3
Nhanderuete pe Habacuque onhembo'eague
1 Po rami ma profeta Habacuque onhembo'e mboraei ojapo reve.
2 Senhor, ndeayvua aendu vy
aendu avi anhemondyia.
Senhor, ore kuery ára py ju ejapo ymave rupi rejapo va'ekue ramigua.
Ore'ára py ju ejapo ha'e nunga oikuaapaa aguã rami.
Ndepoxya ramive ma nema'endu'a avi ke renhomboaxy aguã re.
3 Nhanderuete ma ou oiny Temã gui,
Parã yvyty gui ou Iky'a e'ỹ va'e.
Hexakãa omonyẽ yva,
yvy voi tynyẽ ogueroporai va'e.
4 Hexakãa ma tataendy rexakã rami,
ipo gui ma nhemboxi ojekuaa,
opo'aka onhomiague gui.
5 Guenonde rupi ombou mba'eaxy vaikue,
guakykue rupi voi nhomoingo axya omoingo.
6 Ha'e opyta vy rive ojapo yvy oryryipa aguã rami.
Oma'ẽ ho'amy vy rive ombojaity yvy regua kuery.
Ha'e ramo yvy jypygua va'e iku'ipa,
yvy'ã oĩ riae 'rã va'ekue voi ho'apa.
Ha'e rã Nhanderuete oikoa ma imarã e'ỹ va'e.
7 Cusã yvy re aexa oguy py ikuai va'e ojexavai rã,
ha'e Midiã yvy re ijaty va'e kuery oryryipa.
8 Senhor, yakã pe teve ndepoxy?
Yakã'i ikuai va'e pe teve,
e'ỹ vy ye'ẽ pe ndevai?
Mba'eta reguata reovy nerymba kavaju áry,
ndekaróxa py reju ndepo'akaa rexa uka vy.
9 Nderapa renoẽ renhomiague gui,
nderu'y ryru ma tynyẽ vaipa.
Yvy remboja'o yakã renhono vy.
10 Yvyty ikuai va'e nderexa vy ojero'a okuapy,
ha'e vy ojapo yvy'ã guy katy yy oxyry atã aguã rami.
Ye'ẽ voi typyvea guive hevovo nhendu,
ha'e yvate katy oupi opo.
11 Kuaray ha'e jaxy ma oĩa py ae opyta
nderu'y onhe'ẽ ovy va'e hexakãmba rã,
ha'e nderu'y guaxu hexakã va'e overa gui.
12 Rejou vaia rupi reguata reovy yvy jave rupi,
ndepoxya rupi repyrõmba yvy regua kuery re.
13 Ndejeupegua kuery reraa jepe vy ae reo,
huvixarã remoĩ va'ekue reraa jepe aguã.
Ha'e rami vy rembovaipa heko vai va'e kuery ro ao'ia,
hoo yta voi remboipa.
14 Nderovaigua xondaro kuery ru'y py ae reikutu inhakã rupi,
ha'e kuery yvytu atã rami xemokanhy aguã ou jave.
Ovy'a reve ou va'ekue nhemi rupi iporiaukue'i omokanhymbaa rami.
15 Ha'e gui ndee ma ye'ẽ áry rupi reguata rejuvy nerymba kavaju kuery reve,
yy oje'apa va'e rupi ae.
16 Ha'e nunga aendu vy anhemondyipa.
Ndeayvua gui xerembe ryryipa.
Xekãgue hu'ũmba rei,
xerenapy'ã voi ikangypa.
Ha'e rami teĩ akyrirĩ reve 'rã arõ aikovy jexavaia ára ovaẽ aguã,
mba'eta ou 'rãe orere opu'ã rei va'e kuery áry.
17 Xapy'a rei figo'y nda'ipoty porãi 'rã,
ha'e uva'y re hi'a noĩ,
oliveira ndai'a porãi,
ha'e mba'ety rupi voi ja'u va'erã ndoikoi,
vexa'i kuery oipe'apaa 'rã heravy ikora gui,
ha'e vaka voi ikora py nda'ipovei teĩ,
18 xee ma arovy'a riae 'rã Senhor,
avy'a 'rã Nhanderuete xereraa jepea re.
19 Senhor Nhanderuete ma anhemiaty oĩ.
Ha'e ojapo xepy oĩ atã aguã rami guaxu rami ae,
yvate rupi aiko aguã.
Jogueroporaei va'e pe ombopara pyre, mbaraka ixã va'e py ombojoguy reve guarã.