Link to home pageLanguagesLink to all Bible versions on this site
4
Yeisu be Samériya vavinaina
sivaaloboda tetelina
1-2 E Parisi livala sinove bego boda gagaina sinonoina Yeisu yaina, e itaamyabidi sietovatotówana baige isaayoyoidi. Tauna kai ina tovatotowanayao ama badabada ivakaigaga namliyeta baige Iyoni. Go Yeisu tomota geya isayoyoidita, go sem kai ina tovatotowanayaoyama kasaayoyoidi. Tutayana Yeisu iyagoi livalayana Parisi sinove, 3 Tauyana kai taiyao Yudiya kakalave go, kakaluvilamna kana Galili manuna. 4 Kanonoina go, itoboine mainao Samériya dadavina goi kasiu.[a] 5 E tuwo Samériya kasiu kanonoina asa tayamo yoina Sukari goi. Sukariyana kikina moe poyapoya tayamo boi nimatu Yakobo natuna Iyosepa ivini.[b] 6 Ego amoko goi Yakobo ina doelu ikaaiyaka. E tuwo kama doeluyana goi Yeisu etoiya bogina ilausi, tuwo doeluyana aubodaina yatana goi itusobu iwaiwasi. Moe bogina dine. 7 Iwaaiwasi go, Samériya vavinaina ima doeluyana goi bego bwae itega. Yeisu ibala ina vavinayana ilatuwoko idigo kana,
‘Bwae kutēge anim.’
8 Bogina kuyagoi. Yeisu geya ana kaba tegamo geya, e anetava ikaaiyaka unana kai ina tovatotowanayao bogina kana Sukari goi bego awoinu kagimona.

9 Go iya Samériya vavinainayana kana,

‘Manakae? Yau Samériya vavinaigu go, kom koroto Diyuu kukawanoiyegu bwae manuna ae?’
Bogina kuyagoi. Kidi Diyuu da Samériya taiyao geya sikabiveekoveko geya.[c] 10 Go iya Yeisuyana idigo kana,
‘Neta Yaubada ina yabobona kuuyagoi be nakae yau bwae manuna akaawanoi kuyagoigu, e itoboine kom bwae maa yawoina[d] kukawanoiye, bei avinim.’
11 Go vavinayana itainasi; ina nuwonúwana bwae toina manuna ibobóbwara tauna kana,
‘Tomoya, geya im kaba tegamo go, doelu tono sou ivakaigaga. E tauna nako goi bwae ma yawoinayana bei kukabi? 12 Boi nimatu tubuma Yakobo doelu ame itavi be tauyana ma natunao be nakae ina yoguyoguyao ame doeluyana goi sinimnim. Ame tuta doeluyana kai ima doelu go, bwae nava idaudau dedevina toina. Manakae, kom bego tubuma Yakobo kutobusave?’
13 Go iya Yeisuyana idigo kana,
‘Neta kita bwae doelu ame goi tanimnim, nava bei maeda siyapasamna 14 go, avatauwa neta bwae yau avinidi sinimnim, e maedi geya siyapayápasa, go sem tauyadi nuwodi goi bei ikaubobóbwala be nakae idau vata, e bei yawoidi vata sibabane.’
15 Vavinayana kana,
‘Tomoya, moe bwaeyana kuvinīgu bego maegu geya iyapaseta nakae geya tuwaina amamaima ameko bego bwae ategatega!’
16 Go Yeisu kana,
‘Kūna monem kulatuwōko, taiyao kōma ameko.’
17 Go iya vavinayana idigo kana,
‘Yau geya monegumo.’
Yeisu kana,
‘Bego kom geya monemmo? Moe moitamo. 18 Go monemowo adi badabada bogina adi tainima go! Ame tuta korotoyana taiyao kootuyuwo geya monem toina geya. Moe kubóbwara moitamo.’
19 Vavinayana kana,
‘Tomoya, agitem ana kaigigita kom tokabivalavala. 20 Kai tubumao goi ima, ame koyayana goi kasaakululu Yaubada yaina. Go komi Diyuu kodigodigo bego Yerusalema kaka goi itoboine tasakululu dókana.’
21-22 Go iya Yeisuyana kana,
‘Namoya, guna livala kunumīse! Komi Samériya tomotaimi geya koyagoidokoeta avatau yaina kosaakululu. Go tomota adi yava kai Diyuu yaima goi isowóduwo, tauna kai kaayagoi avatau yaina goi kasaakululu. Go abóbwara moitamo bego tuta imamaima Samériya koyaina goi o Yerusalema goi bei geya kosakululuta Tamada yaina, 23 go sem tuta tayamo imamaima go, bogina isowóduwo, bei Tamada ina tosakululuyao mooitamoidi sisaakululu Tauyana yaina ame nakae: Yaubada ana Nanamsa Mooitamoina ana tovagitákwana moe Baloma Kimaasabaina, e Baloma Kimasabainayana ina vakeda goi bei sisaakululu. Moitamo. Tomota amo nakae Tamada latuwona bego ina tosakululuyao. 24 Avatauwa neta latuwodi sisaakululu Yaubada yaina, itoboine Yaubada ana Nanamsa Mooitamoina ana tovagitákwana moe Baloma Kimaasabaina ina vakeda goi sisaakululu unana Yaubada Baloma.’
25 Vavinayana kana,
‘Bogina ayagoi bego Mesaiya bei ima.’
Mesaiya ana yagoina moe Guyau. Tuwaina kana,
‘Tutayana Tauyana bei ima, kaga liliuna bei ikaiwoduwedi yaida goi.’
26 Yeisu kana,
‘Yau avaadigoim, Yau Tauyagu.’[e]

27 Ame tutayana goi kai Yeisu ina tovatotowanayao kama kakainaopa bego Tauyana vavina taiyao sibobóbwara. Ago geya vatau tayaamo yaima goi idigo kana,

‘Kaga latuwom vavinayana yaina?’
O kama,
‘Kaga unana tauyana kuuvadigo?’

