5
Zeruzarez pe har ikatu 'ymaw
1 Zeruzarez pe har wà. Peho nahu rupi nehe.
Peme'e ma'e tawhu pupe har paw wanehe nehe.
Pexak ma'e peneha pupe nehe.
Pekar teko ikatu pe har wà nehe.
Aipo pepuner amo ikatu ma'e iapo har hexakaw rehe.
Aipo pepuner pitài ikatu ma'e iapo pà uzeagaw ma'e hexakaw rehe.
Aze pexak pitài nehe, Tupàn umunàn putar Zeruzarez wanemiapo kwer wanehe uzepyk 'ym pà nehe.
2 Pemume'uahy penemiapo ràm Tupàn Tuweharupi Wiko Ma'e her rehe.
Nezewe rehe we penemu'em.
3 Tupàn uputar pezeruzar ire pepytu'u 'ymaw a'e.
Uzepyk penehe.
Nezewe rehe we napezekaiw kwaw hehe.
Pekamikamik a'e.
Nezewe rehe we napekwaw kwaw ikatu 'ymaw wi petyrykaw.
Pezàmàtyry'ym heruzar 'ym pà. Napezewyr wer kwaw izupe.
4 Na'e aze'eg hezeupe.
— Xo ma'e kwaw 'ymar zo wiko nezewe wà.
Nukwaw katu kwaw ma'e wà.
Nukwaw kwaw Tupàn Tuweharupi Wiko Ma'e hemimutar wà.
Nukwaw kwaw uzar hemiapo putar haw wà.
5 Aekar putar awa upuner ma'e ihe wà kury.
Aze'eg putar wanupe nehe.
Azeharomoete ukwaw Tupàn Tuweharupi Wiko Ma'e hemiapo putar haw wà.
Ukwaw uzar hemiapo kar haw wà, a'e hezeupe.
Nezewe rehe we paw rupi weityk Tupàn teko wazar heko haw wà.
Na'ipureruzar wer kwaw hehe wà.
6 A'e rupi zàwàruhu iriàw ka'a pe har uzuka putar a'e awa a'e wà nehe.
Awarahu ywyxiguhu pe har upei'ài'àg putar wà nehe.
Zàwàrun uzeàmim putar wà nehe, tawhu a'e awa waneko haw iàmàtyry'ym pà wà nehe.
Aze uhem tawhu wi wà nehe, upei'ài'àg putar wà nehe.
Ta'e wanemiapo kwer ikatu 'ym ma'e heta tetea'u wà xe.
Tuweharupi weityk Tupàn wà no.
7 Tupàn upuranu kury.
— Màràzàwe tuwe amunàn putar heremiaihu wanemiapo kwer ikatu 'ym ma'e ihe.
Hereityk a'e wà.
Umume'uahy wemiapo ràm tupàn a'ua'u waner rehe wà. Azeharomoete a'e tupàn nuiko kwaw tupànete romo wà.
Amono temi'u heremiaihu wanupe ihe.
Uhyk wanupe.
Nezewe rehe we nuzawy kwaw wemireko 'ym puhe oho ma'e wà.
Umumaw u'ar kuzà wyzài wanehe we wà.
8 Nuzawy kwaw kawaru ma'e tetea'u i'u har wà.
Iho wer tuwe amo ipuhe wà.
Pitàitàigatu oho uzeake har hemireko hekar pà wà.
9 Aipo napuraraw kar kwaw ma'erahy wanupe agwer ma'e hekuzaromo nehe.
Aipo nazepyk kwaw agwer teko wanehe nehe.
10 Aze'eg putar waàmàtyry'ymar wanupe nehe.
— Peityk wanemitygwer ma'ywa tyw nehe, a'e putar wanupe nehe.
Nezewe rehe we namumaw kar kwaw paw rupi nehe.
— Pezo'ok a'e ma'ywa 'yw ywy wi nehe, a'e putar wanupe nehe.
Ta'e nuiko kwaw hema'e romo a'e wà xe.
11 Teko Zuta ywy rehe har a'e wà, Teko Izaew ywy rehe har a'e wà no,
hereityk wà, amo hekar pà uzar romo wà.
Ihe Tupàn Tuweharupi Wiko Ma'e aze'eg kwez kury.
Tupàn weityk Izaew wà
12 — Tupàn Tuweharupi Wiko Ma'e hemu'em urewe a'e, i'i Tupàn Tuweharupi Wiko Ma'e pe wà.
— Tupàn Tuweharupi Wiko Ma'e nuzapo kwaw ma'e a'e nehe. Ni amo ikatu 'ym ma'e nuzeapo kwaw zanewe nehe. Naheta kwaw zeàmàtyry'ymawhu nehe. Naheta kwaw ma'uhez haw nehe, i'i uzeupeupe wà.
13-14 — Tupàn ze'eg imume'u har nuzawy kwaw ywytu wà. Numume'u kwaw Tupàn ze'eg purupe wà, i'i teko wà. Tupàn Tuweharupi Wiko Ma'e Upuner Wera'u Ma'e uze'eg ihewe.
— Zeremi, i'i ihewe. — Amume'u putar 'aw teko wanupe uzeapo ma'e ràm ihe nehe kury, ta'e umume'u a'e ma'e a'e wà xe. Amuhem kar putar heze'eg nezuru wi tata ài ihe nehe, Zeremi. 'Aw teko wiko putar zepe'aw ài wà nehe. Tata ukaz putar wamumaw pà nehe, i'i ihewe.
