14 Jesus ben-karrmeng 12 djawirna. Nakudji namekke bininj nawu ngeyyoy Djudas Iskariod. Wanjh wam ben-yikang kure nawu birri‑kihkimuk djungkay kure birri-wokmarnburrinj. 15 Nungka ben-djawam kunwardde, bu ben-marneyimeng, “Njale kandi‑karremulewan bu Jesus bidkenwon ngudberre?” Bedda wanjh birri-wong kunwardde nawu 30 silver coins. 16 Wanjh bu rerre Judas dedjmey bolkyawam baleh keno bu Jesus kabirri‑mang nawu birriwarre bininj.

17 Mandjewk la mandjewk, Djus bininj birri-karrmeng mulil kunkamak ngeyyoy Manlod-berelhmiken Kandidjdjawa. Kunyungki benbekad kunkamak birri-karrmeng Passover mulil. Kunekke benbekad rerrih, djawirna nuye birrim-yikang Jesus, birri‑djawam, “Baleh yi-djare ngarri-marnbun ba manme karri‑ngun manbu Passover mulil?” 18 Wanjh Jesus yimeng, “Ngurri-ray kure kubolk-kimuk wanjh ngurri-nan namekke bininj, ngurri-marneyimen, ‘Nawu Kanbukkan ka-yime korroko wanjh darnkih kamh-re ka‑bolkyimerran nuye. Ka-djare Passover mulil ngarri‑ngun nuye djawirna kaluk kure nguddangke kurrambalk.” 19 Wanjh djawirna nuye birri-wam, kure birri-yingkih-marnbom ngalengarre Passover mulil.

20 Kaluk bu ngokdanj, Jesus wanjh neyhneykendi kure balabbala ‘table’, birri-djarrk-nguneng nawu 12 djawirna. 21 Wanjh bu birrimekke birri-nguneng manme, Jesus ben‑marneyimeng, “Ngayi woybukki marneyime ngudberre: nakudji bininj ngudberre ngan-kukweykan kure birri-warre bininj.” 22 Bedda ben-njilng-warrewong nuye djawirna. Wanjh birri‑bebbeh-marneyimeng Jesus, “Nawu Yiworhnan, yiddok ngayi kukweykan ngudda?” 23 Jesus yimeng, “Nawu ngane-djarrk-bid-djuhme kure ngalanno wanjh namekke ngan-kukweykan.” 24 Kaluk ngan-marne-bolkyimerran ngayi nawu Bininj Duninjh kure ka-kurduyimerran ngardduk. Ngayi nga-rrowen. Wok‑kurmerrinj Ngabbard kunkare. Bininj ngan-kukweykang ngayi, kukwarrewong kure Ngabbard. Nungan Ngabbard kaluk kabi-kukmorrong namekke bininj bu munguyh munguyh. Kunukka kamakniwirrinj.

25 Djudas korroko bengkan bu Jesus bi-marneyimeng. Wanjh yimeng, “Nawu Kanbukkang, yiddok ngayi kukweykan ngudda?” Wanjh Jesus yimeng, “Yoh. Makka nguddangke kunwok.”

26 Kaluk bu kumekke bedda birri-nguneng manme, wanjh Jesus lod-mey manbu kandidjdjawa wanjh bi-manjbom Kod. Rerre wanjh lod-bakkeng, wanjh ben-wong nuye djawirna wanjh ben‑marneyimeng, “Ngurri-ma mane kandidjdjawa, wanjh ngurri-ngu. Mane wanjh kundarrkid ngardduk.” 27 Wanjh ngalanno warridj mey, bi-yi-manjbom Kod, wanjh ben‑bowong nuye djawirna wanjh ben‑marneyimeng, “Ngurri‑wern ngurri-bongu mane. 28 Mane ngardduk kunkurlba manbu ka-menyime bu Kod wok‑kurrmerrinj bu mulewarrinj nungka ka-djare kaben‑bengmidjdan bininj. Mane kunkurlba ngardduk ka‑bowarrhme bedberre birri-djal-wern bininj ba bu Kod kaben-bengmidjdan bedberre kure kunwarre. 29 Kune wanjh bengdayhke ngudberre, ngayi minj nga‑yawoyh‑bongun mane barnem-no kunkalkid, kaluk karri‑yawoyh‑djarrk‑bongun bu rerrikah kumekke kure kubolk‑kimuk Ngabbard kah-ni nawu Kaworhnan Rowk ngardduk.”

