ABA VATOWO 25

Eberamo ina kámasa tetelina

1 E Eberamo inaimna, monena yoina Ketura. 2 Keturayana goi Eberamo natunao koroto ame nakae: Simrani, Yokisani, Madani, Midiyani, Isibaki be Suwaka. 3 Yokisaniyana natunao koroto adi taiyuwo, tayamo yoina Siba, tayamo yoina Dedani. Dedaniyana tubunao adi bodao yoidi ame nakae: Asuri, Letusi be nakae Leuma. 4 Midiyaniyana natunao koroto Epa, Eperi, Kanoka,[a] Avida be Eladaya. Ame tauna Ketura natunao be tubunao.

5 E Eberamo ina lotówana ilotowo, e konana madabokina natuna Aisake ivini. 6 Ego Eberamo moneyuwoinao natudiyao nakae konadi ivinidi go, ivalilivedi sina aduwanau bomatu dadavina. Geya latuwona Aisake taiyao sikaaiyaka.

7 E Eberamo yawoina ana madabokina moe tala ana badabada tayamo andedi seventipaibi (175). 8 Tauyana bogina ikaitomoya toina, e yawoina ikavava, namliyeta ina tamana be tubunao yaidi goi. Yawoina maanawena be nakae ina kaiyaka madabokina dedevina.[b] 9 Yawoina ikavava, tuwo natunao adi taiyuwo, moe Aisake be Isimaeli, tamadi wowona sikabi, sinave Makipela goi go, valiwoga tukubu sinaena goi sivaliwoge. Makipelayana ikaaiyaka asa Mamre go, bomatu dadavina goi boi Epironi ina poyapoya sinaena. Epironiyana tamana Sokara, tauyana tubuna moe Eta. 10 Eta tubunaoyadi yaidi goi boi poyapoya Eberamo igimone.[c] Amoko goi monena Sera ivaliwoge go, Eberamo nakae sivaliwoge. 11 E ina kámasa mlina, natuna Aisake Bera Lakai Roi[d] goi ilokasa ikaaiyaka go, ina kaiyakayana goi kina Yaubada ikaipakuye.

Isimaeli mana bodao adi liliu

12 Ame Eberamo natuna Isimaeli mana bodao adi liliu: Sera ina pákwana Ega guma Itipita go, kina Egayana Eberamo natuna Isimaeli ivenatuni.

13 Isimaeli natunao koroto adi bíbina goi ame nakae: Botomoya yoina Nibayote. Bonauyayana koroto yoidi Kedari, Adabaeli, Mivasam, 14 Misama, Duma, Mase, 15 Kadadi, Tema, Yatura be Napisi. Bogomane yoina Kedama. 16 Ame taudi Isimaeli natunao yawou aiyuwo sietolovina idi bodao yaidi goi. Ame yoidiyadi moe idi bodaoyadi tamo tamo adi dala yawou aiyuwo yoidi nakae. Aiyuwoina tubudiyao idi kasa yoidi nakae. 17 Isimaeli yawoina ana madabokina moe tala ana badabada 137 ibabane, e yawoina ikavava namliyeta ina tamana be tubunao yaidi goi. 18 E tauyadi natunao be tubunao silokasa Kevila be Sura nauyayanaidi goi, moe Itipita idi túwana kikina neta kunonoina bego Asiriya. Ago Isimaeli natunao Aisake natunao sivakaleyedi.

Aisake mana bodao tetelidi

(Aba Vatowo 25:19—37:1)

Yakobo be Iso adi bíbina tetelidi

19 E ame Eberamo natuna Aisake mana bodao tetelidi. 20 E tutayana Aisake ana tala poti, Ribeka inai. Ribekayana tamana yoina Betuweli guma Aram, ina kasa Padani Aram.[e] Niuna yoina Lebani.

21 E Ribeka ikágala, tauna Aisake ikawanoi Yauwe yaina bego natuna ivini. Tuwo Yauwe inove, e Ribekayana ikéuwama. 22 Ikéuwama go, gamona goi gogómana lalavi sivadidídina, tuwo Ribekayana ina nuwonúwana kana,

‘Kaga unana ame isowóduwo yau yaigu?’

Tuwo Yauwe inoko vaita manuna; latuwona bego iyagoi. 23 E Yauweyana idigo kana,

‘Gamom goi boda aiyuwo sikaaiyaka go,

bodayadi idi bíbina goi bei silivisi.

Boda tayamo bei sitogaga,

nakae sediyao bei sitogagasavedi.

Bogomane bei ietolovina botomoya yaina goi.’[f]

24 Tuwo moitamo Ribeka ina tuta ibabane, e gamona goi lalavi koroto sikaaiyaka. 25 Ina venatunayana goi gómana igimibíbina okayakaya go, wowona unuunu kaka, tauna sivayou Iso.[g] 26 Ego tutayana Iso isowóduwo, siyana ivámliya ibisibala tuwowona aegedugeduna iyoisi, tauna sivayou Yakobo. E Aisake ana tala siksti (60) tutayana Ribeka natunao ivenatunidi.

27 E gogomanayadi bogina sibíbina gagaidi. Iso togivakauko; aitowo nuwona ikabi. E kina go Yakobo ituli; tauyana koroto sakuululuna nakae tuwowoonuwaina, tauna tuta liliuna yoyou parai goi ikaaiyaka. 28 Aisake yoguyogu woiwoi ana tokáika, tauna natuna Iso imatakoiye. E kina go Ribeka natuna Yakobo imatakoiye.

Yakobo tuwowona Iso ina lovina ikabi tetelina

29 E sikaaiyaka, tuta tayamo Yakobo bini kayakayaidi ivaaipoludi go, tuwowona Iso vakauko goi ima, e loga ikámasa toina. 30 Siyana Yakobo igite ivaaipolu, tuwo ilatuwoko idigo kana,

‘Loga akámasa! Tauna siyagu, am bini kayakayaidi giyaina kuvinīgu akáika.’

Moe pasina Iso youyuwoina moe Idom.[h] 31 Go kina Yakoboyana idigo kana,

‘Tatalamāpu. Mainao kom botomoya im lovina kuvinīgu namliyeta biniyadi avinim.’

32 Isoyana idigo kana,

‘Loga akámasa go! Guna lovina kaga ana dedevina neta yau akámasa?’

33 Go Yakoboyana idigo kana,

‘Ame tuta Yaubada matana goi kukatōtula bei im lovina kuvinigu.’

Tauna Iso ikatótula idigo kana,

‘Yaubada matana goi kom botomoya nakae mam lovina.’[i]

34 Ikatótula ikavava, Yakobo beredi be nakae bini ikabidi, tuwowona ivini. Tuwo Isoyana ikáika be inim. Ikáika ikavava, itáoya ina.

Tauna Iso ina lovina áika goi italamapuye. Tuwo lovinayana dogoi besobeso tauyana yaina.

<- ABA VATOWO 24 ABA VATOWO 26 ->