ZOEW 3

Tupàn umume'u putar teko ywy nànànar wanemiapo kwer ikatu 'ym ma'e

1 Tupàn Tuweharupi Wiko Ma'e uze'eg nezewe. — A'e 'ar rehe amukatu putar Zeruzarez pe har waneko haw ihe nehe, Zuta ywy rehe har waneko haw ihe nehe no. 2 Na'e amono'og putar teko paw ywy nànànar ihe wà nehe. Araha putar ywyàpyznaw Zuzapa her ma'e pe ihe wà nehe. A'e pe amume'u putar wanemiapo kwer ikatu 'ym ma'e nehe. Nezewe azapo putar nehe, ta'e uzapo ikatu 'ym ma'e tetea'u Izaew heremixamixak kwer wanupe a'e wà xe. Umuhàmuhàz Izaew izuapyapyr màràmàràn ywy rehe wà. Umuza'aza'ak heywy wà no. 3 Omomor ita'i ma'e papar haw hereko har wà, heremiaihu imunehew pyrer wazar ràm hexaexak pà wà. Ume'eg kwarer amo pe uma'ereko e ma'e romo wà. Ume'eg kuzàtài amo pe uma'ereko e ma'e romo wà no. Omono wanekuzarer kuzàwyzài wanupe wapuhe oho awer rehe wà. Ume'eg kar win tetea'u wà no.

4 Teko Xir tawhu pe har wà, teko Xitom tawhu pe har wà, teko Piri ywy rehe har wà, ma'e peputar nehe. Ma'e amono putar peme nehe. Aipo pezepyk wer herehe. Aze a'e rupi nehe, ihe azemuàgà'ym penehe hezepyk àwàm rehe ihe nehe no. 5 Ta'e pemunar hema'e rehe pe xe. Parat, or no. Pemonokatu a'e temetarer a'e ita hekuzar katu ma'e tupàn a'ua'u pezar wanàpuzuhu pe. 6 Peraha teko Zuta ywy rehe har wà. Peraha Zeruzarez pe har wà. Muitea'u waiwy wi peraha wà. Peme'eg Kere ywy rehe har wanupe uma'ereko e ma'e romo wà. 7 Arur wi putar heremiaihu a'e ywy muitea'u har wi ihe wà nehe. Iaiw ma'e pezapo wanupe. A'e rupi iaiw ma'e azapo putar peme nezewegatete ihe nehe no. 8 Amo upyhyk putar pena'yr penazyr a'e wà nehe. Ume'eg putar Zuta rehe har wanupe uma'ereko e ma'e romo wà nehe. Azapo kar putar a'e ma'e ihe nehe. Zuta ume'eg putar pena'yr Xawe izuapyapyr wanupe wà nehe. Muitea'u waiwy xe wi. Ihe Tupàn Tuweharupi Wiko Ma'e amume'u ko ma'e teko ihe kury, i'i Tupàn.

9 — Pemume'u ko ma'e teko ywy nànànar wanupe nehe.

Pezemuàgà'ym zeàmàtyry'ym àwàm rehe nehe.

Tupàn uzàmàtyry'ym amogwer teko a'e wà nehe.

Penoz zauxiapekwer wà nehe.

Tuwe zauxiapekwer paw uhem wà wà nehe.

Tuwe uzemuàgà'ym zeàmàtyry'ym àwàm rehe wà nehe.

10 Pema'ema'e ywy imuwamuwakaw takihepuku romo iapo pà nehe.

Pema'ema'e petakiheapar purukutukaw romo iapo pà nehe.

Tuwe te ikàg 'ym ma'e uzemume'u ikàg ma'e romo wà nehe.

11 Pezur na'arewahy nehe, teko ywy ko ywy huwake har pe har wà.

Pezemono'ono'og ywyàpyznaw rehe nehe.

Tuwe puràmàtyry'ym 'ym ma'e uzeapo zauxiapekwer romo wà nehe.

12 Pezemuàgà'ym nehe, teko ywy nànànar wà.

Pezur ywyàpyznaw Zuzapa her ma'e pe nehe.

Ta'e ihe Tupàn Tuweharupi Wiko Ma'e ihe xe,

azepyk putar teko ko ywy huwake har wanehe upaw rupi ihe nehe xe.

13 A'e ywy rehe har uzapo ikatu 'ym ma'e tetea'u a'e wà.

A'e rupi amonohok kar putar ihe wà nehe.

Teko omonohok arozràn xirik ipo'o haw 'ar mehe wà. Nezewegatete amonohok putar a'e teko ihe wà nehe no.

Teko upyropyrog uwà rehe zapepohu pupe itykwer imuy'e pà izuwi wà. Nezewegatete amupyropyrog kar putar a'e teko ihe wà nehe no,

i'i Tupàn.

14 Teko tetea'u ur putar ywyàpyznaw Zepykaw her ma'e pe wà nehe. A'e re amo ae teko ur putar a'e pe wà nehe no.

Tupàn Tuweharupi Wiko Ma'e i'ar uhem etea'i.

Ur putar ywyàpyznaw Zepykaw her ma'e pe nehe.

15 Kwarahy upytu'u uhyape katu re.

Zahy upytu'u uhyape katu re no.

Zahytata upytu'u uhyape katu re wà no.

Tupàn omono putar uze'egatu wemiaihu wanehe

16 Tupàn Tuweharupi Wiko Ma'e uze'eg wahyhaw rupi ywytyr Xiàw pe kury.

Ize'egaw nuzawy kwaw àmàn iànoànogaw.

Zeruzarez pe har wenu ize'egaw iànoànogaw waiko wà.

Ywak ywy uryryryryz wà.

Tupàn uzekaiw katu Izaew izuapyapyr wanehe wà, wàmàtyry'ymar wanuwi wapyro pà wà.

17 Nezewe pekwaw putar Tupàn Tuweharupi Wiko Ma'e pezar romo hereko haw nehe.

Aiko Xiàw pe ihe, ywytyr ihewe imonokatu pyrer pe ihe.

Zeruzarez uzeapo putar tawhu ikatuahy ma'e romo nehe.

Teko amo ae ywy rehe har nupyro pixik kwaw a'e tawhu wà nehe.

18 A'e 'ar rehe uwà tyw upyk putar ywytyr paw wà nehe.

Tapi'ak umai'u putar ywytyr nànàn wà nehe no.

'Y tetea'u uwyryk putar yrykaw Zuta ywy rehe har wanupi nehe.

Amo yrykawhu uhem putar heràpuzuhu wi nehe.

Umuhàmuhàz putar 'y ywyàpyznaw Akaz her ma'e nànàn nehe.

19 Ezit ywy uzeapo putar teko heta 'ymaw romo nehe.

Enom ywy uzeapo putar ywyxiguhu romo nehe,

ta'e a'e ywy rehe har wixe Zuta ywy rehe a'e wà xe,

teko ikatu 'ym ma'e iapo 'ymar wazuka pà a'e wà xe.

20-21 Azepyk putar a'e teko wazuka arer wanehe nehe.

Azepyk putar a'e ma'e iapo arer wanehe nehe. Tuweharupi heta putar teko Zuta ywy rehe wà nehe, Zeruzarez pe wà nehe no.

Upaw.

<- ZOEW 2