1 E koroto tayamo Parisi yoina Nikodimo. Tauyana Diyuu adi tovakumgo tayamo. 2 Ame tauyana sabamgo goi ima Yeisu yaina idigo kana,
‘Tovatulúkwana Toolagaim, kayagoi bego kom tovatulúkwana tayamo Yaubada goi kuma. Moitamo. Neta Yaubada kom taiyao geya, e aba kinana kuguuinuwedi geya itoboinemta kuguinuwedi.’
3 Go iya Yeisuyana idigo kana,
‘Im bóbwara moitamo go, ame alatuuwokoim kunōve: Avatauwa neta geya sibibinamneta, geya itoboinedita bei Yaubada ina kalibúbuna sigite.’[a]
‘Moe moitamo go, ame alatuuwokoim kunōve: Avatauwa neta bwae goi[b] be nakae Baloma Kimaasabaina goi geya sibibineta, geya itoboinedita Yaubada ina kalibúbuna goi sisiu.[c]6 Avatauwa neta sakava goi sibíbina, moe sakava ana dadava. Go avatauwa neta Baloma Kimaasabaina goi sibíbina, moe baloma ana dadava. 7 Taabu kukaaināopa bego yau kagu,
“Itoboinem kubibināmna.”
8 Gwa! Nako goi yágira latuwona itowo, nakae itowo, e butukáona tanove go, geya tayagoiyeta nako imamaima o nako inonoina. Tauna kom nakae neta Baloma Kimaasabaina goi kubíbina. Ina paisewa geya kugiteyeta go, ina paisewayana myana kuulotowo.’
9 Go iya Nikodimoyana idigo kana,
‘Go bibinamna manakaena isowóduwo?’
10 Go iya Yeisuyana idigo kana,
‘Iyaa! Manakae? Kom bego Isileli tubunao idi tovatulúkwana go, ame vatulukwanayadi geya kuyagoidita ae? 11 Moe aba kainaopa gagaina go, ame alatuuwokoim kunōve: Kaga kaayagoi kaabobore; kaga kagitegite katalavaite yaimi go, ima talavaitayana geya konumiseyeta. 12 Kaga kaga sisowóduwo poyapoya goi manudi alatuwokoimi go, geya konumiseguta. Tauna kaga neta yábana manuna alatuwokoimi, bei manakaemi konumisegu? 13 Ame pasina itoboinegu yábana manuna avatulúkwana: Geya vatau tayaamo bogina ituko ina yábana goi bego dogoiyadi yábana manuna iyagoidi, go sem Tomalatomota yábana goi isou ima anetava itoboine dogoiyadi iyagoidi. 14 Boi nimatu yoyowo goi Mosese barasa ikabi, moteta imadagi. Ikavava, aitakeo goi itupatuko. Ikavava, ikatulagasi, e bei avatauwa neta motetayana sipotepote, geya sikamaseta, go sem maa yawoidi sikaaiyaka.[d] E nakae itoboine bei Tomalatomota sikatulagasi 15 bego avatauwa neta Tauyana sinumise, e maa yawoidi vata.’[e]
16 Ame moitamo. Yaubada da poyapoya imatakoiyeda ame nakae: Natuna kaakesaina[f] ikasale[g] bego avatau neta inumise, bei geya ikamaseta, go sem maa yawoina vata.[h]17 Moitamo. Yaubada Natuna ietune ima poyapoya ame goi geya kada bego da poyapoya itakinoida toogoyoida ida goyo pasidi geya, go sem bego Natunayana goi iyaveda.[i]18 Avatauwa neta Natunayana siinumise, itakinoidi todedevidi. Ego avatauwa neta Yaubada Natuna kaakesaina[j] geya sinumiseyeta, bogina itakinoidi toogoyoidi. 19 E takinonayana unana ame: Mavadayana bogina ima poyapoya ame goi go, tomota nuwodi geya ikabiyeta, go sem mamaníwana nuwodi ikabi. Idi nuwokabiyana moe idi guinuwa goyogoyoidi pasidi. 20 Moitamo. Avatauwa neta goyo siguuinuwe, Mavadayana sikaolilive, tauna bei geya sisiuta, govila bei idi guinuwa itapasigidi. 21 E kidi go avatauwa neta Yaubada ana Nanamsa Mooitamoina siguuinuwe, Mavadayana simeko bego idi guinuwa ikaiwoduwedi bego tomota liliudi siyagoi idi guinuwayadi moe idi spwagógana Yaubada yaina goi pasina siguuinuwedi.
Iyoni tosayóyova be Iyoni togínina idi talavaita Yeisu manuna
22 Moe dogoiyadi sikavava, Yeisu be kai ina tovatotowanayao taiyao kana Yudiya goi. Amoko goi taiyao kakaaiyaka go, ina lovina goi tomota sima kasaayoyoidi. 23 Ego Iyoni nakae. Bwae gagaina asa Ainoni Salim kikina goi ikaaiyaka, tauna tomota sina amoko goi Iyoni isaayoyoidi. 24 Amo tutayana Iyoni nava deri goi geya sivaisiuyeta.[k]
25 E tauna kidi Iyoni ina tovatotowanayao be Diyuu koroto tayamo taiyao sikaumakimaki goyo ana kimavada manuna. 26 Tuwo Iyoni ina tovatotowanayaoyadi sima Iyoniyana yaina sidigo kadi,
‘Tovatulúkwana Toolagaim, koroto kunuuwaisi boi Iyoridani ta dadava goi taiyao kokaaiyaka nakae boi bogina kukamooitamoe? E kunōve. Korotoyana ame tuta boda isaayoyoidi. Madabokiidi sinonoina Tauyana yaina goi. Tauna geya simamaima kom yaim.’
