1 O Tupàn Tuweharupi Wiko Ma'e. Ikatu 'ym ma'e wanehe nezepykaw ainoz newe.

Einu heze'eg nehe. Ezapo ma'e hereminozgwer rupi nehe. Hepy'a ikatu a'e ma'e henoz mehe.

Einu katu nehe, ta'e naheremu'em kwaw ihe xe.

2 Emume'u ikatu ma'e romo hereko haw nehe,

Ta'e erekwaw ikatu ma'e iapo haw ne xe.

3 Erekwaw hepy'a ne.

Pyhaw ereme'e herehe.

Azeharomoete ereme'egatu herehe.

Nerexak kwaw ni pitài ikatu 'ym ma'e iputar haw hepy'a pe.

Aze ma'e iro newe, namume'u kwaw a'e ma'e newe ihe. Amogwer umume'u iro ma'e newe wà.

4 Naiko kwaw wazàwe ihe.

Tuweharupi aruzar neze'eg.

Aexak puruzuka ma'e wanemiapo kwer ikatu 'ym ma'e. Ihe nazapo kwaw ma'e wazàwe ihe.

5 Tuweharupi ata nerape rupi.

Nerape wi napiaw kwaw.

6 Aze'eg newe, Tupàn, ta'e erewazar heze'eg ihewe ne xe.

Herenu pe nehe. Ezeapyaka katu heze'eg rehe nehe.

7 Exak kar heamutar katu haw ihewe nehe, hepyro har.

Neruwake hereko mehe heàmàtyry'ymar nupuner kwaw ikatu 'ym ma'e iapo haw rehe ihewe wà.

8 Hepyro pe ikatu 'ymaw wi nehe,

Nereha romo hereko mehe mo nehe.

9 Hemim pe nepepo wy pe teko ikatu 'ym ma'e wanuwi nehe. Nezewe mehe nupuner kwaw hezuka haw rehe wà nehe.

Heàmàtyry'ymar tynehem purehe iakatuwawahy 'ymaw pupe wà. Umàmàn heywyr wà, heàmàtyry'ym pà wà.

10 Napuhareko kwaw ni pitài wà. Uze'eg ukatu wera'u haw rupi wà no.

11 Ur heraikweromo heruwake wà.

Umàmàn heywyr wà kury.

Wàro hereitykaw 'ar waiko wà.

12 Nuzawy kwaw zàwàruhu iriàw uzeàmim ma'e kwer wà. Heràro waiko wà.

Uzemuàgà'ym hepei'ài'àg àwàm rehe wà.

13 Epu'àm nehe, Tupàn Tuweharupi Wiko Ma'e. Eho heàmàtyry'ymar wakutyr nehe.

Emumaw ne wà nehe.

Hepyro pe ikatu 'ym ma'e wanuwi nehe, netakihe puku pupe nehe.

14 O Tupàn Tuweharupi Wiko Ma'e nekàgaw rupi hepyro pe wanuwi nehe. Azeharomoete. Upyhyk wemimutar upaw rupi wiko mehe we a'e wà. Hemunyryk kar pe wanuwi ne nehe.

Ezepyk a'e teko wanehe ma'erahy neremimonokatu kwer ipuraraw kar pà wanupe nehe.

Tuwe heta tetea'u zepyk àwàm wana'yr wanupe nehe no.

Tuwe heta we zepyk àwàm wanemimino wanupe nehe no.

15 Ihe uruexak putar ihe nehe, ta'e aiko katu ihe xe.

Heme'e mehe, herehe we nereko haw hemynehem putar herurywete haw pupe nehe.

<- ZEGAR HAW 16ZEGAR HAW 18 ->