18
Yudasa ina nuwotulu
be nakae Yeisu ana yóita tetelidi
(Madiu 26:47-56; Maki 14:43-50; Luke 22:47-53)
1 Yeisu ina livalayadi iboboredi ikavava, Tauyana kai ina tovatotowanayao taiyao kataoya asa amo kakalave go, kana Kidironi sakalina goi kasaidámana. Amoko goi oribe tanuina tayamo ikaaiyaka, e kasiu. 2 Ego tuta liliuna amoko goi Yeisu kai taiyao kaatugúguna. Tauna Yudasa, Yeisu ana tonuwotulu, nakae asayana bogina iiyagoi. 3 E iya go Yudasayana tovayaviya maniyedi ikabidi be nakae Vada Kimaasabaina ana polisi adi tovakumgoyao maniyedi Tonúwala Gagaidi yaidi goi be Parisi yaidi goi ikabidi. Ikavava, madi rampa, madi dúgala be madi kaipíyama Yudasa ivakededi sima amoko goi.
4 E iya go Yeisuyana bogina iiyagoi kaga liliuna bei sisowóduwo yaina goi. Tuwo ivatabale ina bodayadi ilatuwokoidi idigo kana,
‘Avatau koolusale?’
5 Tauyadi sidigo kadi,
‘Yeisu guma Nasareta.’
Yeisu kana,
Ego iya Yudasayana, tauyana Yeisu ana tonuwotulu, nakae iitaoya kidi taiyao. 6 E tutayana Yeisu kana, ‘Yau Tauyagu’, bodayadi mlidi sivamnamnae masigava sikapusi sisou poyapoya goi. 7 E tuwo aiyuwoina Tauyana ilumadademneidi idigo kana,
‘Avatau koolusale?’
‘Yeisu guma Nasareta’, kidi kaedi.
8 Go iya Yeisuyana idigo kana,
‘U, bogina alatuwokoimi Yau Tauyagu. Komi koluusalegu, tauna ame tauyadi kotagonēdi sina idi kasa.’
9 Moeko goi ina livala boi Tamana yaina imalatomota tutayana idigo kana,
‘Tauyadi boi kuuvinigu, yaidi goi geya tayamo avasulaigi.’
†10 E iya go Saimoni Pita mana sisi, tuwo ibuyagi, ibala ina Tonúwala Toolagaina ina pákwana taiyana kakataina ivakanáupe. Pakoninayana yoina Malako. 11 Go iya Yeisu idigo kana,
‘Im sisi ana piwa goi kwatusagemnēi! Manakae? Gedageda keigaina Tamagu iivinigu bei anim gea geya?’
† Yeisu ana kotu Anasi matana goi go,
Pita ina lawoiwoi tetelidi
(Iyoni 18:12-24)
Yeisu sinave Anasi ina vada goi kotu manuna tetelina
(Madiu 26:57; Maki 14:53; Luke 22:54)
12 E kidi tovayaviyayadi madi tokalikumatana be Diyuu idi polisiyadi siyava sina Yeisu siyoisi. Siyoisi, nimana siyowóidi. 13 Siyowóidi ikavava, mainao sinave Anasi goi. Tauyana moe Kaiyapasi yaona koroto. Kaiyapasiyana Tonúwala Toolagaina tala amo goi. 14 Go ame Kaiyapasiyana boi Diyuu ilatuwokoidi kana,
‘Tayamo koroto itoboine ikámasa tomota liliuda ada katumapu.’
† Pita ina lawoiwoi vakuumgoina tetelina
(Madiu 26:69-70; Maki 14:54,66-68; Luke 22:54b-57)
15 E Yeisu sinave Anasi ina vada ana kali goi sisiuye go, Saimoni Pita be yau kasabookuliye. Ago Tonúwala Toolagaina iyaagoigu, tauna yau nakae vada ana kaliyana goi asiu Yeisu taiyao. 16 E iya go Pitayana moetala goi ikaaiyaka, aba siu kikina goi iitaoya. Go Anasi ina topaisewa vavina paakonina tayamo moe aba siuyana ana tomatakavata nakae ikaaiyaka, e Pita isanabode geya isiuta. Yau Tonúwala Toolagaina aayagoi, tauna akaluvila ana torugwautayana alatuwoko Pita itagone isiu. Tuwo itagona go, Pita akabi taiyao kasiu. 17 E torugwautayana Pita ilatuwoko kana,
‘Kom nakae amo korotoyana ina tovatotówana tayamo ae?’
Go iya Pitayana kana,
‘Yau geya.’
18 E Tonúwala ina pakonayao maniyedi be nakae Vada Kimaasabaina ana polisiyao yeu bogina sidimili, unana gogoutuna, tauna sidimili go, kikina goi siitaoya sibuuvavaya. E Pitayana nakae iitaoya ibuuvavaya tauyadi taiyao.
Yeisu ana kotu Anasi matana goi tetelina
(Madiu 26:57-66; Maki 14:55-64; Luke 22:66-71)
19 E iya go Tonúwala Tolagainayana Yeisu ilumadade kana,
‘Im tovatotowanayao avatauwa? Im vatulúkwana manakae?’