30 Kaluk bu birri-wayini manbu yiwarrudj wanjh birri-wam kure mandulum kabolkngeyyo Olives.

31 Wanjh Jesus ben-marneyimeng djawirna nuye, “Bu bolkkime kukak ngudda kandi-bawon, ngurri-kelerlobme. Korroko Kod yimeng nawu: “Ngayi nga-bun nawu shepherd, nawu mayh sheep wanjh nakka kabirri-kelerlobme kure kubolk-buyika.” Kod wokkurmerrinj kure Nadjamun Djurra. 32 Kaluk bu rerre Kod ngan-dolkkayhwe kure kumidj. Kaluk nga‑yingkih-dokme ngudberre kure kunred Kalili.

33 Wanjh Bida (Peter) yimeng, “Bedda birriwern kabirri‑kelerlobme, ngayi minj nga-kelerlobme bu ngudda‑kenh.” 34 Kaluk Jesus bi-marneyimeng, “Nga-yime ke woybukki, Bu bolkkime kukak, ngudda wanjh kan-waral-kuk-wakwan bu bokenh kunkudji-kenh, bu rerre bawurl ka-kayhme.” 35 Wanjh Bida (Peter) yimeng, “Kunukka minj ngayi nga-yime bu waral-kuk-wakwan! Ngayi ngarr-djarrk-di kure baleh ngayi nga‑rrowen kure ngudda!” Mak nawu birriwern djawirna nuye nakka mak warridj kunekke rerrih birri-yimeng.

36 Wanjh Jesus birri-djarrk-wam nawu djawirna nuye ben‑bukkang kure kunred ka-bolk-ngeyyo Kedsemani (Gethsemene). Wanjh ben‑marneyimeng, “Kondanj ngurri-nin nga-re kuni. Nga-rri yiwarrudj.” 37 Jesus ben-kang Bida (Peter) mak bene-bokenh nawu bebeywurd nuye Zebedi, nungka dedjmey bu njilng-warreminj mak kange‑warreminj. 38 Wanjh ben-marneyimeng, “Ngayi nga-njilng-warre kure kandji ngardduk kundurddu ka-djokkohme. Wanjh kondanj ngurri-nin, ngurri‑bolknahna bu ngayi ngam-durndeng.”

39 Kaluk bu wam kure minj djarreh-kah la darnkih, kumekke kukwerrinj kumirrk nuye kure kukurlk wanjh yiwarrudj di, wanjh yimeng, “Ngabba, wanjh kune kamak, wanjh yuwn kan‑bowon mane ngalanno kure nga‑bongun manbu kure nga‑djak‑bekkan-kenh. Wanjh bonj, nga-kurduyime kure ngudda yi-djare, minj kure ngayi nga‑djare.”

40 Wanjh Jesus durndi kure djawirna nuye, wanjh ben-nang birrih-kodjdjeyoy. Wanjh bi‑marneyimeng nawu Bida (Peter), “Ngudda minj karri‑djarrk‑worhnayinj bu kundjungbu? 41 Mak ngurri-bolk-nahna mak yiwarrudj ngurri-din ba kunukka kunngudj ngun-won ngudberre mak nawarre minj ngun‑djurrkkan ngudberre mak ngun-marnbun bu ngurri-yime kunwarre. Wanjh kunmalng ngudberre makka ka-djare kunmak ka-yime, mak kungudj kure kunburrk ngudberre makka manngudj-warre.”

