3 Iyoni
Iyoni ina leta aitonina
Livala Aba Vaita
Leta ame Gaiyo ana leta Iyoni igini. Nakona tala 85 ina tala 95 go, nauyayanaidi goi igini.
Gaiyo Yeisu ana totugugunayao adi tovakumgo tayamo. Geya tayagoiyeta nako goi ikaaiyaka. Yaubada ana totugugunayao yaidi goi bágala tayamo isowóduwo. Gaiyoyana ina sinapu dedevina unana tovatulúkwana dedevidi sivanibiníbita Yaubada ana totugugunayao adi gúguna tayamo tayamo goi go, tutayana sina totugugunayadi, e Gaiyo imatakavateedokoidi.
Go koroto tayamo yoina Diyotiripi ina sinapu igoyo unana Iyoni ina nuwonúwana geya ikabikaoneyeta. Tauna leta ame Iyoni igini bego Gaiyo ilatuwoko nako aba gita dedevina go, nako aba gita igoyo.
Leta Luluna
1. Leta ana togínina be ana tokatuyaivayao 1-4
2. Iyoni ikawanoi Gaiyo yaina bego toliwola dedevidi ivaitedi 5-8
3. Tokapipilova Diyotiripi taabu tavatootowōne 9-10
4. Sinapu dedevina tavatotowōne 11-12
5. Iyoni ina vaduduwo 13-15

Leta ana togínina be ana tokatuyaivayao

1 Gaiyo,†

Yau im tomoya am leta ame agini iwo yaim. Guna kalo, Yaubada ana Nanamsa Mooitamoina taayagoi, tauna amatakoiyem.

2 Guna kalo, guna kawanoi Yaubada yaina bego im guinuwa liliudi goi am dedevina kubabane go, nakonakae balomaim bogina idedevina, bei sakavaim nakae idedevina. 3 Bogina kuyagoi. Auyáwana gagaina tutayana sedao maniyedi sima valem sitalavaite bego kom Yaubada ana Nanamsa Mooitamoina kusabookuliye. Idi talavaitayana itoboine unana kom moitamo Yaubada ana Nanamsa Moitamoinayana goi nava kuuketoiya. 4 Geya kada tayaamo kaga ivauyaonegu nakae ame: Neta vala anove bego natugowo Yaubada ana Nanamsa Mooitamoina goi siiketoiya!

Iyoni ikawanoi Gaiyo yaina
bego toliwola dedevidi ivaitedi

5 Guna kalo, boi sedao toliwola asa tamo tamo goi sivanibiníbita, e tutayana siwowoiwo, kom geya kuyagoidita go, tuwo kuvaaitedi. Moe im guinuwayana goi kom aba numisa nakae Yeisu kusabokuliyedoko. 6 Amo tauyadi bogina sima im matakoi sitalavaite kai Yaubada ana totugugunayao yaima ameko goi. Itoboinem tomota moe tauyadi nakae kuvakinaredi unana moe sinapuyana nakae Yaubada latuwona. 7 Moitamo. Tauyadi sivanibiníbita asa liliudi goi Guyau sitaalavaite go, geya tayaamo vaita sikawanoiye Totuyoyowo yaidi unana amo tauyadi geya sinumiseta. 8 Tauna kita tonumisayao itoboineda bei toliwola dedevidi amo toliwolayadi nakae tavaaitedi bego kita tauyadi adi tosavaiyuwoyao Yaubada ana Nanamsa Mooitamoina manuna.

Tokapipilova Diyotiripi taabu tavatootowōne

9 Livala tayamo bogina agini iwo komi Yaubada ana totugugunayao moeko goi toliwola adi vaitayana manuna go, iya Diyotiripi bego toinina iilovina, tuwo ima lovina geya ikabikaoneyeta, go sem ikapiipilave. 10 Moe pasina tutayana ao, ina sinapuyadi bei akamamaetalidi. Ina sinapuyadi ame nakae: Tauyana ina tagíwaya goi iwowokoima go, tauyana ina sinapu bóbwara kaka geya, go sem guinuwa goyogoyoidi tuwaidi iguuinuwedi. Nakae neta sedao toliwola siwo, bei ivalilivedi. Aiyuwoina avatauwa neta latuwodi bego toliwolayadi sivaitedi, e tauyana isanabodedi be nakae komi Yaubada ana totugugunayao yaimi goi ivatapiyedi.

Sinapu dedevina tavatotowōne

11 Guna kalo, sinapu goyo taabu kuvatootowōne, go sem sinapu dedevina kuvatotowōne. Avatauwa neta guinuwa dedevina siguuinuwe, kidi Yaubada ina bodao. Go avatauwa neta sinapu goyo siguuinuwe, Yaubada geya siyagoiyeta. 12 Demetariyo aba gita tayamo dedevina. Tomota liliudi sitalavaita bego tauyana koroto dedevina. Yaubada ana Nanamsa Mooitamoina isabokuliiyedoko, tauna ina sinapuyana nakae italavaita bego tauyana koroto dedevina. E kai ima talavaita nakae. Go kai ima talavaitayana bogina kooyagoi moe talavaita mooitamoina.

Iyoni ina vaduduwo

13 Kaga liliuna sikaaiyaka go, geya latuwogu leta goi alatuwokoim. 14 E aalotuta bego giyakainava ao avadadem bei taiyao tabóbwara.

15 Tuboina yaim goi! Sedao ameko idi yabobona yaim. Nakae sedao moeko guna yabobona tayamo tayamo yaidi.

Yau Iyoni