3 Bu ngayemandeleng, kunwarre ngakurduyimeng dja minj ngawarnyakmulewarrimeninj, dja mak ngadjalni wokyak, wanjh ngahkanjbabang ngangudjwarremen kore kunburrk ngardduk. Dja mak ngaye ngangeymiyoh bu barnangarrakuyeng. 4 Yoh, Yawey, kore barnangarra ngarre kunwern dja mak kunkakwern ngarre bu ngudda kandulmukwoni kunwarrekenh ngardduk. Wanjh kunngudj ngardduk makka yakminj yiman kayime kundungbang manbu nganngudjwarrewon. 5 Wanjh ngaye ngawarnyakmulewarrinj bu ngayolyolmerrinj bu ngudda marnemulewarrinj. Minj mak ngawarlkkayi kunwarrekenh ngardduk. Ngaye wanjh marneyimeng ngudda nawu Yawey, bu ngayimeng, “Bu ngaye ngamulewarren kore kunwarre ngakurduyimeng ke.” Wanjh ngudda yibularrbom rowk kore kunwarre ngardduk.
6 Wanjh kunmekbekenh kunu marneyime ngudberre bininj nawu ngudda ngundingeyburrbun, nakka wanjh yiwarrudj birridjaldin nawu bedda ngundiyawan. Mak kunrayek manbu kabenmarnewayhme bedberre, yiman kukku manbu kahbokimukmen wanjh kunukka minj kabirrikebngakme. 7 Ngudda nawu Yawey yidjalkudji ngardduk nawu kankukbalhme, bu kunrayek kabebme ngardduk ngudda kanmarnekukdjurruddi. Ngudda kankurrme bu ngundimarnekayhme ngarriyime, “Ngudda Yawey nawu kanngehkeng ngadberre.”
8 “Ngaye nawu bolhbukkan ngudberre kore mandjad ngurribolhkadjung, dja mak bengdayhke bu nahnan ngudberre kore ngudda ngurrire. 9 Dja yuwn bu ngurrimayaliyimerran yiman djarrang nawu minj njale kaburrbun. Dja nakka bininj kabidjalbongkanakan kunyarl dorrengh ba kunukka kabidarnhyikan.”
10 Nawu birriwarre bininj nakka kabirrikarrme kunrayek duninjh. Nungka Yawey kabenmarnedjare bininj nawu birrikangewoybukwon, dja mak kunmakmak nuye makka kabenborledmingun munguyh. 11 Mah, ngudda nawu ngurrimak bininj, ngurrinjilngmaknin dja mak ngurrimarrmarrnin kore Yawey. Ngudda nawu ngurrimayalimak, wanjh ngurrimarnewayinin nuye.
<- Psalms 31Psalms 33 ->