20 Yeisu idigo kana,
‘Yau akamamaétala da poyapoya yaidi. Yau tuta liliuna Diyuu ida kaba tugúguna goi be nakae Vada Kimaasabaina goi avaatulúkwana. Amoko goi Diyuu liliudi sigugúguna. Tuwo geya tayaamo kaga adigegau. 21 Kaga kulumadadekoigu? Tauyadi guna livala ana tovainówaya kulumadadēdi. Amo tauyadi siyagoi yau kaga aadigedi.’
22 E livalayadi Yeisu idigedi go, Vada Kimaasabaina ana polisi tayamo Tauyana kikina goi iitaoya, Yeisuyana isapi idigo kana,
‘Manakae? Moe nakae Tonúwala Toolagaina kwatumapu ae?’
23 Go iya Yeisuyana idigo kana,
‘Neta abobwara goyo, goyoyana kutalavāite. Go neta abóbwara moitamo, kaga unana kulauigu?’
24 E Anasi ilovina ina polisi sina Yeisu ma yoowonina sikabi sinave Tonúwala Toolagaina Kaiyapasi yaina goi.
Pita ina lawoiwoi aiyuwoina be aitonina tetelidi
(Madiu 26:71-75; Maki 14:69-72; Luke 22:58-62)
25 E Saimoni Pita nava iitaoya yeu goi ibuuvavaya toyoko taiyao. E tuwo toyokoyadi sidigo kadi,
‘Kom nakae Tauyana ina tovatotówana tayamo ae?’
Tauyana ilawoiwoi idigo kana,
‘Yau geya!’
26 Tonúwala Toolagaina ina pákwana tayamo ikaaiyaka; tauyana osiyana moe korotoyana taiyana boi Pita ivakanáupe. Amo tauyana Pita igite idigo kana,
‘Tánuwo goi Yeisu taiyao agitemi ae?’
27 E sivatonina Pita ilawoiwoi go, mainao kamkam itáiya.
Yeisu ana kotu Pailato matana goi tetelina
(Madiu 27:1-2,11-14; Maki 15:1-15; Luke 23:1-5)
28 E polisiyadi Yeisu siyoisi, Kaiyapasi ina vada esaaesaina goi sinave gávana Pailato ina vada goi. Ego moe nobuyana nava matagougouna. Ago Diyuuyadi vada goi geya sisiuta geya, govila bei kidi Totuyoyowo sikibaibailidi, e bei geya itoboinedita Basitáwana Aikanina sikáika. 29 E sima go, Pailato isowóduwo ima tauyadi yaidi idigo kana,
‘Kolatuwokōigu koroto ame ava lovina ikapipilave?’
30 Tauyadi sidigo kadi,
‘Neta ame korotoyana geya goyo ana toguinuwa geya, nimam goi geya kayatoeta.’
31 E iya Pailatoyana idigo kana,
‘Komi konāve bei toinimi imi lovina goi kotakīno!’
Go kidi Diyuu adi tolovinayaoyadi sidigo kadi,
‘Tauyana itoboine ikámasa go, kai geya ima tagonamo bei tomota kakaumata, tauna kamekoim.’
32 Kidi da Roma kerose goi tomota sikauumatedi. Tauna Diyuu idi livalayadi goi Yeisu ina bóbwara ina kámasa kerose manuna imalatomota dókana unana da Roma bei sikaumate.† 33 E Pailatoyana ina vada esaaesaina goi isiumna go, Yeisu iduduwe ima idigo kana,
‘Kom moitamo Diyuu adi Tokalibúbuna?’
34 Yeisu kana,
‘Moe toinim im nuwonúwana goi kubobóbwara gea ituli ta tomotava silatuwokoim yau manugu?’
35 ‘Manakae? Yau Diyuu bego imi sinapu ayagoi? Toinim im bodao be Tonúwala Gagaidi simem yau nimagu goi siyatoim. Ava goyo kuguinuwe?’ Pailato kaena.
36 ‘Yau guna kalibúbuna unana moe geya kada poyapoya ame goi geya. Neta guna kalibúbuna unana moe ame poyapoyayana goi, yau guna tovaitayao bei sivayaviya bego Diyuu adi tolovinayao geya itoboinedita nimam goi siyatoigu. E yau guna kalibúbuna unana moe ameko goi geya imaita’, Yeisu kaena.
37 E Pailato idigo kana,
‘Moitamo kom woi Tokalibúbuna tayamo ae?’
Yeisu idigo kana,
‘Kom bogina kudigoyabe bego yau Tokalibúbuna. Ame pasina yau abíbina nakae ame pasina ama poyapoya ame goi: Bego Nanamsa Mooitamoina akaiwoduwe. Avatauwa neta Nanamsa Moitamoinayana tomotaidi, bei sopagu sikabikaone.’
38a Go iya Pailatoyana kana,
‘Kaga Nanamsa Mooitamoina?’
Pailato ilovina Yeisu bei ikámasa tetelina
(Madiu 27:15-31; Maki 15:6-20; Luke 23:13-25)
38b Ibóbwara ikavava, aiyuwoina isowoduwomna ina Diyuu yaidi goi idigo kana,
‘Geya tayaamo ina píkwana ababane. 39 Go sinapu tayamo ikaaiyaka komi manumi bego Basitáwana Aikanina ana tuta tomota tayamo ataligei yaimi goi. Tauna latuwomi bego komi Diyuu imi Tokalibúbuna ataligei yaimi?’
40 E bodayadi aiyuwoina siduduwo sidigo kadi,
‘Moe Tauyana geya! Go sem Barabasi kutaligēi!’
