Rebelesen 15

Angel anan kole muru kole sutan inin inin kal ki ere ibal terala di milungwa

1 Ena iru kanere pare kamin ai kal bil ta u maribe ongwa kaniwe. Ibal kobe main ta pirama dire, kalkan i kal ta di bilemue. Kal kaniga iwe. Angel anan kole muru kole sutan inin inin kal ki ere ibal terala di milemue. God den ki ye ibal tongwa, ena kal ki ere ibal tenangwa i ere tenangure pare, God den gulungwa wei sinamue.

2 Ena iru kanere pare, nil benge ta milungwa mere kaniwe. Botol te enderin bole nuungure, u nil kol pire dima di kaniwe. Kabe biin iray te kabe biin giran guman kobile bale ere yongwa te kabe biin i kaan minin ganin bilungwa, ibal kobe kalin sutakobe yaa ime si tere milungwa para kaniwe. Ibalin kobe nil benge kan diga i binan kole ale milere, God ibalin kobe gita dungwa mere, kaan kaap, tongwa aa tere milemue. 3 Milere God nil konagi yal Mose te Bolima Siipe Siipe Gawlin yal sui konagi erungwa pire geril ta iru bale yere dire di God tongwa,

“Niminin milungwa yal, Yobilaan Kobaan, God Singaba i konagi eringa naanin pai eringa, na ibal kobe kane kul yobinwa. Gariba bilin ibal ta ta para, i ibalin kobi kenin ere ke milinga, i mile pai eringa main, kal dime di ere kawen kirara wai paangure milinwa. 4 I yal taran kal dime di ere dorimil pai milinga, ena ibena kuril pire i ta tekiname? Te ibena i kaanin gale yebe ta erekiname? Iru erangwa, ibal ta milekemua. I inin tawle kabin sire kal wai morin ere milinga, ibal para kanemia, ena gariba bilin ibal ta ta para i milinga gul ure ana dire deminin si i tenamua.”

5 Dungure pare God ka main ogu kamin mina dungwa, God di ibal tongwa ain kiile kol iray yawlungwa kaniwe. 6 Yawlungure angel anan kole muru kole sutan inin inin kalkan ki ere ibal terala di ere mile umue. Angel kobi gal pege wen sigi dire, te kobile gol kin mere ere suna werain bile i diinin mina ere domue. 7 Kalkan sui sui kwi milungwa kobe milungwa suna i, yal ta milere, kobile gol pele bala, angel anan kole muru kole sutan inin inin tomue. Pele bala ali kal ta dungwa iwe, God milangwal milangwa milere, yalini den gule tongwa main, kal iray, pele bala iray ali dimue. 8 God naabile aw dungwa, te yobilaan bil bilungwa, ena God ogin iray enegi ala maa muulemue. Angel anan kole muru kole sutan kal ki ere ibal te milungwa kaun, ogu iray ibal ala ta ole pekenangwa paamue. Kal ki ere ibal te piserangwa kaun, ibal ere ala nangwa paamue.

<- Rebelesen 14 Rebelesen 16 ->