15 Peinu katu Tupàn Tuweharupi Wiko Ma'e ize'eg nehe kury, teko Izaew izuapyapyr wà.
— Ihe Tupàn Tuweharupi Wiko Ma'e ihe, arur putar teko amo ywy muite har rehe har xe ihe wà nehe. Peàmàtyry'ym putar wà nehe. Ikàg a'e wà. Kwehe mehe ikàg wà. Napekwaw kwaw waze'eg. Peinu katu waze'eg mehe, napekwaw kwaw nehe. 16 Zauxiapekwer a'e ywy rehe har ipuruzukaiwahy wà. Uzywà teko u'yw pupe wazuka pà wapuhareko 'ym pà wà. 17 U'u putar arozràn penemipo'o kwer wà nehe. U'u putar penemi'u ràm wà nehe no. Uzuka putar pena'yr wà nehe. Uzuka putar penazyr wà nehe no. U'u putar peneimaw àràpuhàràn imono'og pyrer wà nehe. U'u putar peneimaw tapi'ak wà nehe no. U'u putar ma'ywa i'a kwer uwà penemitygwer wà nehe, pi 'yw i'a kwer wà nehe no. Zauxiapekwer weityk putar tawhu pàrirogawtàtà ma'e pupe uzepyro ma'e wanuwi nehe. Pezeruzar e a'e tawhu rehe. Umumaw putar wà nehe.
18 Nezewe rehe we ihe Tupàn Tuweharupi Wiko Ma'e amume'u ko ma'e ihe kury.
— A'e 'ar mehe namumaw kar kwaw heremiaihu paw rupi ihe wà nehe. 19 Teko upuranu putar nerehe wà nehe.
— Màràzàwe tuwe Tupàn uzapo a'e ma'e paw a'e, i'i putar newe wà nehe. Eze'eg nezewe wanupe a'e 'ar mehe nehe, Zeremi. — Peityk Tupàn pe. Pemuwete tupàn amo ywy rehe har ko ywy rehe wanerur ire. Ko 'ar rehe pema'ereko putar amo ae ywy rehe har wanupe nehe. Nuiko kwaw peywy rehe har romo wà, ere wanupe nehe, i'i Tupàn.
Tupàn umumuranu wemiaihu wà
20 Uze'eg wi Tupàn.
— Emume'u ko ma'e Zako izuapyapyr wanupe nehe, Zuta ywy rehe har wanupe nehe no. 21 — Pezekaiw katu ko ze'eg rehe nehe, teko iranaiwahy ma'e wà, teko ma'e kwaw par 'ym wà. Heta peneha peme. Napeixak kwaw ma'e. Heta peapyakwar peme no. Napeinu kwaw ma'e. 22 Aiko Tupàn Tuweharupi Wiko Ma'e romo ihe. Màràzàwe tuwe napekyze kwaw ihewi. Màràzàwe tuwe naperyryryryz kwaw herenataromo. Ihe amono ywyxiguhu ywyzaw romo yryhu rehe ihe. Nupuner pixik kwaw hahaw paw rehe. Wikwahy yryhu. Nezewe rehe we nupuner kwaw hahaw paw rehe. 'Ykotok tyapu. Nuhem kwaw a'e wi wà. 23 Peiko teko hereruzar 'ymar romo heremiapo putar haw iapo 'ymar romo. Heàmàtyry'ym pe kury hereityk pà. 24 — Zakyze Tupàn Tuweharupi Wiko Ma'e Zanezar wi nehe, napeze kwaw ihewe pepy'a pupe. — Umugyr kar àmàn 'ar ikatu ma'e rehe, arozràn ipo'o re, ipo'o zanune no. Kwarahy nànàn werur ma'e ipo'o haw 'ar zanewe. Nezewe rehe we — Tuwe zakyze izuwi nehe, napeze kwaw izupe. 25 Penemiapo kwer ikatu 'ym ma'e a'e, peaiw haw a'e, umunyryk kar a'e ikatu ma'e pewi a'e. Napepuner kwaw a'e katu haw ipyhykaw rehe.
26 Heta awa ikatu 'ym ma'e heremiaihu wainuinuromo wà. Nuzawy kwaw teko wiràmiri pyhykaw iapo har wà. Nupyhyk kwaw wiràmiri wà. Upyhyk teko wà. 27 Pexak amo wiràmiri wamunehew paw tynehem ma'e. Nezewegatete wanàpuz tynehem ma'e pupe. Imunar a'e ma'e rehe paw rupi wà. A'e rupi upuner wà. Hemetarer katu wà no. 28 Ikyra katu wà no. Uhyk wanemi'u wanupe. Wakatu 'ymaw uhua'u. Nupytywà kwaw tu 'ym ma'e wà ihy 'ym ma'e wà no. Nuzekaiw kwaw hemetarer 'ym ma'e wanehe wà. 29 Azepyk putar wanehe wanemiapo kwer hekuzaromo nehe. Azepyk putar 'aw teko wanehe nehe. Ihe Tupàn Tuweharupi Wiko Ma'e aiko ko ma'e imume'u har romo ihe.
30 Amo ma'e iaiw ma'e purumupytuhegatu kar haw uzeapo iko ywy rehe. 31 Heze'eg imume'u har numume'u kwaw ze'eg azeharomoete har waiko wà. Upytywà xaxeto wà. A'e rupi xaxeto wiko teko wanuwihaw romo wà. Nezewe haw ikatu heremiaihu wanupe. Ma'e uzapo putar agwer ma'e izeapo haw ipaw ire wà nehe.
<- ZEREMI 4ZEREMI 6 ->