

56 Tuwo gomanayana tamana be sinana sikainaopa. Go Yeisu ilatuwokoidi kana,

‘Moe dogoiyana taabu kotaalavāite tomota yaidi.’

<- LUKE 7 LUKE 9 ->