1 O Tupàn, hepuhareko pe nehe, ta'e erepuruamutar katu ne xe.

Erepurupuhareko katu ne,

A'e rupi emunàn heremiapo kwer ikatu 'ym ma'e paw ihewi nehe.

2 Hemukatu hekatu 'ymaw wi paw rupi nehe.

Emunàn heremiapo kwer ikatu 'ym ma'e ihewi nehe no.

3 Akwaw katu heremiawy kwer ihe.

Heremiapo kwer ikatu 'ym ma'e uzekwaw kar ihewe tuweharupi.

4 Azapo ikatu 'ym ma'e newe. Xo nekutyr zo azapo ikatu 'ym ma'e.

Azapo neremimutar 'ym.

Heremiapo kwer neremimume'u ikatu.

Nekatu herehe nezepyk mehe, ta'e heaiw ihe xe.

5 Hezexak kar haw henataromo nahekatu kwaw azeharomoete ihe.

Hehy hie pupe hemuigo kar awer 'ar henataromo aiko ikatu 'ym ma'e iapo har romo no.

6 Ereputar teko ikatu ma'e ne wà.

Emynehem kar hepy'a nema'ekwaw paw pupe nehe.

7 Ezo'ok hekatu 'ymaw ihewi nehe. A'e mehe hekatu putar nehe.

Hemukatu nehe. A'e mehe hexigatu wera'u putar hoko hawer wi nehe.

8 Einu kar wi teko hurywete ma'e ihewe ne wà nehe. Einu kar ikatu ma'e rehe wazegar mehe ne wà nehe.

Hezuhazuhaw pe ne. Hemu'i pe no.

Nezewe rehe we herurywete wi putar nehe.

9 Ezeàpumi heremiapo kwer ikatu 'ym ma'e hexak 'ym pà nehe.

Emunàn hekatu 'ymaw paw rupi nehe.

10 O Tupàn, hemuigo kar pe ipy'a ikatu ma'e hereko har romo nehe.

Hemuigo kar pe ikatu ma'e iapo har romo nehe, neremimutar iapo har romo nehe.

11 Hemono kar zo pe newi nehe.

Emunyryk zo nerekwe ikatuahy ma'e ihewi nehe.

12 Hemurywete kar wi pe nerehe we hepyro àwàm rehe nehe.

Neremimutar rehe hepureruzar wer haw emupyta kar hepy'a pupe nehe. Ezapo kar neremiapo putar haw herekwe pe nehe.

13 A'e mehe amu'e putar ikatu 'ym ma'e iapo har neze'eg rehe ihe wà nehe.

A'e rupi uzewyr putar newe wà nehe.

14 O Tupàn hepyro har, hepyro pe màno haw wi nehe.

A'e mehe amume'u putar nekatu haw herurywete pà ihe nehe.

15 O hezar, emume'u kar ze'eg ikatu ma'e ihewe nehe.

A'e mehe amume'u putar nekatu haw nehe.

16 Nereputar kwaw ma'ea'yr heremizuka ràm ne wà.

Ma'ea'yr nemuwete katu haw rehe hapy pyr na'ikatu kwaw newe wà.

17 O Tupàn, herekwe wiko wera'u 'ym ma'e amono newe imono pyr romo ma'ea'yr izuka pyr zàwenugar romo ihe.

Nereityk kwaw teko wiko wera'u 'ym ma'e ne wà. Teko wemiapo ikatu 'ym ma'e wi uzemumikahy ma'e eremur kar nezeupe ne wà.

18 O Tupàn, epytywà Zeruzarez pe har nekatu haw rupi nehe.

Emupu'àm wi Zeruzarez ipàrirogaw heityk pyrer nehe.

19 A'e mehe aze teko uzuka kar ma'ea'yr nemuwete pà neze'eg awer rupi katete wà nehe, eremuawyze putar ne wà nehe.

Ereputar putar ma'e nemuwete haw hapy pyr nehe no.

Teko uzuka kar putar tapi'aka'yr awa wazuka haw rehe nerenataromo har rehe wà nehe.

<- ZEGAR HAW 50ZEGAR HAW 52 ->