Salmos 63

1 Xeruete, ndee ma Xeruete imbaraete va'e.

Xee ma roekaa rupi anhea'ã aikovy.

Ndere ma xerekovea nda'eveive.

Xerete re voi aendu ndere anhembojaxea,

yvy ipiru reia rupi yy re nda'evei va'e rami.

2 Mba'eta ndevygua henda iky'a e'ỹ va'e py aĩ vy

aikuaa pota va'ekue nembaraetea ha'e nerexakãa re.

3 Mba'eta xerekove 'rãgue py xee arovy'ave ndee xemboaxya.

Ha'e rami vy rogueroporaei 'rã.

4 Ha'e rami vy roguerovy'a 'rã aikove teria ja,

nderery rupi xepo aupi 'rã guive.

5 Xenhe'ẽ py avy'a nhandy ha'e xo'o hee va'e ha'u vy avy'aa rami avi.

Roguerovy'aa rupi xejuru py rogueroporaei.

6 Xerupa py xetuia rupi voi xema'endu'a 'rã ndere,

pyávy ndakevei vy aikuaa pota 'rã ndere,

7 xepytyvõa reiko ramo.

Ndepepo'ã py anhemi vy aporaei 'rã vy'a rupi.*

8 Xenhe'ẽ ma ndere anho oĩ.

Ndepo reiporu kuaa regua re xejopy.

9 Ha'e rã xerekovea oipe'axe vy xereka va'e kuery ma

ho'apa 'rã yvykua vaikue py.

10 Remboaxa 'rã kyxe py ipo'aka va'e kuery pe,

jagua-tuvy nhe'ẽ rembi'urã rive ikuai aguã.

11 Ha'e rã huvixave ma ovy'a 'rã Nhanderuete re.

Hery rupi oura va'e kuery avi ovy'a 'rã okuapy.

Ha'e rã apu rupi ikuai va'e ma okyrirĩmba 'rã.

Hovaigua kuery gui oepy aguã re ojerurea ague

Jogueroporaei va'e pe mboraeirã Davi ombopara va'ekue.