49
1 Ha'e javi regua, pendu pota ke pova'e.
Yvy re pendekoa va'e ha'e javi, pejapyxaka ke.
2 Yvyĩgue'i ha'e yvatekueve,
perekopa va'e ha'e pendeporiaukue'i ha'e javi.
3 Ha'e gui xejuru py xeayvu 'rã 'arandu re,
xepy'a py 'arandua re anho 'rã aikuaa pota.
4 Ajapyxaka porã 'rã mba'emo re ombojoja vy ijayvua rã,
ndoikuaai pyre amombe'u porãve 'rã ixã reta va'e pu rupi.
5 Mba'e re tu jexavaia ára py akyje 'rã?
Xerakykue monha okuapy va'e ma teko vai rupi xejoko rei teĩ.
6 Ha'e kuery ma omba'e rei-rei re rive ojerovia,
mba'emo oguereko va'e re rive ovy'a va'e.
7 Anhetẽ avave rei ndojogua kuaai 'rã guyvy rekove.
Nhanderuete pe nome'ẽ kuaai 'rã jogueraa jepe aguã regua.
8 Mba'eta joekove jajogua aguã ma hepy vaipa.
Raka'e rã peve nanhanhea'ãvei 'rãgue
9 jajapo aguã oikove riae aguã rami,
yvykua py oguejy e'ỹ aguã.
10 Ha'e gui jaexa rã hi'arandu va'e voi omano 'rã.
Hi'arandu e'ỹ va'e ha'e ndoikuaai va'e joo rami meme 'rã opa,
ha'e amboae pe ju oeja 'rã omba'e rei-reikue.
11 Opy'a py aipoe'i: “Xero opa e'ỹ va'e hi'aĩ,
xerekoague ma raka'eve rã ikuai va'e peguarã” he'i teĩ.
Ha'e rami vy guery rupi ae 'rã omboery oyvy.
12 Ha'e rami teĩ avakue ojejou porã va'eri nda'ikuai riaei 'rã.
Ha'e rami 'rãgue py mymba rami avi okanhy 'rã.
13 Ha'e rami ikuai ojee ae ojerovia va'e,
hemimbo'e kuery ijayvua oguerovy'a va'e voi.
14 Ha'e rami teĩ vexa'i rami avi omboguejya 'rã yvykua py.
Ha'e kuery re opena va'erã ma manoa.
Yvykua katy meme 'rã oguejy.
Ha'e py ma iporãague hu'ũmba 'rã.
Ha'e kuery rekoarã oĩ va'e ma yvykua ae.
15 Ha'e rã xerekove ma Nhanderuete oepy 'rã manoa po'akaa gui,
ojea py xereru vy.
16 Penhemondyi eme amongue imba'e rei-reipave ovy rã,
ha'e ngoo pyguarã mba'emo porã ojouve ovy teĩ.
17 Mba'eta ha'e kuery omano vy mba'eve ndogueraai 'rã ngupive,
mba'emo porã oguereko va'ekue nomoirũvei 'rã.
18 Oikove teri jave ojejou porã 'rã,
ha'e ojeupe guarã ojou reta rã pavẽ ojou porã teĩ
19 ha'e va'e oo avi 'rã tuu kuery ooague py,
hexakã ndoexavei aguã py.
20 Avakue ojou porãmby nai'arandui vy
mymba rami avi 'rã okanhy.
Anhetẽ rupi Nhanderuete nhamboete aguã regua
Mboraeirã Asafe ombopara va'ekue.