1 Imoamoani kani n yedi yi, yua n ki tagini bu buliñoabu kani ki kua li yanloli nni, ama ki doni kaanto ki kua kuli tie sugido leni sanjalo. 2 Ama yua n tagini bu buliñoabu kani ki kua li yanloli nni, tie ipe yankpaalo. 3 Bu buliñoabu jiidikoa luodi opo, ipe mo cengi o nialu. O yini wan die yaa pe, yua kuli leni yeli, ki ñani ba. 4 O ya ñani wani die ya pe yeni, o baa cuoni bi liiga ke bi hua o, kelima bi bani o nialu. 5 Bi kan hoadi caano, ama bi baa sani ki foagidi okani, kelima baa bani bi canba niali. 6 Jesu den puaba laa kpanjama, ama baa den bandi wan maadi ba yaala yaa maama. 7 Jesu go den yedi ba: N yedi yi imoamoani mini n tie bu buliñoabu ipe po. 8 Yaaba n den kpa cua ke n daa cua kuli tie sugida leni sanjabe, ama ipe ki den cengi ba. 9 Mini n tie bu buliñoabu. Yua n kua n kani kuli baa faabi o baa koa ki go ña ki baadi mi jiema. 10 O sugido cua ki bua ki su, ki kodi, ki bolini, ama mini n cua ke ipe n ba li miali ki ya pia li bonla kuli ke li dagidi bi po. 11 Mini n tie o yankpaahamo. O yankpaahamo puuni omiali ope po. 12 Ama o tuonsoanlo yua n ki die ipe, waa tie yankpaahamo, o ya laa ke ofuasangbanlo kpendi, o baa sani ki ha ipe. O fuasangbanlo baa cuo bi tianba ki yadi yaaba n sieni. 13 O tuonsoanlo baa sani kelima waa die ipe, lanyaapo waa yagini o yama ipe. Mini n tie oyankpaahamo. 14 N bani n pe, n pe mo bani nni. 15 Nani Baa n bani nni, ke n moko bani Baa maama, n puuni n miali n pe po. 16 N pia yaa pe n kaa ye li naa yanloli nni, n baa cuani bani moko, bi baa gbadi n nialu, n baa pia yangoyenli leni yankpaayendo. 17 Baa bua nni, kelima n puuni n miali, ki go baa guani ki gaa n cili. 18 O bakuli kanfie nni li, n pia upaalu ki baa pali, n go pia upaalu ki baa gaali, lani tie min den baa yaa ñoabonli n Baa kani. 19 Mi paadima go den tieni Jufinba siiga kelima laa maama po. 20 Bi siiga boncianla den tua: O pia ki cicibiadiga, o gaade, be yaapo ke yi cengi o? 21 Bi tianba den tua: Cicibiadiga ka, cicibiadiga ba fidi ki nuadi juama? 22 Li den tie ku fawaagu yogunu, ke bi jaani yaa jaanma n yi U Tienu diegu gagidima jaanma Jelusalema po. 23 Jesu den cuoni ki gaandi U Tienu diegu nni, Salimono ciagu tinga. 24 Jufinba den taani ki lindi o, ki yedi o: Hali u laa yogunu yo ke a baa waani ti, ti yama n duani? A ya tie U Tienu n gandi yua han kadi ki waani ti. 25 Jesu den guani ki yedi ba: N waani yi, ama yii daani, min tuuni ya tuona, n Baa yeli nni tiendi n po siedi. 26 Ama yii daani kelima yii tie min die yaa pe siigs yaaba. 27 N ya pe cengi n nialu. N bani ba, ban mo huani. 28 N puuni ba yaa miali n kan gbeni. Bi kan bodi hali abada. O bakuli kan fieba n nuu nni mo. 29 N baa yua n puni nni ba cie yua kuli. O bakuli kan fidi ki fieba, n Baa nuu nni mo. 30 Mini leni Baa tie yendo. 31 Jufinba go den taa a tana ki baa madi o. 32 Jesu den yedi ba: N teni ke yi laa atuonhama boncianla, yaa n ñani nBaa kani. Li laa tuonli yaapo yo ke yi baa madi nni atana? 33 Jufinba den guani ki yedi o: Ti kan madi a, atana kelima tuonliba po ka, ama han sugidi U Tienu yeni, kelima fini yua n tie nisaalo tua ke a tie U Tienu! 34 Jesu den guani ki yedi ba: Naani laa diani yi balimaama nni ki yedi: N yedi ke yi tie tieni? 35 Li ya tie ke U Tienu yedi ke wan maadini yaaba tie nani yi tieni yeni, ke ti bani ke idiani mo kanlebidi. 36 li nan gaa lede yo ke yi yedi: ke mini yua tie U Tienu n gandi ki gagidi yua ki soani o handuna nni sugidi U Tienu kelima n yedi ke n tie U Tienu Bijua po? 37 N yaa tuuni n Baa tuona yin da daani n maama. 38 Ama n ya tuuni o tuona, baa ke yii daani n maama, daani mani kelima min tuuni ya tuona po, yi bandi ki go ga ke Baa ye n niinni, ke n mo ye Baa niinni. 39 Lanyaapo bi go den lingi ki baa cuo o, ama o den ciadi bi nuu nni. 40 Lane Jesu go den gedi Judana kpenu kandima, Jan n den kpa batisi bi niba naankani, ki kali li kani. 41 Bi niba boncianla den kpendi o kani, ki tua: Jan ki den tieni bancianma ba. Ama wan den maadi yaa maama o naajoa po kuli tie moamoani. 42 Li kani bi niba boncianla den daani o.

<- Jan Laabaalihamo 9Jan Laabaalihamo 11 ->