1-3 King Ahab nyunguwunbu bayanba bundandan. Garden mayiji grapemunji yuba nyunguwunbu bayanba, yamba yinya garden nyungu kari. Garden bamamu nyubunyimba, Nabothamu. Ahab wawu jirray yinyanka gardenka, yamba nyulu Nabothangka wawu kari sellim-banka. Yinyaynka Ahab milka-bujarman.

4-7 Nyunguwundu manyarrangka Jezebelangka nyungun nyajin milka-bujarku bundandanya, nyulu babajin, “Wanyurrinku yundu yalaku bundanday?” Ahabangka yalaman, “Yinyangka bamangka Nabothangka nyungu garden kari sellim-bal ngaykundu.” Jezebelangka yalaman, “Yundu maja king or kari? Ngayu yinya garden manil yunu.”

8-16 Yinyamun nyulu Jezebelangka kaban yungan maja-majanda yiringkurrku bubungu Israel. Nyulu jananda yalaman, “Murumaka, mayi jirray wayju, holidaymunku. Naboth yalarrku kunja, mayinga kadanka. Kaki nyulu kaday, yurra nyungun jurril-bunga. Balka nyulu God and king buyun-daman. Nyungun nyuya buyun-buyunku, ngana nyungun kuljibu yarkinkaku kuninka.” Jana maja-majangka Jezebelamu kuku wukurrin, Naboth kuljibu yarkinkaku kunin. Nyulu Jezebelangka kuku nyajin Nabothanka, nyulu dunyundu kinganda dungan, yalaman, “Naboth, nyulu wulankuda. Dungayda, nyungu garden mana, yunuku kujida.” King Ahab wawurr-wawurrman, yinya garden nyungukuda.

17-24 Yamba Godingku Elijahnda yalaman, “Kinganda dungay, ngayku kuku balka nyungundu. Ngayu yanyu kuku yungal Ahabanda, ‘Yundu Naboth yarkin-ban, nyungu garden maninka. Yundu nyungun yarkinkaku kuninya, yundu yalarrku wulay. Kaya-kayangka yunu mula bijal yala jana Nabothamu mula bijan. Yamba jana kayangka Jezebel bangkarr nukal.” Elijahngka God kuku-nyajin, nyungu kuku balkan Kinganda Ahabanda.

<- 1 Kings 201 Kings 22 ->