1 Ahapukaz katu Tupàn pe ihe.

Herenu herehapukaz mehe a'e.

2 Ma'erahy ipuraraw mehe aze'eg zanezar pe.

Pyhaw aupir hepo izupe heze'eg pà.

Nezewe rehe we naherurywete kwaw ihe.

3 Tupàn rehe hema'enukwaw mehe azypyrog hekuhem pà ihe.

Azypyrog ma'e rehe hema'enukwaw pà. A'e mehe azemumikahy.

4 Tupàn nahemuger kar kwaw a'e.

Napuner kwaw heze'egaw rehe, ta'e azemumikahy ihe xe.

5 Hema'enukwaw he'ar upaw ma'e kwer rehe,

Hekwarahy kwehe mehe upaw ma'e kwer rehe no.

6 Amumaw pytun tetea'u ma'e rehe hema'enukwaw katu pà.

Azypyrog hema'enukwaw pà, na'e apuranu hezehe no.

7 Aipo zanezar utyryk putar tuwe zanewi tuweharupi nehe.

Aipo nazanekatu pixik kwaw izupe nehe.

8 Aipo upytu'u zaneamutar katu re.

Aipo weityk zanewe wemimume'u kwer.

9 Aipo Tupàn upytu'u ikatu ma'e romo wiko re.

Aipo ikwahy haw upyta ipurupuhareko haw hekuzaromo, a'e hezeupe.

10 Na'e aze'eg nezewe hezeupe.

— Tupàn Ywate Wera'u Har na'ipurupytywà wer kwaw zanerehe kwehe mehe arer zàwe a'e. Azeharomoete nezewe haw na'ikatu kwaw zanewe, a'e hezeupe.

11 O Tupàn Tuweharupi Wiko Ma'e. Hema'enukwaw putar neremiapo kwer ikatuahy ma'e rehe ihe nehe.

Hema'enukwaw putar neremiapo kwer kwehe mehe iapo pyrer rehe nehe.

12 Hema'enukwaw putar neremiapo kwer paw rehe nehe.

Amume'u putar ma'e neremiapo kwer hezeupe nehe no.

13 O Tupàn neremiapo paw ikatu a'e.

Naheta kwaw amo tupàn ikàg ma'e urezar zàwenugar wà.

14 Ereiko Tupàn purumupytuhegatu kar haw iapo har romo ne.

Erexak kar nepuner haw ywy nànànar wainuinuromo.

15 Nekàgaw rupi erepyro neremiaihu ne wà.

Erepyro Zako izuapyapyr ne wà. Zuze izuapyapyr erepyro ne wà no.

16 O Tupàn, nerexak mehe 'y ukyze a'e.

'Y yryhu pe har ohoete ma'e uryryryryz a'e no.

17 Ywàkun umugyr kar àmàn.

Ywak wànoànog.

Iweraw paw uhyape katu ywy nànàn.

18 Àmàn neremimuànoànogaw uhàuhàz ywy nànàn no.

Àmàn iweraw paw uhyape katu ywy nànàn no.

Tupàn umuryryz kar ywy. Ywy uryryryryz a'e.

19 Ereata yryhu myteromo.

Erezapo nerape yryhu ohoete ma'e rupi.

Ni amo nuexak kwaw nepyporer a'e wà.

20 Àràpuhàràn wamono'ogar weraha weimaw pe ikatu ma'e rupi wà.

Nezewegatete eremuata kar neremiaihu pe ikatu ma'e rupi ne wà no, Moizez pe ne wà, Àràw pe ne wà no.

<- ZEGAR HAW 76ZEGAR HAW 78 ->