116
Oporai vy Nhanderuete oguerovy'aague
1 Xee ma ayvu Senhor,
mba'eta ajerure ramo oendu xeayvua.
2 Xea katy ojero'a vy ojapyxaka rire
ixupe ajapukai 'rã aikovea ja.
3 Manoa regua nhuã xemboty va'ekue,
jexavaia yvykua vaikue guigua xere ipo'aka va'ekue.
Ha'e ramo aiko axya ha'e ndavy'aia py ha'a karamboae.
4 Ha'e rami vy ajapukai Senhor rery rupi:
“ Senhor, eraa jepe ke xerekove!” ha'e va'ekue.
5 Senhor ma porayvu ha'e heko porã va'e,
Nhanderuete ma nhanemboaxya rupi oiko va'e.
6 Senhor ma hi'arandu e'ỹ'i va'e kuery re opena porã va'e.
Ha'e rami vy ha'a ajupya py xerexa vy xereraa jepe karamboae.
7 Xenhe'ẽ, ejevy ju ke repytu'u aguã py,
mba'eta xevy Senhor mba'emo porã ome'ẽ oata aguã rami e'ỹ.
8 Ha'e rami vy xenhe'ẽ oepy amano taa gui.
Oepy xerexa xerexaya gui,
xepy guive oepy onhepyxangaa gui.
9 Ha'e ramo Senhor renonde aiko 'rã
okuave va'e yvy re.
10 Hexe ajerovia va'eri xejeupe xeayvu vy
“Ajexavai ete rima aikovy”, ha'e va'ekue.*2 Coríntios 4.13
11 Xepy'a eta rei vy
“Avakue ikuai va'e ma ijapu va'e meme”, ha'e va'ekue.
12 Senhor opa mba'e py xevy ojapo porãague re
mba'e nda'u ame'ẽ 'rã ixupe?
13 Xereraa jepeague arovy'a vy aupi 'rã karo,*Apy ijayvu judeu kuery gueko rami vy Nhanderuete pe mba'emo ome'ẽ aguã re. Tembi'u ha'e vinho oupi 'rã ixupe, ha'e gui oguerovy'aa rupi ho'u 'rã (Salmo 22.23-26; Levítico 7.11-16).
ha'e Senhor rery rupi aroporai 'rã.
14 Senhor pe ajapopa 'rã anhemboayvuague
ixupegua kuery ha'e javi oexaa py.
15 Hepy ete va'e Senhor oexa 'rã
ojeupegua iky'a e'ỹ va'e kuery omano rã.
16 Senhor, xee ma nerembiguai ete aiko,
nerembiguai pi'a guive aiko.
Remondopa ma xejokuaague.
17 Ha'e ramo ndevy ame'ẽ 'rã roguerovy'aa,
ha'e Senhor rery rupi aroporai 'rã.
18 Senhor pe ajapopa 'rã anhemboayvuague,
ixupegua kuery ha'e javi ikuaia py,
19 Senhor pegua roka
Jerusalém mbyte py ae.