42 Jesus durndi yawoyh-di yiwarrudj, yimeng, “Ngabba, minj nga-djare nga-djak-bekkan. Kure ngudda yi-djareni bu nga‑djak-bekkan, kune wanjh ngayeman nga-kurduyime kure ngudda yi-djareni ngardduk.

43 Wanjh yawoyh-durndi ben-nang birri-kodjdjeyoy, birri‑kodjdjewakwarrinj. 44 Wanjh Jesus durndi bokenh kunkudji-kenh di yiwarrudj, kunyawoyh-kudji yimeng mankare yerrih kunwok.

45 Wanjh Jesus yawoyh-durndi kure djawirna nuye kure birrih‑yoy, wanjh yimeng, “Yiddok ngudda ngurri‑djal‑kodjdje‑mulmurrngkarren mak ngurrih‑djal‑yo? Ngurri-na! Wanjh korroko kamh‑yimerran kamh-re darnkih nawu bininj ngan‑kuk‑weykang ngayi nawu Bininj Duninjh kure birriwarre bininj ngandi-mang. 46 Wanjh ngurri-dolkka, karri-re. Wanjh ngurri-na nane nawu bininj kamh-re nawu ngan-djarrwarraykang, ngan-kuk-weykan.”

47 Bu Jesus munguyh wokdi-wokdi wanjh Judas kam-wam nawu birri-djarrk-wam 12 kure Jesus nuye djawirna. Mak birri-wern bininj birrim-djarrk-wam nawu birrim-kang mandjawak mak kundulk. Nawu birrikihkimuk djungkay mak nawu dabborrabbolk nawu bindi-marne-worhnang bininj wanjh bindi-munkeweng. 48 Korroko Judas karremarnbom bu ben-bengdayhkeng bu yimeng, “Wanjh bininj nawu nga-bunjhmang wanjh nakka Jesus nawu ngurri-mang.” 49 Kaluk kunekke rerrih Judas bi-yikang Jesus, bu yimeng, “Ngudda nawu kanh-bukkang! Kamak bu ngarr-keb-narren”. Rerre wanjh bi-bunjhmey. 50 Wanjh Jesus yimeng, “Nawu ngarr-dabbolk, wanjh yi‑djal‑kurduyimen kure yim-wam-beh.” Wanjh birrimekke nawu birrim-yorrmeng birrim-wam birri-darrkid-mey Jesus.

51 Kaluk bu kumekke birri-mey Jesus, wanjh nakudji bininj nawu Jesus djawirna nuye yirrhmey nawu mandjawak nakimuk wanjh bi-kanem-dadjdjeng nawu bi-marne-durrkmirri nuye djungkay. 52 Wanjh Jesus bi-marneyimeng namekke nawu nuye djawirna, “Yi-bawo nawu mandjawak nakimuk. Yi‑kurrmen kure yi-mey. Nangale nawu ka-mang mandjawak, nakka wanjh mandjawak kaben-bun. 53 Ngudda minj ngurri-bengkan bu nga-djare-niwirrinj nga‑djawayinj Ngabbard, wanjh ben-munkewemeninj birriwern angels nawu 12 djuram. 54 Wanjh bonj, nga-djare ka-kurduyimerran ngardduk kure Djurra Nadjamun ka-wok-bimdi ngardduk kure ngan‑yolyolmeng kunkare.”

55 Wanjh Jesus ben-marneyimeng birriwern nawu birri-kuniwam. Yimeng, “Ngudda kandi-kuniyikang mandjawak dorrengh mak kundulk dorrengh, yiman ngayi nabang rerre. Bu kunbenbekad‑kuyeng rowk, ngayi ngah-ni kure Temple kure kuberrk bu ngaben‑bukkang, minj ngudda kumekke kandi-mayinj. 56 Wanjh kuneng rowk kure baleh kurduyimerranj wanjh ka‑woybukkenwon kure birri-kare birri-bimbom kure korroko birrih-ni.” Kune bu Jesus yimeng. Wanjh djawirna nuye birri‑bawong, birri-kelerlobmeng.

<- Matthew 25Matthew 27 ->