28 E vavinayana ina kontena ikalave go, ina asa goi tomota ilatuwokoidi kana,

29 ‘Kōma koroto dobala kogīte. Tauyana kaga liliuna boi bogina aguuinuwedi ilatuwokoigu! Seki nakona amo Tauyana Guyau gea geya?’
30 Tuwo tomotayadi sitáoya asa goi sisowóduwo sima Yeisu yaina.

31 Ego nava simamaima go, kai Yeisu ina tovatotowanayao kalumakikine bego ikáika, tuwo kadigo kama,

‘Tovatulúkwana Toolagaim, avam goame. Kwāika.’
32 ‘Yau maa kavagu go, avaguyana komi geya koyagoiyeta’, Yeisu kaena.

33 E tauna kai ina tovatotowanayao ametava kabobóbwara kadigo kama,

‘Manakae? Nakona ituli ta tomota awoinu ivini?’
34 E Yeisuyana kana,
‘Yau avagu moe bego guna Toetuna ina nuwonúwana aguuinuwe be nakae ina paisewa alukavave. 35 Komi kodigodigo bego tukówana aivasi baige dibayoya ana tuta ae? Ame alatuuwokoimi konōve: Matami kodobāla tomota kogitēdi bogina siyao witi tanuina nakae dibayoya ana tuta goi. 36 Bogina todibayoya idi takona siibabane nakae awoinu sisayoyoidi yawoidi vata manuna bego tobágula be todibayoya taiyao siuyáwana. 37 Moeko goi livala ame moitamo: Tomota tayamo ibágula; tomota tayamo idibayoya. 38 Yau aetunemi bei kaga manuna boi geya kopoisoganeta go, tuwo kodibayoyoi. Ituli ta bodava sipoisógana go, komi idi paisewa kosiukoidi bei kodibayoya.’

39 E amo asayana goi da Samériya badabadaaidi Yeisu sinumise vavina ina livala pasina. Tauyana boi Yeisu manuna italavaita kana,

‘Kaga liliuna boi bogina aguuinuwedi ilatuwokoigu!’

40 E tutayana da Sameriyayadi sima Yeisu yaina, sikawanoi bego ikaaiyaka yaidi goi. Tuwo moitamo itagona, e maliyalina aiyuwo goi ikaaiyaka. 41 Kidi go boda badabadaidi tuwaina ina livala pasidi sinumise. 42 Go vavinayana silatuwoko sidigo kadi,

‘Tauyana kanumise go, geya kom im livala kaka pasina geya. Ina livala toinima bogina kanove be nakae kayagoi Tauyana moitamo kita da poyapoya ada Toyava toina.’
Yeisu ina kaba kinana aiyuwoina Kena goi:
Koroto gagaina natuna ikideedevine tetelina
43 E maliyalina aiyuwo mlidi go, kai katáoya amoko goi kasowóduwo kana Galili goi. 44 Yeisu boi toinina italavaite kana,
‘Yaubada ina tokabivalavala toinina ina kasa goi geya ana wowoinamo.’[f]

45 E tutayana kama Galili Parovinisi goi kasiu, da Galili Yeisu siuyaone unana tauyadi nakae boi Basitáwana Aikanina manuna sina Yerusalema goi, e bogina sigite kaga liliuna iguuinuwedi.[g]

46 E Yeisu taiyao kakaluvilamna kama Galili asaina Kena goi. Amoko goi boi Tauyana bwae ikaigavile imalaoine.[h] Ago tayamo tolovina ina topaisewa Kapaneumi goi ikaaiyaka; tauyana natuna koroto ikatówana. 47 Ame tauyana livala inove bego Yeisu Yudiya Parovinisi goi bogina ima Galili Parovinisi goi. Tuwo itáoya ima Yeisu yaina ikawanoi kana,

‘Natugu koroto giyakainava bei ikámasa. Neta itoboinem, kusōu kūma tauyana kukidedevīne.’
48 Go iya Yeisu idigo kana,
‘Neta aba kinana kainaaopaidi geya kogitedita, e bei geya konuumisegu.’
49 Go iya korotoyana kana,
‘Tomoya, kusōu kūma tāna, govila bei natugu ikámasa.’
50 Yeisu kana,
‘Kūwo. Natum bogina iboboina; maa yawoina ikaaiyaka.’
Korotoyana Yeisu ina livala inumise, tuwo ina. 51 E bogina isou inonoina go, ina pakonayao sima sivalobode silatuwoko sidigo kadi,
‘Natum bogina iboboina, maa yawoina.’
52 E tauna ilumadadedi idigo kana,
‘Ava tuta nakae iboboina?’
Pakonidiyadi sidigo kadi,
‘Nuwobuna nakae atówana ikalave.’
53 E tauna gomanayana tamana bogina iyagoi tuta amo goi Yeisu kana,
‘Natum bogina iiboboina, maa yawoina.’
Tuwo tauyana mana bodayauwo liliudikova Yeisu sinumise.

54 E moe aba kinana aiyuwoina Yeisu iguinuwe tutayana Yudiya goi ima go, Galili goi ipaaisewa.

<- IYONI 3IYONI 5 ->