1 O Tupàn Tuweharupi Wiko Ma'e, emume'u ikatu ma'e romo hereko haw nehe,

Ta'e azapo ikatu ma'e ihe xe.

Azeruzar katu nerehe no.

2 Eme'egatu herehe nehe. Heagaw pe nehe, Tupàn Tuweharupi Wiko Ma'e.

Ekwaw heremimutar nehe. Ekwaw hema'enukwaw paw nehe no.

3 Ta'e nepuruamutar katu haw wexak kar heho àwàm ihewe ne xe.

Neze'eg azeharomoete har wexak kar heata àwàm ihewe no.

4 Nata kwaw hemu'em ma'e wainuromo ihe.

Naiko kwaw ikatu ma'e romo uzemume'u mua'u ma'e wainuromo ihe.

5 Nazemono'og kwaw iaiw ma'e wanehe we.

Ikatu 'ym ma'e wanupi nata kwaw ihe.

6 O Tupàn Tuweharupi Wiko Ma'e, apuez hepo hekatu haw hexak kar pà ihe.

Ata ma'ea'yr hapy haw nerenataromo har izywyr ihe,

Nemuwete katu har wainuromo ihe.

7 Uruzegar newe, ta'e nekatuahy urewe ne xe.

Urumume'u neremiapo kwer ikatuahy ma'e no.

8 O Tupàn Tuweharupi Wiko Ma'e.

Azamutar katu neràpuz nereko haw ihe, tàpuzuhu nekàgaw ihyape katu haw henaw ihe.

9 Hemumaw zo pe amogwer ikatu 'ym ma'e iapo har wainuromo nehe.

Erezepyk putar puruzuka ma'e wanehe nehe. Hepyro a'e nezepykaw wi nehe,

10 Hepyro ikatu 'ym ma'e tuweharupi iapo har wanehe nezepykaw wi nehe.

Upyhyk teko wanemetarer wà, tuwihaw wanenataromo wemu'emaw hekuzaromo wà.

11 Ihe azapo ikatu ma'e ihe.

Hepuhareko pe hepyro pà nehe.

12 Ikatu 'ymaw nahemumaw pixik kwaw nehe.

Teko Tupàn Tuweharupi Wiko Ma'e ikatu haw rehe wazemono'og mehe, amume'u putar ikatu haw nehe.

<- ZEGAR HAW 25ZEGAR HAW 27 ->