1 Nawu Lamb nuye Kod ka‑djal‑karrme scroll kure kubid nuye munguyh. Ngayi nga‑nang Lamb dangmarrhmey nakudji ngolin nawu bidi. Wanjh nga‑bekkang nakudji mayh nawu narrarkkid wokdi wokyimeng yiman namarrkon, yimeng “Yim‑ray!”

2 Wanjh ngayi nga‑bolknang kumekke kure kumirrk ngardduk nga‑nang djarrang dingih‑di nawu kukbele. Bininj nawu barndi kure djarrang karrmeng bunarrang mak bi‑wong ka‑karrme kodjkolng crown. Wanjh wam, bebmeng kure djarrang nuye. Kaluk nungka nabang nawu bu ka‑winhme munguyh kure ka‑djare kaben‑bun bininj rowk kure kabirri‑burren‑kenh.

3 Nawu Lamb dangmarrhmey nabuyika ngolin nawu bidi wanjh kumekke nga‑bekkan nabuyika mayh nawu narrarrkid yimeng, “Yim‑ray!”

4 Wanjh kukbuyika bininj kam‑barndi kure djarrang nawu kukkurlba. Nakka wanjh ka‑karrme kunrid kaben‑marnbun bininj kabirri‑burren mak kabirri‑yolyolmerren. Kaben‑marnbun bininj bu kabirri‑burren kondanj kukurlk, nawu bi‑wong sword mandjawak nakimuk‑kenh.

5 Nga‑nang Lamb dangmarrhmey nabuyika ngolin. Nga‑bekkang nabuyika mayh nawu narrarrkid yimeng, “Yim‑ray!” Wanjh nga‑bolknang nga‑nang ngardduk, mak nga‑nang ngal‑kuk‑kurlduk djarrang, kamh‑barndi bininj ka‑karrme “scales” kure kubid nuye ka‑rohrokme njalehnjale.

6 Wanjh nga‑bekkang yiman kam‑wokdi kure kuburldjdjarn bedberre mayh nawu birri‑darkkid. Bu wokdi yimeng, “Minj ka‑wernh‑djordmen manme. Bu ngudda yi‑djare yi‑yawoyh‑bayahme manme nguddangke. Ka‑bidbun nawern kunwardde (money). Kure nawern kunkalkid oil mak wine kunbang.”

7 Mak kunyawoyh‑kudji nawu Lamb yawoyh‑dangmarrhmey nabuyika ngolin. Mak nga‑bekkang kam‑wokdi kukbuyika mayh nawu narrarkkid, yimeng, “Yim‑ray!”

8 Nga‑nang djarrang nawu medj‑yimeng kunyahwurd yiman kurlah-buyika. Bininj nawu kabi‑mornekan nakka ngeyyoy ‘Kundowikenh’. Nabuyika bininj bi‑munkekadjuy. Nungka ka‑ngeyyo ‘Kumekke kunred kure bininj nawu birri‑doweng kabirri‑dukkayindi’.

Nakudji ben‑munkeweng, ben‑marneyimeng, “Ngurri‑ray ngurrben‑bun kure kubolkbuyika kabirrih‑ni. Birribuyika ngurrben‑bawon.”

Benebokenh kabindi‑bun mandjawak dorrengh. Birribuyika mak kabindi‑marnbun bu kabirri‑dowen kunmarrwe. Birribuyika mak kundjak kaben‑bun. Birribuyika bininj mayh kabindi‑bun.

9 Nawu wanjh Lamb dangmarrhmey nabuyika‑wali ngolin, wanjh nga‑bolknang kandji kure altar kunmalng bedberre birrimekke nawu bindi‑bom kure birri‑woybukwong Kod nuye kunwok, mak birri‑weykang Kod nuye kunwok.

10 Wanjh birrimekke bedberre kunmalng birri‑kayhmeng wernkih, bu birri‑yimeng, “Yi‑kukdjamun nawu Yi‑woybuk kure Yi‑worhnan Yi‑kimuk, baleh kure ka‑bolkyime bu yiben‑djadme bininj kure kondanj kukurlk kabirrih‑ni mak yiben‑mangdurndiwe kure ngad‑kenh kure ngandi‑bun ngadberre?”

11 Bindi‑wonowong kunmadj nawu kornam-kuyeng nawu nabele, wanjh bindi‑marneyimeng bu kabirri‑madbu kunyawu‑kuyeng, birribuyika mak nawu djakerr, yabok kabindi-bun, kabirri-doweng bedda nawu karri‑djarrk‑marnedurrkmirri nuye Kod. Wanjh bonj. Kod ka‑bengkan bu birringale bininj.

12 Nga‑djal‑nang munguyh nawu Lamb bu dangmarrhmey nawu 6th ngolin, kure bolkroh‑bolkrokang bu wernkih duninj, mak kundung makka mununminj yiman burlerriminj. Nawu dird kukbuyikahminj kurlbahminj yiman kunkurlba rerrih.

13 Mak kinhkin kure kungol‑beh kam‑warrahwarrhmeng kure kondanj kukurlk yiman manme manbu mandak ka‑warrahwarrme kure kunkurra mankimuk ka‑woh‑djorrhke kundulk.

14 Manbu kunngol makka yakminj yiman djurra scroll dornamerrinj. Mandulum rowk mak manyunkurr rowk makka djirrkkarrinj rowk kure kubolk‑buyika.

15 Wanjh birriwern bininj kabirri‑warlkarren kure kuwardde‑wardde‑rurrk kure mandulum ngalengarre. Bininj nawu birrikodjkimuk kabirri-warlkarren, mak bininj nawu kabindi‑marne‑worhnang kure army, mak nawu birri‑kuken. Mak bininj nawu kabirri‑dukkayindi, mak birribuyika bininj rowk, bedda rowk birri-warlkarren kure kuwardde-wardde-rurrk kure mandulum ngalengarre.

16 Mak birri‑marne‑kayhmeng manbu kunwardde bu birri‑marneyimeng, “Yim‑wardde‑warrhmen, kan‑barrkbun ngadberre, kan‑warlkan ngadberre kure Kod nawu kah‑ni kure throne, nawu kure Lamb bu bedda ngandi‑dung ngadberre.

17 Manekke benbekad korroko wanjh kam‑wam! Bu Kod mak nawu Lamb kabene‑bebke kunkange‑rid berrewoneng, nangale minj kaben‑mirrkmang berrewoneng.

<- Revelation 5Revelation 7 ->