1 Now den, me Christian bredren, A wahn oona fa ondastan de trute bout de gif dem de Holy Sperit da gii. 2 Oona know dat wen oona ain know God yet, oona git ton way fom de right road an woshup idol wa ain got no life. 3 So den, A wahn oona fa ondastan dat ef de Holy Sperit tek chaage ob a poson, e ain gwine say, “Leh dey be a cuss pon Jedus.” An nobody ain able fa say, “Jedus de Lawd,” cep de Holy Sperit da tek chaage ob um.

4 Dey plenty diffunt kind ob ting dat God Sperit da gii we, bot de same Holy Sperit da gii we um all. 5 Dey plenty diffunt way fa saab de Lawd, bot all we da saab de same Lawd. 6 People wa know how fa do plenty diffunt kinda wok, bot de same God da mek all people know how fa do all dem wok. 7 God da gii ebrybody sompin fa show dat e Sperit powa da wok eenside um fa de good ob all de people. 8 God Sperit da mek one poson able fa taak wid sense. Same time, de same Sperit da mek noda one able fa laan people. 9 De same Sperit da gii one poson fait. E da gii oda one powa fa heal sick people. 10 An de same Sperit da gii one poson powa fa do miracle. Same time, e da gii noda one powa fa taak God wod. De Sperit da mek oda one able fa know ef God Sperit or oda sperit da mek people taak wa dey da taak. God Sperit da mek oda poson able fa taak oda language. An e da mek noda one able fa tapetate dem oda language. 11 Dat de same Holy Sperit wa da gii ebrybody dey gif fa do wa e wahn um fa do.

12 Same way a body hab all kinda paat, an all dem ting paat ob de same body, e de same say so wid Christ. 13 De same Holy Sperit done bactize we all, an we come fa be one body. Some ob we Jew people, an oda people ain Jew. Some slabe an oda people free. An de same Sperit done come eenside all ob we.

14 De body ain got jes one paat. De body got plenty paat. 15 Ef de foot say, “A ain a han, so A ain blongst ta de body,” dat ain mean fa say de foot ain still paat ob de body. 16 An ef de yea say, “A ain a eye, so A ain blongst ta de body,” dat ain mean fa say de yea ain still paat ob de body. 17 Ef de one whole body been jes a eye, how e gwine yeh? Ef de one whole body been jes a yea, how e gwine be able fa smell ting? 18 Bot fa true, God pit ebry paat yah een de body jes de way e wahn um. 19 Ef all dem diffunt paat yah been jes one paat, de body ain gwine be a body tall. 20 Bot fa true dey plenty paat, stillyet dey mek op jes one body.

21 So den, de eye cyahn tell de han say, “A kin do dout ya!” De head cyahn tell de foot say, “A kin do dout ya.” 22 No, we cyahn do dout dem body paat wa we tink ain got much scrent. 23 An dem paat ob de body wa we tink ain wot nottin, dey de one we tek cyah ob mo betta. An dem paat wa ain so fine fa see, we kiba dem op. 24 Bot we ain haffa kiba op dem paat wa fine fa see. God done pit all de paat togeda een de body een susha way so dat dem paat wa we tink ain wot sommuch git hona mo den dem oda one. 25 God done dis so dat dey ain gwine be no quarrellin een de body. Bot de diffunt paat fa lib een susha way dat dey hab de same cyah fa one noda. 26 Ef one paat da suffa, all de oda paat suffa wid um. Ef one paat git praise, all de oda paat rejaice wid um.

27 Now den, oona mek op Christ body. Ebry one ob oona a paat ob dat body. 28 Dat so e stan een de choch. God been pit all de paat dem een place. Fus, de postle dem, secon, de prophet dem, tird, de teacha dem. Den God pit dem wa da do miracle. Atta dem, e pit dem wa e gii powa fa heal, an den dem wa able fa hep oda people, den dem wa able fa lead oda people. An den, dem wa e gii de gif fa taak oda language. 29 Fa sho, all de people ain postle, ainty? Dey ain all prophet, an dey ain all teacha. Dey ain all got powa fa do miracle, ainty? 30 All ob um ain got powa fa heal. Dey ain all able fa taak oda language, an dey ain all got powa fa tapetate dem oda language. 31 So den, set oona haat pon dem gif wa mo betta den all de res.

An now A gwine show oona de bes way ob all.

<- 1 Corinth 111 Corinth 13 ->