8
1 E iya go Yeisuyana kai ina tovatotowanayao taiyao kana Oribe Koyaina.
Vavina tayamo roerata pasina
Diyuu adi tolovinayao siyoyoisi tetelina
Diyuu adi tolovinayao siyoyoisi tetelina
2 E nobuyana nava matagougouna aiyuwoina Yeisu kai taiyao kakaluvila kana Vada Kimaasabaina ina kali goi kasiu. Ago boda liliudi simamaima Tauyana yaina, tuwo itusobu ivatulukoidi. 3 E ivatuulukoidi go, kidi Yaubada ina Katukeda ana tovatulukwanayao be Parisi vavina tayamo sime. Vavinayana irooerata go, sivaope. E sime bodayama matama goi sivatáoe go, 4 Yeisu silatuwoko sidigo kadi,
‘Tovatulúkwana, ame vavinayana irooerata sivaope. 5 E Yaubada ina Katukeda Mosese ivinivini ilovinaeda bego kidi vevina ame vavinayana nakae gurewa goi takaumatedi.†Vin 20:10; Atu 22:22-24. E tauna manakae kom im nuwonúwana? Kaga kaguinuwe?’
6 Go moe sidige bego Tauyana sikatutao, bei itoboinedi siwowoko. E iya go Yeisuyana isakululu kaukau nimakulemwasina goi ikaiginigínina. 7 E tauyadi siluumadade, tauna idumolágata ilatuwokoidi idigo kana,
‘Avatauwa komi neta geya ami goyomo, gurewa kokābi, kogimilāve vavinayana yaina goi.’
8 Ibóbwara ikavava, aiyuwoina isakululumna kaukauyana goi ikaiginigínina.
9 E kidi go totaiyakeka tamo tamo sivatowo Yeisu siikalave go, kidi tomoyamoya sigimina. Tuwo boda nauyayanaidi goi Tauyana be vavinayana aditava sikaaiyaka. 10 E Yeisu itotóyoma go, idigo kana,
‘Vavina, tauyadi nakoidi? Manakae? Geya vatau tayaamo itakinoim bego kom kukāmasa, ae?’
11 ‘U, Tomoya’, vavinayana kaena.
E Yeisu idigo kana,
‘Yau nakae, geya atakinoimta bego kukāmasa. Kūna go, geya tuwaina goyo kuguuinūwe.’]‡Livala ana talígava Iyoni 7:53 goi kugīte.
Yeisu be Diyuu idi kaumakimaki tetelina
12 E niga aiyuwoina Yeisu Vada Kimaasabaina ina kali goi tomota ilatuwokoidi idigo kana,
‘Yau Tauyagu da poyapoya adi mavada.†Mad 5:14; Iyo 9:5. Avatauwa komi neta kosabokuuliyegu, mamaníwana goi geya koketoiyeta, go sem komi manumi mavadayana yawana vau ana kenao bei itapasigi.’
13 Go kidi Parisiyadi sidigo kadi,
‘Kom toinim im livala goi kutalavaitem. Tauna im talavaitayana geya mooitamoina.’†Iyo 5:31.
14 Go iya Yeisuyana idigo kana,
‘Aayagoi nako goi ama nakae nako goi anonoina go, komi geya koyagoiyeta nako goi ama o nako anonoina. Tauna neta toinigu guna livala ataalavaite, guna talavaitayana mooitamoina. 15 Komi tomota idi takínona goi kotaakinoigu. Yau geya vatau tayaamo tomota idi takínona goi atakino. 16 E yau sem tutayana atakínona, guna takinonayana mooitamoina unana yau aguta geya atakinoneta, go sem yau Tamagu, guna Toetuna, taiyao kaatakínona. Tauna yau guna takinonayana mooitamoina. 17 E Yaubada ina Katukeda boi Mosese ivinimi nakae idigodigo bego koroto adi taiyuwo neta idi talavaita sivavasa, e idi talavaitayana mooitamoina.†Atu 19:15. 18 Yau toinigu atalavaaitegu. Tamagu, guna Toetuna, nakae italavaaitegu. Moe bogina ama taiyuwo ima talavaitayana sivavasa, tauna itoboinemi konumisegu.’
19 E tauna tauyadi sidigo kadi,
‘Go Tamam nako?’
Iya Yeisuyana idigo kana,
‘Yau geya koyagoiguta, e nakae yau Tamagu geya koyagoiyeta. Neta moitamo koyaagoigu, e yau Tamagu nakae kooyagoi.’
20 Yeisu ina livala amo iidigedi tutayana Vada Kimaasabaina ina kali goi tomota ivatuulukoidi vininabeso dedeogaidi kikidi go, Yeisu ina tuta nava, tauna geya vatau tayaamo iyoisi.
21 E tauna aiyuwoina Yeisu ilatuwokoidi idigo kana,
‘Yau bei akalavemi. Bei kolusalegu go, geya kobabaneguta, go sem mami goyo bei kokámasa. Nako goi anonoina, komi geya itoboinemita koma.’†Iyo 7:34,36, 13:33.
