Link to home pageLanguagesLink to all Bible versions on this site
Yeisu ina kámasa, ina valiwoga,
be ina taoyamna tetelidi
13
(Iyoni 13:1—20:29)
Yeisu ina matakoi ivagitakoe Yudasa ina nuwotulu goi
be nakae Pita ina lawoiwoi adi talavaita goi
1 E namliyeta Basitáwana Aikanina bei ana tuta go, Yeisu iiyagoi ina tuta bogina ima bego poyapoya ame ikalave, e ina Tamana yaina goi. Ina tuta ame poyapoyayana goi kai ina bodao imatakoiyema go, ina matakoiyana ivakaigaga.‡Ina matakoiyana ivakaigaga: Ame livalayadi adi yagoina aiyuwo da Giriki niyadi goi. Itoboineda takaigavile kada, ‘Ina matakoiyana ivakaigaga.’ Go aiyuwoina itoboineda kada, ‘Go imatakoiyedi ana kadókana yawoina ikavava.’

2 Lavilavi goi bogina sivaideda kakakáika go, iya Totagíwaya ina Saimoni natuna Yudasa guma Keriota nukotona isanayato bego Yeisu inuwotuluye.†Mad 26:14-16; Luk 22:3. 3 Ago Yeisu bogina iyagoi bego kaga liliuna ana lovina Tamana bogina ivadamane Tauyana yaina goi be nakae Yaubada goi ima nakae bei ikaluvilamna ina Tauyana yaina. 4 Tuwo aikayana goi itaoya ana kwama maanawena ivalilivi iyato go, tawero ikabi tolobona goi isiko. 5 Ikavava, noko ikabi bwae isaligogo. Ikavava, ibala ima ivatowo kai ina tovatotowanayao tamo tamo aema inikidi namliyeta ina tawero maine isikosiko goi isekukudi. 6 E ina Saimoni Pita yaina goi bego aena inikidi go, Saimoniyana idigo kana,

‘Tomoya, kom bego aegu kunikidi?’
7 Go iya Yeisu idigo kana,
‘Kaga tuta ame goi aguuinuwe kom geya kuyagoiyeta go, nava bei kuyagoi.’
8 Go iya Pitayana idigo kana,
‘Yau aegu bei geya kuunikidi!’
Go iya Yeisuyana idigo kana,
‘Neta aem geya anikidita, kom geya yau guna boda geya.’
9 Tuwo Saimoni Pitayana idigo kana,
‘Tomoya, dedevina go, aegu kaka geya, go sem nimagu be dabagu nakae kunikīdi!’
10 Go Yeisuyana ilivalakaibala idigo kana,
‘Avatauwa neta bogina siisiwo, e tuwo aedi kaka sinikidi go, wowodi madabokina bogina imavada. Komi bogina komavada go, geya kada madabokimi geya.’
11 Bogina iyagoi avatau bei inuwotuluye. Moe pasina idigo kana,
‘Geya kada madabokimi geya.’

12 E tutayana aema inikidi ikavava, ana kwama maanawena ikabi ilosimnei. Ikavava, aiyuwoina itusobu, idigo kana,

‘Koyagoi kaga aguinuwe yaimi gea geya? 13 Komi koduuduwegu tovatulúkwana be Tomoya. Moe itoboine. Yau imi tovatulúkwana be imi Tomoya. 14 E tauna yau imi Tomoya be imi tovatulúkwana komi aemi anikidi ae?†Luk 22:27. E komi nakae itoboine semiyao aedi konikidi. 15 Aba gita tayamo bogina avinimi bego kaga nakae yau aguuinuwe yaimi, komi nakae itoboine koguinuwe. 16 Moitamo itoboinemi kovatotowonegu. Ame alatuuwokoimi konōve: Tomota paakonina ina tomoya geya itobusaveyeta. Nakae lobutu ana tolokoina ana toetuna geya itobusaveyeta.†Mad 10:24; Luk 6:40; Iyo 15:20. Tauna neta yau, imi Tomoya, guinuwa nuwotookaina itoboinegu aguinuwe, e komi guna tovatotowanayao nakae itoboinemi. 17 Ame guinuwayadi koyaagoidi ae? Tauna ami dedevina kobabane neta koguuinuwedi.
18 Ago abobóbwara geya komi madabokimi manumi geya. Komi akiinavemi yau bogina ayagoimi, nakae bogina ayagoi tayamo yaimi geya idedevineta, go sem Gínina Kimaasabaina ame itoboine ameko goi imalatomota; Gininayana idigo kana,
 
“Tauyana bego siyagu taiyao kakakáika go,
bogina ivakaleya yau yaigu.”
Same 41:9
 
19 Ame tuta nakae tuta simamaima go, agimilatuwokoimi kaga kaga bei sisowóduwo bego tutayana dogoiyadi sisowóduwo, konumisa bego Yau Tauyagu.†Tat 3:14; Iyo 4:26, 6:20, 8:24,28,58, 18:5. 20 Ame moitamo, tauna ame alatuuwokoimi konōve: Tutayana aetunemi tomota yaidi, avatauwa neta siuyaaonemi, e yau nakae siuyaaonegu. E avatauwa neta yau siuyaaonegu, agu toetuna nakae siuuyaone.’†Mad 10:40; Mak 9:37; Luk 9:48, 10:16.

