5
Buku ta kan paalin si yongwa Yon kanungwa
1 Na Yon mile kal iru kanere pare, yal ta kenin ere ke milungwa bol amin di milungwa, yalini buku ta aan wen kol aa tongwa kaniwe. Buku iray ka minin ganin ala kol bile, te miina kol para bile yomue. Ibal ta kanekinama dire, kan paalin ginin anan kole muru kole sutan si yomue. 2 Angel ta niminin wen milungwa, gala bil dungwa kaniwe. Kaniga ka iru dungwa, “Buku ta i, kan paalin si yongwa, ibena kan i pu ere buku pilaa di kanangwa kuunin painame?” 3 Dimba ibal gariba gul milungwa, te kamin mina milungwa, te gariba gul main ali milungwa, ibal para wen buku iray pilaa di kanangwa, kuunin ta erekinamue. 4 Ibal ta iru pilaa di kanama dire, waa duumba, ibal ta milekemia, ena na kay mun bile yaare miiwe. 5 Miiga yal singaba ta ka iru di na tongwa, “I kay ta miikio. I kano. Yuda gawlima kobe gawlima yal ta yobilaan bile niminin wen milungwa, Debiti gawliman ta, singaba bil milungwa, yalini kamin ibal i sutaw eremia, ena kan paalin ginin anan kole muru kole sutan si yongwa kan i, pu ere buku pilaa di kanangwa paamua,” dimue.
Yon Bolima Siipe Siipe Gawlin kanungwa
6 Te Bolima Siipe Siipe Gawlin ta si gulungwa iray ale milungwa na kanigire, kenin ere ke milungwa bol iray kole milungure, te kalkan sui sui milungwa kole milungure, te yal singaba kobe wenabe di milemue. Bolima Siipe Siipe Gawlin iray niminin wen mile gibilin sigin yaan anan kole muru kole sutan kulungure, te omilin anan kole muru kole sutan para kulemue. Te omilin iwe, God Iban anan kole muru kole sutan nusi gariba ulin kole kole para erungwa milemue. 7 God inin kenin ere ke milungwa bol amin di mile, aan wen kol buku aa te milungure, Bolima Siipe Siipe Gawlin iray pire imue. 8 Ingwa kaun i, kalkan sui sui milungwa ire, te yal singaba yal ta aan kawn muru te na anan milin sui sui ire, te yalin kobi bole, Bolima Siipe Siipe Gawlin iray kawn yaa gobin bilemue. Yalin kobi inin inin tabale bil ta gita mere dungwa aa tere, te pele bala ain yobilagi gol ere yongwa, ulgu minanin wai sungwa ali yongwa, para aa tomue. Ulgu minanin wai sungwa main iwe, God ibalin gawliman kobe ana di God tongwa mere, ulgu minanin iray di bilemue. 9 Yalin kobi iru erere geril ta kwi dire ka iru di Bolima Siipe Siipe Gawlin tongwa,
“Kan paalin si yongwa buku i ire kan i pu eranga, i para kuunin eranwa. I kuunin eranga main iwe, ibal i si gulungure, ibal kobe gibilin sire God terala dire, inin mayan garu di ibal tenwa. Ibal gibilin singa iwe, gawliman ta ta para muru ibal ta ta gibilin sirere, te ka kowa kowa, more more paangwa para muru ibal ta ta gibilin sirere, te gariba bilin ibal ta ta para muru ibal ta ta gibilin sirere, te kuru kama ibal ta ta para muru ibal ta ta i gibilin sinwa. 10 Ka main kenin ere milungwa ibal nil konagi ere God tenama dire, i kal iru ere ibalin kobi tenwa. Tengire ibalin kobi gariba gul kenin ere ke milamua.”
Kamin ai ibal deminin si Bolima Siipe Siipe Gawlin tongwa
11 Na kwi kane yebe erere, ena angel kobe tausen binanbile te tausen anan kole kole muru binanwenbile ka dungwa piriwe. Kenin ere ke milungwa bol ire, te kalkan sui sui kwi milungwa kobe ire, te yal singaba kobe ire, te yalin kobi suna milungure, angel kobi iray binan wenabe di suna ere milemue. 12 Angel kobi iru mile geril bil dire iru dungwa,
“Bolima Siipe Siipe Gawlin si gulungwa iwe, yobilaan pai yalini tere, te kalkan para muru tere, te nomanin pai tere, te yobilaan bil bile tere, te kaan gale yebe ere te maki yere deminin si tere, te kal iru ere yalini tenangwa kuunin paimua.”
13 Kalkan kobe para kamin ai milungwa, te gariba gul milungwa, te gariba main ali ime milungwa, te pirin nil ali milungwa, te kamin te gariba ain kalkan para muru geril bale yere dungwa piriwe. Geril dire ka iru dungwa,
“Kenin ere ke milungwa bol amin di milungwa yal te Bolima Siipe Siipe Gawlin yal sui milinga maki yere deminin si tere, kaan ai yebe dire deminin si tere, yobilaan pai tere, kal main iru ere i yal sui te milabingal milabinwa.”
14 Kalkan sui sui kwi milungwa kobe, ka maan di tere iru dungwa, “I kawen dinwa,” dungure yal singaba kobe yaa gobin bile mile ana dire deminin si yal sui iray tomue.
<- Rebelesen 4Rebelesen 6 ->