22 E kidi Diyuu idi tomoyamoya taudiva sibobóbwara sidigo kadi,
‘Tauyana kana,
“Nako anonoina, komi geya itoboinemita koma.”
Manakae? Bego toinina ikaumate?’
23 Go iya Yeisuyana idigo kana,
‘Komi poyapoya goi koma go, yau Tauyagu diligaema korotoigu. Komi imi sinapu moe ame poyapoyayana sinapuna go, yau geya. 24 E tauna maine kagu,
“Mami goyo bei kokámasa.”
Neta geya konumiseta bego Yau Tauyagu,†Tat 3:14; Iyo 4:26, 6:20, 8:28,58, 13:19, 18:5. e moe bei mami goyo kokámasa.’
25 E tuwo kidi Diyuu idi tomoyamoyayadi sidigo kadi,
‘Kom bego avatau?’
Iya Yeisuyana idigo kana,
‘Yau tauna nakae boi mainao bogina alatuuwokoimi. 26 Dogoi badabadaidi komi manumi itoboinegu alatuwokoimi be nakae manudi atakinoimi go, yau guna nuwonúwana geya aguinuweyeta, go sem guna Toetuna ina nuwonúwana aguinuwe. Iya mooitamoina. Kaga nakae Tauyana goi anove, moe komi da poyapoya alatuwokoimi.’
27 Tauyadi geya siyagoiyeta bego Tamana manuna ibobóbwara. 28 E tuwo iya Yeisuyana idigo kana,
‘Tutayana Tomalatomota ana kailágata ibabane,‡Ana kailágata ibabane: Da Giriki niyadi ame livalayana ana yagoina aiyuwo ameko goi. Tayamo moe kada, ‘Kokailagasi ámasa manuna’ o tadigo kada, ‘Kerose goi situpatuko.’ Go aiyuwoina ana yagoina moe kada, ‘Yaubada ikailagasi ituko ina yábana.’ bei koyagoi Yau Tauyagu.†Tat 3:14; Iyo 4:2, 6:20, 8:24,58, 13:19, 18:5. Geya tayaamo kaga toinigu guna nuwonúwana goi aguinuwe, go sem kaga nakae Tamagu ivatuulukoigu, e moe nakae aabobore. 29 Aiyuwoina bei koyagoi guna Toetunayana yau taiyao. Yau guna guinuwa Tauyana sivauuyaone tuta liliuna, tauna geya ikalaveguta bego yau gumalau geya.’
30 Moe livalayadi Yeisu ibooboredi, e boda badabadaidi sinumise.
Diyuu maniyedi goyo ina pakonayao
31 E Diyuu maniyedi Yeisu bogina sinumise. Tuwo ilatuuwokoidi kana,
‘Neta guna livala goi kokaaiyaka, e komi moitamo yau guna tovatotowanayao. 32 Bei Nanamsa Mooitamoina koyagoi, e Nanamsa Moitamoinayana bei italigeimi.’
33 Go kidi Diyuuyadi sidigo kadi,
‘Kai Eberamo tubunao. Geya vatau tayaamo ipakoima geya!†Mad 3:9; Luk 3:8. Manakae kom kam,
“Nanamsa Mooitamoina bei italigeimi”?’
34 Go iya Yeisuyana idigo kana,
‘Moitamo komi Eberamo tubunao go, ame alatuuwokoimi konōve: Avatauwa neta goyo siguuinuwe, kidi paakonidi goyo yaina. 35 E tauyadi paakonidi geya sikaiyakovateta idi tolovina yaina goi unana tauyadi ituli ta boda, go sem tolovinayana natuna ikaiyako vata. Komi nakae. Konuwonúwana bego komi Yaubada ina bodayauwo unana komi Eberamo tubunao go, komi geya kokaiyakovateta Yaubada ina bodayauwo yaidi unana komi paakonimi imi goyo yaidi. 36 E tauna neta Tauyana Natuna italigeimi, komi moitamo taliigavimi. 37 Bogina ayagoi komi Eberamo tubunao go, imi sinapu tauyana ina sinapu nakae geya, go sem komi kopooikíkina bego kokaumategu unana guna livala yaimi goi geya ibibineta. 38 Go yau boi kaga liliuna bogina agite lavayana Tamagu taiyao, moe nakae adige. E komi nakae, kaga komi tamami yaina goi konove, moe nakae koguuinuwe.’
39 Go kidi Diyuuyadi sidigo kadi,
‘Kai tubuma Eberamo!’
Go iya Yeisuyana idigo kana,
‘Neta komi moitamo Eberamo tubunao, e guinuwa Eberamoyana ina guinuwa nakae koguuinuwedi. 40 E Nanamsa Mooitamoina Yaubada goi anove, Nanamsayana moe Yaubada manuna, e akaiwoduwe yaimi. Go ame tuta kopooikíkina bego kokaumategu. Moe geya Eberamo ina guinuwa nakae geya. 41 Moe komi tamami toina ina guinuwa koguuinuwe.’
Go kidi Diyuuyadi sidigo kadi,
‘Kai masisi goyogoyoina goi geya kabibineta. Kai tamama tayamo toito, moe Yaubada.’
