Salmos 17

Nhanderuete oepy aguã re ojerurea ague

Davi onhembo'eague.

1 Senhor, endu ke ajerure ramo ha'evea rami xerereko aguã,

eikuaa pota ajapukaia re,

ejapyxaka ajerurea re,

mba'eta ijapu va'e juru gui e'ỹ xeayvu onhendu.

2 Nerenonde gui eikuaa uka xemboeko porãa regua.

Mba'eta orerexa vy ha'evea rami meme reikuaa pota.

3 Xekuraxõ re reikuaa pota teĩ,

pyávy voi reikuaa pota vy

tata py rami xereko rea'ã teĩ

peteĩ henda py ma xere nderejoui 'rã teko vai.

Xejuru gui noẽi 'rã ayvu vai.

4 Avakue opa marã ikuai teĩ xee ma ndeayvua rami vy

ajejoko jojuka va'ety ikuaia rupi aiko e'ỹ aguã.

5 Ndeguigua tape rupi anho aiko,

ajavy e'ỹ re.

6 Xeruete, xee ajapukai ndevy,

mba'eta ndee xembovai 'rã.

Ejapyxaka ha'e endu xeayvua.

7 Exa uka opa mba'e py ndeporayvu etea.

Mba'eta ndere onhemi va'e kuery reraa jepe 'rã

ha'e kuery re opu'ã va'e gui.

8 Epena ke xere nderexa ra'yĩ re rami ae,

xeao'i ke ndepepo guy py

9 heko vai va'e kuery xembojexavaia gui,

xerovaigua kuery xejukaxea gui.

10 Mba'eta ipy'a ratã va'e kuery ma opy'a omboty reve

ijayvu vaikue-ikue 'rã.

11 Aỹ voi orejoko rei okuapy,

orere oma'ẽ vaipa yvy rupi orereityxe vy.

12 Guary guembiarã ojouxe va'e rami ikuai,

guary ra'y onhemia gui oma'ẽ mbegue va'e rami guive.

13 Senhor, epu'ã ke, ejoko ha'e eitypa.

Ndekyxe py eraa jepe xerekove heko vai va'e po gui.

14 Senhor, ndepo py ae xereraa jepe avakue yvy regua gui.

Ha'e kuery ma aỹ oikove teri reve anho 'rã ojou iporã va'e.

Mba'eta ha'e kuery rye remonyẽ mba'emo porã.

Ha'e kuery ta'y reta 'rã.

Ha'e gui mba'emo ndoiporupai va'ekue ma oeja 'rã gua'y kuery pe.

15 Ha'e rã xee ma teko porã rupi vy ama'ẽ 'rã nderova re.

Apu'ã ju vy avy'a 'rã roexa vy.*