34
Eliú Nhanderuete mboeko porãa rupi ijayvuague
1 Ha'e gui Eliú aipoe'ive ju:
2 — Pene'arandu va'e, pendu ke xee aikuaa va'e.
Penembo'epaa va'ekue, pejapyxaka xeayvua re.
3 Mba'eta nhandeapyxa py nhaendu kuaa 'rã ayvu,
nhandejuru py tembi'u heea nhaendu kuaa rami avi.
4 Ha'evea ramigua jaiporavo 'rã nhandejeupe.
Jojavi 'rã jaikuaa iporã va'e.
5 Mba'eta Jó aipoe'i: “Xereko porã va'eri
Nhanderuete oipe'a xevy guarã va'ekue.
6 Ha'evea rami aiko teĩ ijapu va'e rami xekuaa.
Xeai okuera va'erã e'ỹ oĩ, ajejavya oĩ ramo e'ỹ”, he'i va'ekue.
7 — Oiko 'rã nda'u ava Jó ramigua?
Mba'eta ha'e ma ojojai 'rã Nhanderuete, yy oy'u va'e rami rive.
8 Ha'e rami vy onhemoirũ 'rã oikovy ojapo vai rei va'e kuery re,
avakue heko vai va'e kuery reve anho oiko.
9 Mba'eta aipoe'i: “Nhanderuete jarovy'a teĩ
mba'everã ndovarei nhandevy”, he'i va'ekue.
10 — Ha'e nunga rupi peẽ avakue peneakã porã va'e, pejapyxaka xeayvua re.
Nhanderuete ma peteĩve henda py ndojapo vai 'rã,
Ipo'akapa va'e ha'eve'ỹa rami ndajoguerekoi 'rã.
11 Mba'eta ome'ẽ 'rãe jaikoague repy,
ojapo 'rã peteĩ-teĩ jaikoague repy jajou aguã rami.
12 Anhetẽ ete, Nhanderuete ha'eve'ỹa rami ndoikoi 'rã.
Ipo'akapa va'e ndajoguerekoi 'rã ha'eve'ỹa rami.
13 Mba'eta mava'e tu omoĩ raka'e yvy re opena va'erã?
Mava'e tu ipo py omboaxa raka'e ha'e javi regua?
14 Xapy'a rei Nhanderuete ojee rive opena va'e rire,
ha'e ojea katy onhe'ẽ ha'e pytuẽa oguerupa va'e rire
15 to'o ikuai va'e ha'e javi omanomba 'rãgue,
ha'e yvyku'i ju jajeapo 'rãgue.
16 — Ha'e gui Jó, ndere 'arandu oĩ ramo endu ke pova'e.
Ejapyxaka xeayvua re.
17 Ha'eve'ỹa rami joguereko va'e teve oĩ 'rã joe opena aguã?
Mba'e re tu ha'vy ndee ndeayvu Heko porã ha'e Ipo'akapa va'e ojejavya rami?
18 Huvixave oiko va'e pe nda'u “Mba'e vare'ỹ” 'ea 'rã teve?
Ha'e rami e'ỹ vy yvatekueve pe: “Pendeko vai va'e” 'ea 'rã teve?
19 Yvatekueve rive oayvuve e'ỹ va'e pe katuve ma nda'evei.
Ha'e ma iporiaukue'i gui ndoayvuvei 'rã oguerekopa rei va'e kuery.
Mba'eta ha'e javive ma opo py ojapo va'ekue meme ikuai.
20 Ha'e kuery omano xapy'a va'erã meme.
Pytũ mbyte jave ha'e kuery oryryipa reve oaxa 'rã,
ipo'aka va'ekue teĩ Ipo'akapa va'e jaexa e'ỹ va'e ogueraa 'rã.
21 — Nhanderuete ma oma'ẽ 'rã avakue ikuaia rupi.
Ha'e kuery oguataa ha'e javi ha'e oexapa 'rã.
22 Jipoi pytũa neĩ kuaray'ã ana
mba'emo vai apoare kuery ixugui onhemi aguã.
23 Mba'eta Nhanderuete ma avakue reko re oikuaa pota are e'ỹ teĩ
ojapo 'rã henonde ojexa uka aguã rami omboayvu aguã.
24 Ha'e rami vy oikuaa pota e'ỹ re omopẽmba 'rã imbaraete va'e kuery,
ha'e vy hekovia omoĩ 'rã amboae kuery.
25 Ha'e kuery ikuaia ha'e oikuaa ae vy
pyávy oity ramo omongu'i pyre ikuai.
26 Pavẽ oexaa py
omoingo axy 'rã heko vai va'e ha'e javi reve,
27 ixugui ha'e kuery ojepe'a rire,
peteĩve ma voi ndoikuaaxei ixuguigua tape.
28 Ha'e kuery ojapo Nhanderuete renonde iporiaukue'i ojapukaia onhendu aguã rami.
Ha'e ramo oendu ae ojexavai va'e kuery ojae'oa.
29 Nhanderuete okyrirĩ teĩ mava'e 'rã tu ombopaga?
Ngova omo'ã rã mava'e 'rã tu oexa, peteĩ regua ha'e javi e'ỹ vy peteĩ ava teĩ?
30 Ha'e rami oiko heko vai va'e ipo'aka e'ỹ aguã,
ha'e oiko e'ỹ aguã heta va'e kuery mbotavyarã.
31 — Xapy'a rei amongue aipoe'i 'rã Nhanderuete pe:
“Aiko axy vaipa ma, ndajejavyvei ma 'rã.
32 Xembo'e ke mba'emo xee ndaikuaai va'e re.
Ha'eve'ỹa rami ajapo va'ekue teĩ ndajapovei ma 'rã”, he'i 'rã.
33 Ha'e rami rã Nhanderuete omboekovia kuaa aguã nda'u
oporandu 'rã teve ndee reipotaa e'ỹ vy ndee ndereipotaia re?
Ndevy pe teve aipoe'i 'rã: “Ndee ae eiporavo, xee'ỹ.
Emombe'u ke reikuaa va'e, ndeayvu ke”, he'i 'rã teve?
34 — Avakue hi'arandukueve omombe'u 'rã xevy,
inhakã porã va'e kuery xeayvua re ojapyxaka vy aipoe'i 'rã xevy:
35 “Jó ma oikuaa vy e'ỹ ijayvu,
ijayvua re 'arandua noĩ”, he'i 'rã.
36 Ha'e nunga rupi tove Jó reko re toikuaa pota opa peve,
heko vai va'e rami ombovai rire.
37 Mba'eta ojejavya áryve omoĩ Nhanderuete re opu'ã rei aguã.
Nhanembyte py ojepopete ombojaru reia rupi,