103
Tupàn ikatu haw rehe zegar haw
Zegar haw Tawi hemiapo kwer
1 O Tupàn Tuweharupi Wiko Ma'e. Tuwe hepy'a umume'u tuwe nekatu haw nehe.
Tuwe amume'u Tupàn ikatuahy haw hekàgaw nànàn nehe.
2 Tuwe hepy'a paw umume'u Tupàn Tuweharupi Wiko Ma'e ikatu haw nehe.
Tuwe nahereharaz kwaw ni pitài teko wanehe ize'egatu wi nehe.
3 Tupàn Tuweharupi Wiko Ma'e umunàn heremiapo kwer ikatu 'ym ma'e paw a'e.
Hemukatu hema'eahy haw nànàn no.
4 Hepyro hemàno haw wi.
Umur uze'egatu herehe heamutar katu pà, ikatu ma'e ihewe imur pà no.
5 Hemurywete kar ikatu ma'e tetea'u imur pà ihewe.
A'e rupi aikuwe kwàkwàmo ài. Hekàg wiràhu ài.
6 Upureruze'eg mehe Tupàn Tuweharupi Wiko Ma'e upuhareko temetarer 'ym ma'e wà.
Numumunar kar kwaw amo teko a'e teko wama'e rehe wà.
7 Kwehe mehe umume'u wemiapo ràm Moizez pe.
Wexak kar wemiapo ikàg ma'e teko Izaew wanupe no.
8 Tupàn Tuweharupi Wiko Ma'e ikatuahy a'e.
Upurupuhareko a'e no. Iàrew purupe ikwahy haw. Upuruamutar katu no.
9 Nuiko kwaw tuweharupi zaneremiapo kwer ikatu 'ym ma'e imume'u pà a'e.
Ikwahy haw upaw putar amo 'ar mehe nehe.
10 Xiapo ikatu 'ym ma'e zane. Nezewe rehe we Tupàn Tuweharupi Wiko Ma'e nuzepyk kwaw zanerehe a'e, ikatu 'ym ma'e iapo har wanehe uzepykaw zàwe a'e.
Numekuzar kwaw zaneremiapo kwer ikatu 'ym ma'e zanerehe uzepykaw pupe a'e.
11 Ywak muitea'u ywy 'aromo tuz a'e.
Nezewegatete izuwi ukyze ma'e wamutar katu haw uhua'u wera'u wanemiapo kwer ikatu 'ym ma'e wi a'e no.
12 Kwarahy ihemaw muitea'u heixe haw wi a'e.
Nezewegatete umunyryk kar zaneremiapo kwer ikatu 'ym ma'e muitea'u zanewi a'e no.
13 Awa wereko katu tuwe wa'yr wà.
Nezewegatete Tupàn Tuweharupi Wiko Ma'e wereko katu tuwe izuwi ukyze ma'e wà no.
14 Ukwaw zaneapo awer a'e xe.
Ima'enukwaw ywyku'i romo zanereko haw rehe.
15 Zanereko haw nuzawy kwaw ka'api'i.
Hezuz a'e. Iputyr ka'akyr kaiwer pe har ài.
16 Na'e ur ywytu kury. Ukàzym iputyr.
A'e re ni amo nuexak pixik kwaw iputyr kwer wà nehe.
17 Aze teko umuwete katu Tupàn Tuweharupi Wiko Ma'e izuwi ukyze katu pà wà, Tupàn uzamutar katu a'e teko a'e wà. Wamutar katu haw nupaw pixik kwaw nehe.
Tupàn ikatu haw nupaw pixik kwaw nehe.
Omono wana'yr wanupe. Omono wa'yr wapurumuzàmuzàg wanupe no.
18 Omono putar teko wanupe nehe, ze'eg awer Tupàn rehe we iapo katu pyrer heruzar har wanupe nehe.
Weruzar katu ize'eg wà.
19 Tupàn Tuweharupi Wiko Ma'e umuapyk katu wenaw ywak rehe. Tuwihawete romo hekon a'e.
Weruze'eg teko paw a'e wà, ma'e paw a'e wà.
20 Pemume'u Tupàn Tuweharupi Wiko Ma'e ikatu haw nehe, heko haw pe har ikàg ma'e wà, heko haw pe har upuner ma'e wà.
Peinu katu ize'eg mehe.
Peruzar ize'eg no.
21 Pemume'u Tupàn Tuweharupi Wiko Ma'e ikatu haw nehe, heko haw pe har ywate har paw wà,
Hemiruze'eg wà, hemiapo putar haw iapo har wà.
22 Pemume'u Tuweharupi Wiko Ma'e ikatu haw nehe,
Wikuwe ma'e paw wà, ipureruze'egaw nànànar wà.