118
Pemume'u Tupàn ikatu haw izupe nehe
1 Pemume'u Tupàn Tuweharupi Wiko Ma'e ikatu haw izupe nehe, ta'e ikatuahy a'e xe.
Nupaw pixik kwaw zaneamutar katu haw nehe.
2 Tuwe teko Izaew izuapyapyr uze'eg nezewe wà nehe.
— Nepuruamutar katu haw nupaw pixik kwaw nehe, tuwe i'i izupe wà nehe.
3 Tuwe xaxeto Tupàn henataromo har uze'eg nezewe wà nehe.
— Nepuruamutar katu haw nupaw pixik kwaw nehe, tuwe i'i izupe wà nehe.
4 Tuwe izuwi ukyze ma'e paw uze'eg nezewe wà nehe.
— Nepuruamutar katu haw nupaw pixik kwaw nehe, tuwe i'i izupe wà nehe.
5 Ma'erahy ipuraraw mehe aze'eg Tupàn Tuweharupi Wiko Ma'e pe wahy haw rupi ihe.
Uwazar heze'eg ihewe hemuhem kar pà ma'erahy wi a'e.
6 Tupàn Tuweharupi Wiko Ma'e wiko herehe we a'e. Nakyze kwaw.
Ma'enugar ikatu 'ym ma'e upuner teko ihewe iapo haw rehe.
7 Tupàn Tuweharupi Wiko Ma'e wiko herehe we a'e. A'e ae hepytywà a'e.
A'e rupi aexak putar heàmàtyry'ymar waneityk mehe ihe wà nehe.
8 Tupàn Tuweharupi Wiko Ma'e rehe zanezeruzar haw
Ikatu wera'u teko wanehe zanezeruzar haw wi.
9 Tuweharupi Wiko Ma'e rehe zanezeruzar haw
Ikatu wera'u teko ikàg ma'e hemetarer katu ma'e wanehe zanezeruzar haw wi no.
10 Heta tetea'u heàmàtyry'ymar heywyr har wà.
Amumaw a'e teko Tupàn Tuweharupi Wiko Ma'e ikàgaw rupi ihe wà.
11 Umàmàn heywyr wà.
Amumaw a'e teko Tupàn Tuweharupi Wiko Ma'e ikàgaw rupi ihe wà.
12 Uzemono'ono'og heywyr hàiru ài wà.
Nezewe rehe we ukaz tata pupe ywyra àkàgwer uxinig ma'e kwer ài wà.
Amumaw a'e teko Tupàn Tuweharupi Wiko Ma'e ikàgaw rupi ihe wà.
13 Heàmàtyry'ymahy wà,
Ta'e ipureityk wer tuwe herehe wà xe.
Tupàn Tuweharupi Wiko Ma'e hepytywà a'e.
14 Tupàn Tuweharupi Wiko Ma'e hemukàg kar a'e. Hemuigo kar upuner ma'e romo a'e.
Hepyro a'e.
15 Tupàn hemiaihu uhapukaz wàmàtyry'ymar waneityk awer rehe wà. Penu waze'eg mehe pe wà nehe. Wàpuzràn wanenaw pe uhapukaz nezewe wà.
— Tupàn Tuweharupi Wiko Ma'e uzapo uhua'u ma'e upuner haw rupi a'e.
16 Upuner haw rupi uzapo uhua'u ma'e.
Tupàn Tuweharupi Wiko Ma'e ipuner haw weityk zaneàmàtyry'ymar wà, i'i wà.
17 Nàmàno kwaw nehe.
Aikuwe wiwi putar nehe.
Amume'u putar Tupàn Tuweharupi Wiko Ma'e hemiapo kwer ihe nehe.
18 Uzepyk tuwe herehe a'e.
Nezewe rehe we nahemumàno kar kwaw.
19 Pewàpytymawok Tupàn Hàpuzuhu hukenaw ihewe nehe.
Aixe putar hupi nehe. Amume'u putar Tupàn Tuweharupi Wiko Ma'e ikatu haw nehe.
20 Tuweharupi Wiko Ma'e wiko 'àg uken izar romo a'e.
Xo teko Tupàn heruzar har zo upuner hupi wixe haw rehe wà.
21 O Tupàn, uruamutar katu ihe, ta'e herenu pe ne xe.
Ereityk heàmàtyry'ymar ne wà no.
22 Tàpuz iapo har weityk amo ita wà.
Iahykaw rehe a'e ita ikàg wera'u amo ita wanuwi a'e.
23 Tupàn Tuweharupi Wiko Ma'e uzapo a'e ma'e a'e.
Ikatuahy hemiapo kwer.
24 Ko 'ar rehe Tupàn Tuweharupi Wiko Ma'e weityk wàmàtyry'ymar wamono wà.
Tuwe ko 'ar uzeapo zanemuryw kar har romo nehe. Tuwe zanerurywete nehe.
25 Urepyro pe nehe, o Tuweharupi Wiko Ma'e, urepyro pe nehe.
Uremuigo kar pe temi'u hereko har romo ma'e hereko har romo nehe, o Tupàn.
26 Aze amo ur Tupàn Tuweharupi Wiko Ma'e her rehe nehe, tuwe Tupàn omono uze'egatu hehe nehe.
Xe Tupàn tàpuzuhu pe uruiko mehe oromono ureze'egatu penehe paw rupi ure.
27 Tuweharupi Wiko Ma'e wiko Tupàn romo a'e. Zaneratainy romo hekon.
Pezypyrog mynykawhu iapo pà ywyra hàkàgwer hereko pà pepo pe nehe.
Peata ma'ea'yr hapy haw izywyr nehe.
28 Ereiko hezar romo ne. Amume'u putar nekatu haw nehe.
Ereiko hezar romo. Amume'u putar nehua'u haw nehe no.
29 Pemume'u Tupàn Tuweharupi Wiko Ma'e ikatu haw nehe, izupe nehe, ta'e ikatu a'e xe.