16
Nhanderuete openaa re Jó ijayvuague
1 Ha'e ramo Jó ombovai:
2 — Aendu riae ma ha'e ramigua.
Peẽ ha'e javive ma xembopy'a porã 'rãgue py xemoangeko rei.
3 Ndopai 'rã teve yvytu rami pendeayvua?
Mba'e tu pendu ra'e ha'e rami ete xembovai aguã?
4 Xee voi xeayvu kuaa peẽ pendeayvua rami.
Xee aiko axya rami peẽ peiko axy va'e rire
xee voi xeayvu reta kuaa 'rãgue peẽ kuery pe,
penderovai xeakã ambovava reve.
5 Xee romombaraete kuaa avi 'rãgue xeayvua py,
xejuru py romboaxya aexa uka va'e py aipe'a aguã haxy pendu va'e!
6 — Xeayvu ainy teĩ haxy aendu va'e ndoaxai 'rã.
Ha'e rami e'ỹ vy akyrirĩ teĩ mba'e nunga py 'rã tu anhenhandu porã?
7 Anhetẽ opa ma xembaraetea areko va'ekue.
Ndee Xeruete remomba ma xero pygua kuery ha'e javi.
8 Ha'e nunga aexa uka xexorĩmbaa py,
xeangaia voi xerovai opu'ã vy xembojexavai riae.
9 Ndepoxya py xemboa'ypa, xere nandea'ei vy.
Xerovai neraĩ jekyty ha'e rema'ẽ ratã xerovaigua rami.
10 Avakue voi xerovai oipe'a okuapy ojuru.
Ha'e rami vy xere ija'e e'ỹa rupi xepetepa,
xerovai ha'e javive ijaty okuapy.
11 Ojerovia e'ỹ va'e po py Nhanderuete xemboaxa,
heko vai va'e kuery po py ha'a aguã rami xeapo.
12 Xee aiko porã rei va'ekue ri ha'e xemopẽmba.
Xeaju'y re ojopy vy xemboa'ypa.
Xemoĩ guembiporu hu'y oa'anga aguã.
13 Xejoko ngu'y py,
oipyxo xepyky raxĩ re xemboaxy e'ỹ re,
ha'e ramo xepy'a upia onheẽ yvy re.
14 Xemboguaiague rupi ae ju xemboguai,
ha'e vy xere ou joe opu'ã va'e ramigua.
15 Xejee amoĩ ae ajukue voxa guigua,
ha'e yvy ku'i py aity anhemboyvate reia rupi aikoague.
16 Ajae'o rã xerova ma pytãmba rei,
ha'e xerexa pepi ma manoa guigua omo'ãmba,
17 xepo re ajojukaague noĩ,
ha'e xeky'a e'ỹa rupi anhembo'e teĩ.
18 — Ndee yvy, ejao'i eme xeruguy,
toĩ eme guive ajapukaia onhendu e'ỹa!
19 Ma'ẽ, aỹ ma voi xereko mombe'u porãvearã oĩ yva re,
yvate ma oĩ xere ojerure va'erã.
20 Xeirũ kuery xejojai rei okuapy ramo
Nhanderuete renonde xerexay reve tema aĩ,
21 arõ vy Nhanderuete pe ha'e va'e ojerure aguã avakue re,
oirũ pe avakue ra'y kuery joe ojerurea rami avi.
22 Mba'eta ma'etỹa oĩ reta ve'ỹa py