135
Nhanderuete pe japoraei aguã regua
1 Aleluia!
Peporaei Senhor rery rupi,
peroporaei Senhor, hembiguai pendekuai va'e,
2 ixupegua oo rupi pemba'eapo va'e,
Nhanderuete pegua roka rupi guive.
3 Peroporaei ke Senhor, porayvu va'e ramo.
Peporaei hery rupi, iporã ete ramo.
4 Mba'eta ojeupe guarã Senhor oiporavo Jacó,
oiporavo Israel kuery oguereko aguã.
5 Xee aikuaa ae Senhor yvate ete va'ea,
mba'eta tuuete ikuai va'e áryve Nhanderuete oiko.
6 Senhor ma oipota va'e ha'e javi ojapo va'e,
yva ha'e yvy re, ye'ẽ py ha'e iguýry rupi.
7 Arai omopu'ã 'rã heruvy yvy apy katy gui,
overa va'e voi oguereko katu 'rã oky aguã.
Yvytu ma ojapo 'rã oĩa gui oipeju aguã rami.
8 Egito yvy re ha'e ae ojukapa va'ekue ta'y kuery jypy guare,
avakue ha'e mymba kuery guive.
9 Ha'e py ojapo hexa pyrã ha'e nhomondyipaarã
Faraó ha'e hembiguai kuery rovai.
10 Senhor ma heta regua omomba va'ekue,
huvixave ipo'akapa va'e guive ojuka.
11 Ojuka amorreu kuery ruvixa Seom
ha'e Basã pygua huvixa Ogue,
ha'e gui Canaã yvy regua huvixa kuery ha'e javi.
12 Ha'e gui ma ijyvykue
ojeupegua Israel kuery pe omboaxapa.
13 Senhor, nderery oĩ 'rã raka'e rã peve,
raka'e rã ikuai va'e voi ima'endu'a 'rã ndere.
14 Mba'eta Senhor ma ojeupegua kuery re oikuaa pota 'rã,
omboaxy 'rã guembiguai kuery.*Hebreus 10.30
15 Ha'e rã yvy regua kuery ruete kuery ma
prata ha'e ouro guigua rive, avakue ae opo py ojapo va'ekue meme.*Salmo 115.4-8
16 Ijuru va'eri nda'ijayvui,
hexa va'eri ndoexai,
17 ijapyxa va'eri noendui,
ipytuẽ aguã voi nda'evei.
18 Ijapoare kuery ma ha'e rami ae ju 'rã ikuai,
hexe ojerovia va'e kuery ha'e javi guive.
19 Israel ramymino kuery, penema'endu'a porã Senhor re!
Arão ramymino kuery, penema'endu'a porã Senhor re!
20 Levi ramymino kuery, penema'endu'a porã Senhor re!
Senhor renonde pejererokyjea rupi pendekuai va'e, penema'endu'a porã Senhor re!
21 Sião tetã guive ta'ima'endu'a porãa
Senhor Jerusalém py oĩ va'e re.