37
“Heko vai va'e ovy'aa opa voi 'rã” he'ia
Mboraeirã Davi ombopara va'ekue.
1 Heko vai va'e kuery rexa teĩ eroangeko eme,
ejou vai eme guive joapo vai rei va'e oguerekopa ramo.
2 Mba'eta ha'e kuery ma are'ỹ re ipiru 'rã nhuũ rami,
jai rogue pyau ipirua rami 'rã okanhy.
3 Ejerovia Senhor re, ndereko porã tema.
Eiko tema yvy re, anhetẽ va'e re anho eĩ atã.*Apy “Yvy” he'ia ma ojeupegua kuery pe Nhanderuete oeja va'ekue re ijayvu vy.
4 Senhor ae erovy'a.
Ha'e ramo ha'e ojapo 'rã ndepy'a py reipotaa oĩ va'e.
5 Senhor po py emboaxa reikoa, hexe ejerovia guive.
Ha'e ramo ha'e ojapopa 'rã.
6 Ha'e vy ojapo 'rã ndereko porãa tataendy rami ojekuaa aguã,
anhetẽ rupi reikoa oikuaa uka 'rã kuaray mbyte rami.
7 Epytu'u ke Senhor re, ha'e earõ.
Eroangeko eme avakue mamo rã ooa rupi ojoupa ramo,
neĩ joapo vaixea rupi ikuai ramo voi.
8 Ejepe'a ndevaia gui, ndepoxyve eme.
Nda'evei opa marã ndepy'a aguã.
Ha'e rami e'ỹ vy ndee ju 'rã ndereko vai.
9 Mba'eta heko vai va'e ma omombaa 'rã.
Ha'e rã Senhor oarõ va'e ma ikuai porã 'rã yvy re.
10 Are'ỹ'i re heko vai va'e ndoikovei 'rã.
Oĩague py reka teĩ nderejouvei 'rã.
11 Ha'e rã oiko rive'i va'e ma ikuai porã 'rã yvy re,
ha'e kuery ovy'a 'rã okuapy ikuai porã aguã ojou vy.*Mateus 5.5
12 Heko vai va'e onhembopy'a 'rã heko porã va'e rovai,
haĩ jekyty 'rã ojukaxe vy.
13 Ha'e rami teĩ Senhor ojojai 'rã,
opaga aguã ára ovaẽ rai'i maa oikuaa vy.
14 Heko vai va'e kuery oekyi okyxe, guapa guive oipira 'rã
ojuka aguã iporiaukue'i ha'e ojexavai rei va'e,
ojuka aguã tape porã rupi oiko va'e.
15 Ha'e rami teĩ ikyxe py ae 'rã oikutua ipy'a re,
hapa avi omopẽmbaa 'rã.
16 Peteĩ heko porã va'e mbovy'i oguereko teĩ
mbovy e'ỹ heko vai va'e oguerekopa va'e gui ovareve.
17 Mba'eta heko vai va'e po'akaa ma omombaa 'rã.
Ha'e rã heko porã va'e re ma Senhor onhangareko.
18 Senhor oikuaa anhetẽ rupi oiko va'e oikoa,
ha'e kuery pegua ma raka'e rã peve guarã oĩ.
19 Mba'emo vai oiko teĩ ha'e kuery noxĩmbai 'rã,
karuaia ára teĩ hevyatãmba 'rã.
20 Ha'e rã heko vai va'e ma okanhymba 'rã.
Nhuũndy rami 'rã Senhor rovaigua kuery okanhymba,
hataxĩrã rive nhuũ okai vy ojeapoa rami.
21 Heko vai va'e ma oiporu aguã re ojerure teĩ nomboekoviai 'rã.
Ha'e rã heko porã va'e ma nhomboaxy vy ome'ẽ rive 'rã mba'emo.
22 Senhor ogueroayvu porã va'e hekoa 'rã yvy re.
Ha'e rã ijayvu vaia va'e ma okanhymba 'rã.
23 Heko porã va'e Senhor oikoa oguerovy'a vy
ojapo 'rã oĩ atã aguã rami.
24 Ha'e kuery ho'a teĩ nda'itui 'rã yvy rupi,
ipo re Senhor ojopy rã.
25 Xekunumi va'ekue ri aỹ ma xetuja'i ma
va'eri xee ndaexai teri heko porã va'e re nopenaai rã,
neĩ hamymino kuery voi mbojape re ojerurea rupi ikuai rã ndaexai.
26 Ha'e kuery joayvua rupi vy oiporuka 'rã joupe.
Hamymino kuery voi joapo porã va'e ikuai.
27 Ejepe'a ke mba'emo vai gui,
ejapo iporã va'e anho.
Ha'e rami vy reiko riae 'rã.
28 Mba'eta Senhor oguerovy'a heko porã va'e.
Ndoeja rivei 'rã ojeupegua iky'a e'ỹ va'e kuery.
Ha'e kuery re opena 'rã raka'e rã peve guarã.
Ha'e rã heko vai va'e ramymino kuery ma omombaa 'rã.
29 Heko porã va'e kuery ikuai porã 'rã yvy re,
ha'e py ikuai 'rã raka'e rã peve.
30 Heko porã va'e ijayvu 'rã 'arandu re,
anhetẽ rupi meme 'rã ijayvu.
31 Opy'a re omoĩ 'rã Nguuete guigua lei.
Na'ikangyi 'rã guive oikoa rupi.
32 Heko porã va'e re ma heko va'e va'e ojukaxe vy
oma'ẽ mbegue teĩ
33 Senhor nomboaxai 'rã ipo py,
nombopaga ukai 'rã guive omboayvua rã.
34 Earõ ke Senhor, ha'e ixuguigua tape rupi eiko.
Ha'e ramo nemboyvate 'rã yvy re reiko porã aguã,
ha'e rexa 'rã heko vai va'e omombaa rã.
35 Xee aexa va'ekue heko vai va'e ipo'akaa,
yary Líbano regua rami ipo'akave ovy opa rupi.
36 Ha'e gui teĩgue ju aaxa vy ama'ẽ rã okanhy ma ra'e.
Aeka teĩ ndajouvei ma.
37 Eikuaa pota ke anhetẽ rupi ikuai va'e re,
exa pota heko porã va'e oikoa re.
Mba'eta mby'a porã re ikuai va'e oguereko 'rã guamymino kuery.
38 Ha'e rã ojejavypa rei va'e ma omombaa voi 'rã.
Heko vai va'e ramymino kuery voi omombaa 'rã.
39 Senhor gui ae ou heko porã va'e oo jepe aguã.
Ha'e kuery ojexavaia ára py hexe onhemi aguã onhemoĩ.
40 Senhor oipytyvõ ha'e ogueraa jepe 'rã,
heko vai va'e po gui oipe'a 'rã ogueraa jepe vy,
hexe onhemi ramo.
Ojejavyague gui ojeko rerovaa rupi ijayvua ague
Mboraeirã Davi ombopara va'ekue nhomoma'endu'a aguã.