San Marcos 3

Tasig mul-laig møwan Jesús tamarøb

(Mt 12.9-14; Lc 6.6-11)

1 Jesús katø judíosmera tulundzuni yau kebibene, truyu kan møg tasig mul-laig tøgaig waben, 2 Jesúswan larab købelø køn, isrin kwaløm tamarøbig køtashchab, chigøben chi køptø. 3 Inchen Jesúsbe tru tasig mul-laig tøga møwane trenchibig køn:

—Kurra, yu tøbøtag pasramisr— cha.

4 Inchabe katøganelan trenchibig køn:

—¿Tru maig maramigwan martrai Moisés pøriiløyube isrin kwalømbe chiwan martrain taig køh cha, tabiiteh, kabe kaiteh? cha. ¿Kwamønrrai indamig køh, kabe kweetsamig kø, chindah?— cha.

Inchen nømbe chigucha chimuben, 5 Jesúsbe nuingatan pønrrabelan namig ashib, truba isui inchibig køn, kaguende nømui manrrømerabe purø murelø kuimba. Incha tru møwan trenchibig køn:

—Kwalwan larrøbichi— cha.

Inchen nøbe larrøbichene, nui kwalbe tabig kørrømisrøbig køn. 6 Inchen fariseosmerabe webamba, tru urastø Herodesweingateeløba Jesúswan namig kurra, mandø incha pinisamigwan waminchib mendabelø køn.

Nu pisu menda misag truba nuwan Jesús kusrenanøb

7 Inchen Jesúsbe nui kusrenanøb pera uniiløba tarømisra, nu pisu mendasrømay iben, misag truba nu Galilea pirausreelø nui mendig ambubelø køn. 8 Inchen nø chinetø nørreelø marigwan wammørabe, judeasreelø køben, jerusalénsreelø køben, idumeasreelø køben, Jordán pi tru pørr kal-labgatøsreelø køben, tirosreelø køben, sidónsreelø køben, truba nu ashchab amrrubelø køn. 9 Incha tru treeg nu misakkurri Jesúsbe nui kusrenanøb pera uniilan kan barco ke tamara tøgagønrrai eshkabig køn, tru nu misag nun menrra trag marmønrrai. 10 Kaguende Jesúsbe kwanrreelan truba truba tamarin køben, mayan kwanrreeløba katøranrrab nuimaygøba kemallchab tranrrabelø køn.

11 Inchen trømbøig maringarub kwaimandziimera nun ashippe, nui merrab tømbønsra, trenchib trashibelø køn:

—Ñibe Tiuswei Nusrkain køn— chib.

12 Inchen Jesúsbe nune mu køn cha, mun køben misaameran mørø waminchimønrrain karubig køn.

Jesús nøashib karua øramelan doce lawa pønsrøb

(Mt 10.1-4; Lc 6.12-16)

13 Incha Jesúsbe kan tunsrø nebya, nø wamønrrab asiilan wamøben, nømbe nuimay amrrubelø køn. 14 Incha doce wesrawa pønsra treeg kørrømara, iilane nøashib karua øriilø køn cha, wamabig køn, nøba amøñibelø kønrraimba, katø eshkab kusrenanrrab amrrai øramigweyasiiba, 15 katø kwaimandziimeran webusramig mu chindamgaig marøbelø kønrraimba. 16 Tru doce wesrawa pønsrailøbe iilø køn: Simón, nundøwei katø Pedro cha, munchi pasrig køben, 17 Zebedeowei nusrkai Santiagoba, nui nuneg Juanba, truilane Boanerges cha, munchi pasriilø, tru treeg munchibe: “palaig trashibig taigwei nusrkalø”, 18 katø Andrés køben, Felipe køben, Bartolomé køben, Mateo køben, Tomás køben, Alfeowei nusrkai Santiago køben, Tadeo køben, Simón Cananistameraingatiig køben, 19 katø Judas Iscariote, tru wendø Jesúswan ashig kømui inchibelaingatø pasramisra, trannrrabig købengue.

Møiløgøsrøn Jesúswan Beelzebúwei maramburab marigwan tøgaig køn chib

(Mt 12.22-32; Lc 11.14-23; 12.10)

20 Inchen Jesús katø nui kusrenanøb pera uniiløba kan yau kebiben, katø misag menrra tinmarøb tulundzunaptø, manrrabguen kaima købig køn. 21 Inchen Jesúswei yaueløbe treeg inchib køn taig wammørabe, nune merrarrawa, sruamrrunrrab ambubelø køn. Kaguende lukiain køn chib køben.

22 Inchen tru Moisés pørigwan kusrenanøbelø Jerusalénsrøngurri amrrubeløgucha trenchibelø køn:

—Nugwaimandzig, tru Beelzebúwan tøgaig køn cha. Treekkurri, tru kwaimandziimeran nøasha karubigwan tøgaig kua, i møøbe kwaimandziimeran weeran— cha.

23 Inchen Jesúsbe nømun wama, ‘øyeeg lataitøwein køn’ chib, kemesra wamindiiløtøga trenchib waminchibig køn:

—¿Satanásbe Satanáswandøweimbe chincha wegutchaitamague? cha. 24 Kan rey karub tøgaweim pirau misaama nømasiitø nøørøtø misrøb kurrabe, warabig warønrrab kaimanrrun cha. 25 Katø kan yauelø nømasiitø nøørøtø misrøb kurrabe, chab pinønrrun cha. 26 Inchawei Satanás nøasiitøwei nøørø, nøørø misrøb kurrabe, treegu yandø pasrønrrab kaimaben, truyu patsønrrun, chibig køn.

27 ’Kabe kan møikkøben kan mur møwei yauma kebya, tru mur møwan lusrøbmerrig lusrmøwatøbe, nui chi tøgagúigwan kerranrrab kaimanrrun cha. Lusra trarratøwei nui chi tøgagúilan kerranrrun chibig køn. 28 Nabe ñimun cierton trendamønrrun cha: Misaamera chi kaig mariilan lata, chigøben Tiuswan purø trømbøig wamindiilan lata Tiusbe kerriguh pesannawa, ulø paymønrrun cha. 29 Trune Espíritu Santon purø trømbøig wamab waminchibigwane ulø payamigwane managuen pesannaimíig kønrrun cha. Treeg kømøtø, nui kaig marigwan managatig tøga kørrømisrtrun— chibig køn.

30 Jesúsbe øyah chippe, kaguende nømbe nun trømbøig marøngarub kwaimandzigwan tøgaig køn chib køben, trendaig køn.

Jesúswei usrimba, nuneløba

(Mt 12.46-50; Lc 8.19-21)

31 Inchen Jesúswei usrimba, nuneløba pua, wambiitø pønrramisra, wamønrrab øren, 32 Jesúsweim pøtøgatan truba nu purrabeløbe trenchibelø køn:

—Au, ñui usrimba, ñui nuneløba wambig pønrran cha, ñun payib.—

33 Inchen nøbe trencha løtabig køn:

—¿Nai usri nai nuneløbe mumera køh?— cha.

34 Incha nuim pøtøgatan purrabelan ashabe, trenchibig køn:

—Nai usri nai nuneløbe iilø køn cha. 35 Kaguende møikkøben Tius maig martrai karuben, treeg marøbig, truibe sí, nai nuneg, nai nuchag, nai usrin køn— cha.

<- San Marcos 2 San Marcos 4 ->