1 Tuweharupi amume'u putar Tupàn Tuweharupi Wiko Ma'e ikatu haw nehe.

'Ar nànàn hezuru umume'u putar ikatu haw nehe.

2 Amume'u putar ikatu haw nehe, ta'e uzapo ikatuahy ma'e a'e xe.

Ma'erahy ipuraraw par wenu putar ko heze'eg wà nehe. Hurywete putar henu mehe wà nehe.

3 Pemume'u Tupàn Tuweharupi Wiko Ma'e uhua'u haw herehe we nehe.

Pemume'u ikatu haw heinuinuromo nehe.

4 — Hepytywà pe nehe, a'e Tupàn Tuweharupi Wiko Ma'e pe ihe. Uwazar heze'eg ihewe a'e.

Hepyro ma'e wi hekyze haw wi upaw rupi a'e.

5 Aze teko ikatu 'ym ma'e upuraraw kar ma'erahy amo wanupe wà, ipuraraw par ume'e hehe wà. Hurywete hexak mehe wà.

Nuzemumikahy pixik kwaw wà nehe, ta'e Tupàn nupuir pixik kwaw wanuwi a'e nehe xe.

6 Ihe aiko ma'erahy ipuraraw par romo ihe. Ahapukaz ihe.

Tupàn Tuweharupi Wiko Ma'e herenu a'e. Hepyro heremipuraraw wi a'e.

7 Tupàn Tuweharupi Wiko Ma'e heko haw pe har upyta Tupàn wi ukyze ma'e wanuwake a'e.

Umunyryk kar ikatu 'ymaw wanuwi wi a'e.

8 Ne ae ezeagaw Tupàn Tuweharupi Wiko Ma'e ikatu haw ikwaw paw rehe nehe.

Aze Tupàn omonokatu amo teko nehe, hurywete putar a'e teko a'e nehe.

9 Tuwe Tupàn pe uzemonokatu ma'e paw ukyze izuwi wà nehe,

Ta'e uhyk putar ma'e izuwi ukyze ma'e wanupe nehe xe.

10 Te naheta kwaw temi'u zàwàruhu iriàw wanupe. Ima'uhez a'e wà.

Uhyk putar ma'e teko wanupe nehe, aze a'e teko uze'eg Tupàn Tuweharupi Wiko Ma'e pe wà nehe, — Urepytywà pe nehe, u'e pà izupe wà.

11 Pezur pezeapyaka katu pà nehe, hemyrypar kwàkwàmo wà.

Apumu'e putar Tupàn Tuweharupi Wiko Ma'e wi pekyze àwàm rehe nehe.

12 Aze pepurumumaw wer kwarahy tetea'u wanehe peneko pà nehe,

Aze penurywete wer kwarahy tetea'u rehe nehe,

13 pezeagaw ikatu 'ym ma'e imume'u 'ymaw rehe nehe.

Penemu'em zo nehe.

14 Petyryk ikatu 'ym ma'e wi nehe. Pezapo ikatu ma'e peho peiko nehe.

Pekar zeàmàtyry'ym 'ymaw rehe peneko àwàm nehe. Pezapo ma'e paw katu haw hexak pà nehe.

15 Tupàn uzekaiw katu teko imunar 'ym ma'e wanehe hemu'em 'ym ma'e wanehe a'e.

Weinu a'e wà, aze a'e teko wenoz ma'e izupe a'e wà.

16 Wiko ikatu 'ym ma'e iapo har waàmàtyry'ymar romo a'e.

A'e rupi, wamàno re amo teko heharaz wanuwi na'arewahy wà.

17 Amo teko weruzar Tupàn Tuweharupi Wiko Ma'e wà.

Aze a'e teko wenoz Tupàn a'e wà, a'e wenu waze'eg mehe wà.

Upyro ma'erahy paw wi wà.

18 Tupàn upyta uzemumikahy ma'e wanuwake a'e.

Upyro teko upyro àwàm hàro re upytu'u ma'e a'e wà.

19 Ikatu ma'e upuraraw ma'erahy tetea'u wà.

Tuweharupi Wiko Ma'e upyro a'e teko ma'erahy nànàn wà.

20 Upyro tuwe a'e wà, waàmàtyry'ymar wanuwi wamunyryk kar pà a'e wà.

Nuzuhaw kwaw ni pitài wàkàgwer wà.

21 Wakatu 'ymaw uzuka kar putar teko ikatu 'ym ma'e wà nehe.

Aze amo na'iakatuwawahy kwaw ikatu ma'e wanehe wà nehe, Tupàn uzepyk putar a'e teko wanehe nehe.

22 Tupàn Tuweharupi Wiko Ma'e upyro wemiruze'eg wamàno haw wi wà.

— Hepyro pe nehe, aze amo i'i izupe wà nehe, Tupàn nuzepyk kwaw a'e teko wanehe nehe.

<- ZEGAR HAW 33ZEGAR HAW 35 ->