44
1 Oreruete, oreramoĩ kuery orevy omombe'u rã
roendu ma oreapyxa py
yma rupi rejapo va'ekue, ha'e kuery ikuai teri jave.
2 Ha'e jave py ma ndepo py reipe'apa raka'e yvy regua kuery,
ikuaiague py oreramoĩ kuery ju remoĩ atã aguã.
Yvy regua kuery remoingo axy,
ha'e rã oreru kuery pe ma reme'ẽ opa rupi ikuai aguã.
3 Okyxe py e'ỹ ha'e kuery oipe'a yvy,
imbaraete vy e'ỹ guive ipo'aka.
Ha'e rami 'rãgue py ndepo, ndejyva ha'e nderova rexakãa py
rembopo'aka raka'e ha'e kuery reayvu vy.
4 Xeruete, ndee ma xeruvixave.
Rejapo Jacó kuery ipo'aka aguã.*“Jacó kuery” he'ia ma Israel kuery re ijayvu vy.
5 Ndee orepytyvõ ramo orepo'aka 'rã orerovaigua kuery re.
Nderery rupi ropyrõ 'rã orere opu'ã va'e re.
6 Xerapa re e'ỹ ajerovia,
xekyxe e'ỹ guive xereraa jepe 'rã.
7 Mba'eta ndee anho orerovaigua kuery gui orerepya reiko,
remoxĩmba 'rã orere ija'e e'ỹ va'e.
8 Oreruete re ae rovy'a riae,
raka'e rã peve roporaei 'rã nderery rupi.
9 Ha'e rã aỹ ma ndee oremombo ma mombyry,†Apy ma ijayvu Nhanderuete ha'e kuery re hovaigua kuery ipo'aka aguã rami oejaague re.
ore kuery ju roxĩmba aguã py oremoĩ.
Ndereovei guive orexondaro kuery reve,
10 oreapo guive orerovaigua kuery gui ronhamba aguã rami.
Ha'e orere ija'e e'ỹ va'e kuery orereraa guembiguairã.
11 Vexa'i rami oremboaxa ma orejuka aguã katy.
Oremoaĩmba yvy regua kuery mbyte rupi.
12 Mba'eve re'ỹ guive remboekovia ndevygua kuery,
hepykue re mba'eve rejou aguã e'ỹ guive.
13 Ndee oreapo orea katy'i ikuai va'e gui roxĩmba aguã rami.
Orembojere okuapy va'e orere ijayvu rei ha'e orejojai rei.
14 Omombe'u pyrã rami oremoĩ yvy regua kuery mbyte.
Amboae regua oremboetea rupi e'ỹ ombovava-vava oakã.
15 Axĩmbaa oĩ riae xere,
xerova re axĩmbaa anho ojekuaa,
16 aendu xembojaru rei va'e, ijayvu vaikue-ikue va'e ojapukai ramo,
xerovaigua kuery xejukaxea aikuaa vy.
17 Ha'e nunga ha'e javi orere oiko.
Ha'e rami teĩ ndorerexarai ndegui,
ndorojepe'ai guive ndereve guarã rejapo va'ekue gui,
18 orepy'a py ndorojevyi ha'ekue py,
ndorojavyi guive ndeguigua tape.
19 Oremou'ũ ukapa jagua-tuvy nhe'ẽ ikuaia py,
ha'e manoa'ã py oreao'i.
20 Oreruete rery gui orerexarai va'e rire,
ha'e rami e'ỹ vy tuuete ramigua rive pe orepo roupi va'e rire
21 ha'e ramo nda'u Oreruete ndoikuaai 'rãgue teve?
Ha'e ma nhandepy'a re oĩ va'e oikuaapa.
22 Ha'e rami avi ndevygua orekuai ramo ae
ko'ẽ nhavõ oremboaxaa orejukaarã pe.
Vexa'i ojukaa aguã katy heraa va'e rami orekuai.*Romanos 8.36
23 Emyĩ ke! Senhor, mba'e re tu reke?
Ema'ẽ ju ke orere, orejou vai riae eme.
24 Mba'e re tu nderejexa ukavei?
Nderexarai teve roiko axy vy rojexavaia re?
25 Mba'eta orerekovea ojexavai yvy ku'i peve,
orerete voi yvy re oje'apa maa rami.
26 Epu'ã ke orerepy aguã.
Orereraa jepe ndeporayvua rupi.
Huvixarã Nhanderuete omoĩ va'e ha'e hembirekorã re ijayvua
Jogueroporaei va'e pe Coré ra'y kuery nhombo'e aguã ombopara va'ekue. Mboraei mborayvu regua, “Yvoty lírio” he'ia py oporaeia rami oporaei aguã.