21 Ame Yeisu idigedi ikavava, nukotona taitáiya iuyoi, e ana tonuwotulu italavaite, idigo kana,

‘Nakae adige bei isowóduwo go, ame alatuuwokoimi konōve: Koroto tayamo yaimi goi nava bei inuwotuluyegu.’
22 Kai ina tovatotowanayao kamatavilavila toinima yaima, geya kayagoiyeta avatau manuna ibobóbwara. 23 Yau Yeisu ina kalo nakae ina tovatotówana tayamo, e kikina toina goi akanaataliya nimagu asabadiye. 24 E Saimoni Pita ilomatakipiyegu bego Yeisu alumadade avatau idigedige. 25 E tuwo yau Yeisu akanapakiye atakului adigo kagu,
‘Tomoya, avatau kudigedige?’
26 Tauyana itakuluigu idigo kana,
‘Tauyana gwa. Beredi bei akabi, akivisi giyaina asavakutui. Ikavava, bei amo tauyana avini ikáika.’
E tuwo berediyana giyaina ikabi, isavakutui ikavava, Yudasa, moe Saimoni guma Keriota natuna, ivini. 27 Ivini, berediyana giyaina ikabi ikavava, yaina goi Kaleya isiu. Tauna Yeisu Yudasa ilatuwoko idigo kana,
‘Dogoiyana bei kuguinuwe, woilīm kuguuinūwe.’
28 E kai kaatusobu yaima goi geya vatau tayaamo iyagoi kaga pasina nakae Yudasa ilatuwoko. 29 Moitamo. Yudasayana moe ima mani dedeogaina ana torugwáuta, tauna maniyema kanuwonúwana bego Yeisu Yudasa ilatuwoko kana,
‘Kūna áika konanina kugimōne.’
O bego ina tookaidi mani ivinibesoidi. 30 E tuwo berediyana Yudasa ikabi, ikani ikavava, mainao isowóduwo. E moe bogina isabamgo.†Luk 22:7-38.
Yeisu bei ina Tamana go,
Baloma Kimaasabaina bei ietune ina ina tonumisayao
31 E tauna tutayana Yudasayana ikalavema ina, Yeisu idigo kana,
‘Giyakainava Yaubada ina togaga ana káeyana Tomalatomota goi ikaaiyaka bei ivagitakoe go, Tomalatomota ina guinuwa goi tomota bei sigite Yaubada ina togaga ana kaeyanayana bei ivagitakoe tomota yaidi. 32 Nakae Tomalatomotayana nakae iguinuwe, tauna Yaubada nakae ina togaga ana kaeyanayana toinina bei ivagitakoe Tomalatomota yaina go, mainao nakae bei iguinuwe.
33 Natugowo, tuta giyaina tuwaina bei akaaiyaka yaimi goi. Bei kolusalegu go, nakae Diyuu bogina alatuwokoidi, e komi nakae alatuwokoimi kagu,
“Nako goi anonoina, komi geya itoboinemita koma.”†Iyo 7:34,36, 8:21.
34 Lovina vau avinimi bego semiyao komatakooiyedi. Nakonakae bogina amatakooiyemi, komi nakae semiyao komatakooiyēdi.†Iyo 15:12,17; 1Iy 3:23; 2Iy 1:5. 35 Tomota madabokidi bei siyagoi bego komi yau guna tovatotowanayao ame nakae: Neta semiyao komatakooiyedi.’
36 Saimoni Pitayana kana,
‘Tomoya, bei nako kuna?’
Yeisuyana idigo kana,
‘Nako goi anonoina, ame tuta geya itoboinemta kusabokuliyegu. Ego nava bei kusabokuliyegu.’
37 Go iya Pitayana idigo kana,
‘Tomoya, go kaga unana geya itoboineguta bei ame tuta asabokuliyem? Bei yawoigu akasale manum!’
38 Go iya Yeisuyana idigo kana,
‘Manakae? Bego kutagona yawoim kukasale manugu? Nakona moe im nuwonúwana go, ame alatuuwokoim kunōve: Kamkam geya itaiyeta ana kadókana sivato bei kulawoiwoiyekoigu.’†Mad 26:31-35; Mak 14:27-31; Luk 22:31-34.

<- IYONI 12IYONI 14 ->