145
1 Xeruete xeruvixave, xee romboete 'rã.
Raka'e rã peve rogueroporaei 'rã nderery rupi.
2 Ko'ẽ nhavõ roguerovy'a 'rã,
nderery rogueroporaei 'rã raka'e rã peve.
3 Senhor yvate ete ramo ha'evea rami jaroporaei.
Yvate etea ma jaikuaapa va'erã e'ỹ.
4 Tuu kuery voi gua'y kuery oendua py ogueroporaei 'rã nerembiapo,
omombe'upa 'rã ndepo'akaa rupi rejapo va'ekue.
5 Aikuaa pota 'rã ndeyvate etea ha'e nerexakãa re,
mba'emo porã rejapo va'ekue re guive.
6 Ijayvua 'rã okuapy ndepo'akaa rupi rejapo va'ekue re,
xee voi amombe'u 'rã ndeyvatea.
7 Nhomoma'endu'aa 'rã ndeporayvu etea re,
ovy'aa rupi ogueroporaeia 'rã ndereko porãa.
8 Senhor ma porayvu ha'e nhomboaxy kuaa va'e.
Nda'ivai voi kuaai, nhomboaxy aguã oĩ riae va'e.
9 Pavẽ pe Senhor oexa uka 'rã mborayvu,
nhomboaxya rupi opena porã 'rã guemimoingo kuery ha'e javi re.
10 Senhor, remoingo va'ekue ha'e javi ndereroporaei 'rã.
Ndevygua iky'a e'ỹ va'e kuery voi ndererovy'a ete 'rã okuapy.
11 Ijayvu 'rã ndepo'akaa rupi nerexakãa ojekuaa va'e re,
omombe'u porã 'rã ndepo'akaa,
12 avakue ra'y kuery oikuaa aguã ndepo'akaa rupi rejapo va'ekue,
ha'e repenaa rupi ndeyvatea ha'e nerexakãa ojekuaa va'e.
13 Ndepo'akaa ma raka'e rã peve guarã,
ndee ma huvixave riae 'rã reĩ, ikuai jevy va'e peve.
Senhor ijayvua ha'e javi py ojeroviapy oiko,
ojapo va'e ha'e javi py oexa uka 'rã iky'a e'ỹ va'ea.
14 Senhor oipytyvõ 'rã ikangy va'e ha'e javi,
omopu'ãmba ju 'rã ho'a va'ekue.
15 Ndere anho pavẽ oma'ẽ 'rã okuapy
hi'ára py porã ho'u va'erã rejou uka aguã oarõ vy.
16 Ndepo reipe'a vy
neremimoingo ha'e javi pe reme'ẽ 'rã oikotevẽ va'e.
17 Senhor ha'evea rami nhanderereko oikoa ha'e javi py,
opa mba'e ojapoa py oexa uka 'rã oporayvua.
18 Ixupe ojapukai va'e ha'e javi yvýry onhemoĩ 'rã,
anhetẽ ete rupi ojapukai ramo.
19 Henonde ojererokyjea rupi ikuai va'e pe ojapo 'rã oipota va'e.
Ojapukaia oendu vy ogueraa jepe 'rã.
20 Senhor opena porã 'rã oayvu va'e kuery re.
Ha'e rã heko vai va'e ma omomba 'rã.
21 Xejuru py taroporaei Senhor.
Temimoingo kuery ha'e javi togueroporaei hery iky'a e'ỹ va'e rupi, raka'e rã peve.
<- Salmos 144Salmos 146 ->