PAPE MOKOZ HAW
42
42–72
Awa uiwy wi muite wiko ma'e uze'eg Tupàn pe
Zegar haw Kora wanemiapo kwer
1 Arapuha iziwez 'y yrykaw pupe har pupe a'e.
Nezewegatete hereko wer nepyr, o Tupàn.
2 Neputar haw nuzawy kwaw heiwez haw ihewe.
Màràn mehe apuner putar nepyr heho haw rehe nehe.
3 Azai'o 'aromo ihe. Azai'o pyhaw no.
Herehaykwer uzeapo heremi'u romo.
Heàmàtyry'ymar upuranu herehe tuweharupi wà.
— Ma'e pe hekon Tupàn nezar a'e, i'i ihewe wà.
4 Hereko awer rehe hema'enukwaw mehe hahy hepy'a ihewe.
Hema'enukwaw Tupàn Hàpuzuhu pe teko tetea'u wanupi heho awer rehe ihe.
Aexak kar ureho àwàm teko wanupe.
Uruata oroho ure paw rupi ure.
Urerurywete oroho uruzegar pà Tupàn ikatu haw imume'u pà.
5 Màràzàwe tuwe azemumikahy kury.
Màràzàwe tuwe naherurywete kwaw.
Àro Tupàn ihe. Ikatu haw amume'u wiwi putar ihe nehe.
Hepyro har romo hekon. Wiko hezar romo.
6-7 Hepy'a nuzawy kwaw awa imumaw pyrer ipy'a ihe.
A'e rupi hema'enukwaw Tupàn rehe.
Ykotok yryhu pe har wànoànog a'e.
'Y ywytyr Eremon pe har ywytyr Mizar pe har wezyw ypu rupi a'e.
Wànoànog uwyrykahy mehe yrykaw Zotàw pe.
Hezemumikahy haw herehe Tupàn hemimur karer
Nuzawy kwaw ykotok a'e.
8 Tuwe wexak kar heamutar katu haw ihewe 'aromo nehe.
Pyhaw amuzàg ikatu haw rehe zegar haw ihe.
Aze'eg Tupàn hemuigo kar har pe.
9 Apuranu Tupàn itahu hemimar rehe ihe.
— Màràzàwe tuwe nereharaz ihewi.
Màràzàwe tuwe heàmàtyry'ymar
Upuraraw kar ma'erahy ihewe wà, a'e izupe.
10 Te hekagwer hahy ihewe,
Heàmàtyry'ymar herehe waze'eg zemueteahy mehe.
Tuweharupi upuranu herehe wà.
— Ma'e pe hekon Tupàn nezar a'e, i'i ihewe wà.
11 Màràzàwe tuwe azemumikahy ihe.
Màràzàwe tuwe naherurywete kwaw.
Nezewe rehe we àro Tupàn ikatu ma'e hemiapo ràm ihe.
Amume'u ikatu haw teko wanupe ihe no.