Salmos Israel kuery oporaeiaty
Salmos Israel kuery oporaeiaty
Salmos ma yma gui oiporua Nhanderuete pe oporaeia rupi. Mbyte rupi peve huvixa Davi ojapo va'ekue, pova'e guive:
“Senhor ma vexa'i mongarua rami xere opena va'e oiko.
Ha'e ramo xevy pe ndoatai 'rã mba'eve rei” (23.1).
Davi omoĩ avi levita kuery Nhanderuete ombojeroviaa rupi oporai va'erã. Ha'e kuery va'e regua ojapove ju salmos. Três mil ma'etỹ ma ojapo, salmos ha'e javi rai'i ojapopaa ague. Salmo 80 ma ymave ete, Moisés ojapo va'ekue.
Jypy Israel kuery ranhe oiporu raka'e salmos Nhanderuete pe oporaia rupi. Jesus ha'e hemimbo'e kuery voi oiporu raka'e. Ha'e gui aỹ ma yvy jave rupi oiporua, nhande kuery guive.
Salmos ma joo ramigua e'ỹ-e'ỹ ikuai. Nhanderuete oguerovy'aa oĩ, ixupe onhepytyvõ ukaa, ixupe gueko vai oeja vy omombe'ua, ixupe mba'emo vai oiko va'e re oporandua, ixupe joe ojerurea, ixupe ngovaigua kuery gui ojepy ukaa, ha'e oĩ avi ixuguigua re nhombo'ea. Nhanderuete pe oporaia meme. Oĩ avi salmos Jesus rekorã re ijayvu ma voiague, Novo Testamento py ma omombe'u porãave.
“Yvy jave re pendekuai va'e,
peroporaei Senhor pevy'aa rupi!
Pevy'aa rupi Senhor pe ete peiko.
Henonde pejexa uka pejuvy peporaei reve” (100.1-2).
“Peporaei Senhor pe!
Ha'eve ha'e iporã ete Nhanderuete pe japoraeia.
Jaroporaeia ma iporã ixupe voi” (147.1).

Heko porã ha'e heko vai va'e ikuaia re ijayvua

1 Ovy'a ete 'rã ava heko vai va'e kuery nhomongetaa rami ndoikoi,

ojejavypa rei va'e ikuaia rupi ndopytai,

neĩ nhombojaru rei va'e kuerya py voi oguapy e'ỹ va'e.

2 Ha'e rami 'rãgue py Senhor ayvu oguerovy'a vy

ara py ha'e pyávy ijayvua re anho oikuaa pota oikovy va'e.

3 Ha'e va'e ma yvyra yakã yvýry onhotỹ mbyre rami oiko,

hi'a aguã ára py porã hi'a va'e rami,

neĩ hogue ma ipiru rive'ỹ va'e rami.

Ha'e ma ojapo va'e ha'e javi oiko porã 'rã.[a]

4 Ha'e rã heko vai va'e ma ha'e rami e'ỹ ikuai.

Ha'e kuery ma mba'emo pire yvytu opa rupi ogueraa va'e rami 'rã okanhy.

5 Ha'e nunga rupi nhomboayvua ára heko vai va'e ndoo jepei 'rã,

ojejavypa rei va'e ndopytai 'rã heko porã va'e ikuaia py.

6 Mba'eta Senhor oma'ẽ heko porã va'e oikoa re.

Ha'e rã heko vai va'e oikoa ma okanhy 'rã.