42 Iya Yeisuyana idigo kana,
‘Neta Yaubada moe tamami, bei komatakoiyegu. Moitamo. Yau Yaubada goi ama, tauna ameko goi akaaiyaka. Ama geya toinigu guna nuwonúwana goi geya, go sem mae Tauyana ietunegu ama. 43 Kaga pasina guna livalayadi geya koyagoidita? Unana geya latuwomi guna livala konovedi. 44 Komi tamami Totagíwaya umana. Imi nuwonúwana moe bego tamami ina yalagau koguuinuwe. Amo tauyana aba vatowo goi ima ame tuta tokaumata. Tamamiyana Nanamsa Mooitamoina goi geya itaoeta, tauna tauyana yaina goi Nanamsa Moitamoinayana geya ikaiyaketa. Tutayana pola iivatoi, toinina aderina goi ivatoi. Tauyana topola be nakae pola tamana. 45 Ego Nanamsa Mooitamoina akaiwoduwe yaimi, tauna geya konumiseguta. 46 Komi yaimi goi avatau itoboinem goyo tayamo kubabane yaigu bego kukamamaetaligu? Geya. Neta Nanamsa Mooitamoina akaiwoduwe yaimi, kaga unana geya konumiseguta? 47 Avatau neta Yaubada ina boda, e ina livala inovedi. Ame pasina guna livala komi geya konovedita: Komi geya Yaubada ina bodao geya.’
48 Go kidi Diyuuyadi sidigo kadi,
‘Kai kabóbwara moitamo bego kom guma Samériya be nakae naagovaim!’
49 Go iya Yeisuyana idigo kana,
‘Yau geya naagovaigu geya, go sem yau Tamagu awowoine go, komi geya kowowoineguta. 50 E yau toinigu guna taimámina tomota yaidi goi geya alusaleyeta geya. Go Yaubada ikaaiyaka, Tauyana guna taimámina ana tolusala. Ame Tauyana totakinona dókana. 51 Tauyana moitamo totakínona go, ame alatuuwokoimi konoovedōko: Avatauwa neta yau guna livala sikabiikaone, ámasa bei geya siilotowo.’
52 E tuwo kidi Diyuuyadi sidigo kadi,
‘Ame tuta bogina kayagoi bego kom naagovaim. Eberamo be nakae Yaubada ina tokabivalavalayao bogina sikámasa go, kom kam,
“Avatauwa neta guna livala sikabiikaone, ámasa bei geya siilotowo.”
53 Tamama Eberamo bogina ikámasa. Manakae? Kunuwonúwana bego tauyana kutobusave? Yaubada ina tokabivalavala nakae. Boi nimatu bogina sikámasa go, manakae? Kunuwonúwana bego kom kutobusavedi? Kom bego avatau?’
54 Iya Yeisuyana idigo kana,
‘Neta yau toinigu guna togaga ana káeyana akamoitamoe, guna kamoitamoyana moe dogoi besobeso. Go yau Tamagu guna togaga ana káeyana ikamoitamoe. Mae Tauyana manuna komi kami,
“Tauyana ima Yaubada.”
55 Ago Tauyana geya koyagoiyeta. Ego yau aayagoi. Neta kagu, “Tauyana geya ayagoiyeta”, e yau topola komi nakae, go sem ina livala akabiikaone unana Tauyana aayagoi. 56 Tamami Eberamo mana uyáwana bego guna tuta sowóduwo bei igite. Ago bogina igite, e iuyáwana.’
57 E tuwo kidi Diyuuyadi sidigo kadi,
‘Iyaa! Kom am tala nava 50 geya kubabaneyeta go, Eberamo bego kugite?’
58 Yeisu idigo kana,
‘Guna bóbwara geya konumiseyeta go, ame alatuuwokoimi konōve: Namliyeta Eberamo ibíbina go, Yau Tauyagu.’†Tat 3:14; Iyo 4:26, 6:20, 8:24,28, 13:19, 18:5; Ibe 13:8; Nuw 1:4, 4:8.
59 E tauna Diyuuyadi gurewa sikabidi, bego Yeisu sikaumate go, ivatamutamumu namliyeta Vada Kimaasabaina ina kali goi isowóduwo.
<- IYONI 7IYONI 9 ->
- b Livala ana talígava Iyoni 7:53 goi kugīte.
†8:17 Atu 19:15.
- ~8~ Ana kailágata ibabane: Da Giriki niyadi ame livalayana ana yagoina aiyuwo ameko goi. Tayamo moe kada, ‘Kokailagasi ámasa manuna’ o tadigo kada, ‘Kerose goi situpatuko.’ Go aiyuwoina ana yagoina moe kada, ‘Yaubada ikailagasi ituko ina yábana.’
†8:28 Tat 3:14; Iyo 4:2, 6:20, 8:24,58, 13:19, 18:5.
†8:58 Tat 3:14; Iyo 4:26, 6:20, 8:24,28, 13:19, 18:5; Ibe 13:8; Nuw 1:4, 4:8.
†8:5 Vin 20:10; Atu 22:22-24.